पुणे-राष्ट्रीय पुस्तक न्यासा’च्या वतीने फर्ग्यूसन महाविद्यालयाच्या मैदानावर १६ ते २४ डिसेंबर २०२३ दरम्यान ‘पुणे पुस्तक महोत्सवा’चे आयोजन करण्यात आले असून, वाचन संस्कृतीच्या संवर्धनासाठी नामदार चंद्रकांतदादा पाटील यांनी विशेष पुढाकार घेतला आहे. पुणे पुस्तक महोत्सवात जास्तीत जास्त वाचकांनी भेट देऊन खरेदी करावी, यासाठी कोथरुड मतदारसंघातील प्रत्येक व्यक्तीला १०० रुपयाचे कुपन देण्याचा निर्णय नामदार चंद्रकांतदादा पाटील यांनी घेतला आहे.

पुणे हे विद्येचे माहेरघर आहे, पण त्यासोबतच वाचनप्रेमी मंडळींचे ही शहर आहे. मात्र, त्यामुळे त्याला प्रोत्साहन देण्यासाठी विविध उपक्रम राबविले जात आहेत. त्यासाठीच ‘राष्ट्रीय पुस्तक न्यासा’च्या वतीने पुण्यातील फर्ग्युसन महाविद्यालयाच्या मैदानात १६ ते २४ डिसेंबर २०२३ दरम्यान सकाळी ११ ते सायं. ८ या वेळेत पुणे पुस्तक महोत्सवाचे आयोजन करण्यात आले आहे.

या महोत्सवामध्ये राष्ट्रीय कीर्तीच्या प्रकाशकांबरोबरच इंग्रजी, हिंदी, मराठी, गुजराथी, कन्नड अशा देशभरातील २२ विविध भाषांमधील पुस्तकांचे प्रदर्शन भरविण्यात येणार आहे. तसेच या महोत्सवात हिंदवी स्वराज्य संस्थापक छत्रपती शिवाजी महाराज प्रदर्शनीचा देखील समावेश असणार आहे. त्यामुळे या पुस्तक प्रदर्शनाला जास्तीत जास्त पुणेकरांनी भेट द्यावी; यासाठी नामदार चंद्रकांतदादा पाटील यांनी देखील पुढाकार घेतला आहे.

पुणे पुस्तक महोत्सवात कोथरुडकरांनी मोठ्या प्रमाणात सहभागी होऊन पुस्तके खरेदी करण्यासाठी विशेष योजना राबविण्याचा निर्णय नामदार पाटील यांनी घेतला आहे. या उपक्रमाअंतर्गत कोथरुड मधील वाचन प्रेमी मंडळींनी ‘पुणे पुस्तक महोत्सावा’स भेट देऊन प्रत्येक व्यक्तीला पुस्तक खरेदीसाठी १०० रुपयांचे डिस्काऊंट कुपन दिले जाणार आहे. त्यामुळे नागरिकांनी जास्तीत जास्त प्रमाणात पुस्तके खरेदी करुन, या योजनेचा लाभ घ्यावा, असे आवाहन करण्यात येत आहे.

सदर पुस्तक खरेदीचे कुपन दिनांक १६ ते २२ डिसेंबर दरम्यान नामदार चंद्रकांतदादा पाटील यांच्या कोथरुड, बाणेर मधील जनसंपर्क कार्यालयात सकाळी ११ ते ६ वेळेत उपलब्ध असणार आहेत. यासाठी नागरिकांना आधार कार्डची झेरॉक्स प्रत द्यावी लागणार आहे.

दरम्यान, पुण्यात होत असलेल्या अभिनव उपक्रमांमध्ये ‘शांतता, पुणेकर वाचत आहेत,’ हा ऐतिहासिक उपक्रम देखील होणार आहे. दिनांक १४ डिसेंबरला दुपारी १२ ते १ या वेळेत एक तास पुणेकरांनी आपल्या आवडीच्या पुस्तकाचे वाचन करायचे, असे आवाहन करण्यात येत आहे. यामध्ये नामदार चंद्रकांतदादा पाटील हे देखील सहभागी होणार असून, सर्व पुणेकरांनी ही वाचन संस्कृती वाढीस लागण्यासाठी १४ डिसेंबरच्या उपक्रमात सहभागी होण्याचे आवाहन नामदार पाटील यांनी केले आहे.

पुणे – राष्ट्रीय पुस्तक न्यासाच्या वतीने येत्या १६ ते २४ डिसेंबर या कालावधीत फर्ग्युसन महािद्यालयाच्या मैदानावर होणाऱ्या पुणे पुस्तक महोत्सवात सुमारे २०० स्टॉल्स राहणार असून, पुणेकरांना १० भारतीय भाषांमधील हजारो पुस्तके पाहायला आणि खरेदी करण्यासाठी उपलब्ध राहणार आहे. या पुस्तक महोत्सवाच्या निमित्ताने पुणेकरांना प्रसिद्ध कवी कुमार विश्वास, पत्रकार सौरभ द्विवेदी, ज्येष्ठ शास्त्रज्ञ डॉ रघुनाथ माशेलकर, लोकगीत गायक नंदेश उमप, प्रसिद्ध लेखक विक्रम संपत यांना ऐकण्याची, तर तुकाराम दर्शन महानाट्य, शिवराज्याभिषेक सोहळा अनुभवण्याची संधी मिळणार आहे. त्याचबरोबर युवकांना काश्मिरी बँड, उत्तर भारतीय संगीताचा आस्वाद घेता येणार असून, टॅलेंट हंटमध्ये दररोज आपल्या कला सादर करता येणार आहे. लहान मुलांसाठी बालसाहित्यिकांकडून कथा, गोष्टी ऐकता येणार आहे.

पुण्यात पहिल्यांदाच येत्या शनिवारपासून होणाऱ्या पुणे पुस्तक महोत्सवाचे आयोजन सावित्रीबाई फुले पुणे विद्यापीठ, पुणे महापालिका, उच्च शिक्षण आणि शालेय शिक्षण विभाग यांनी एकत्रित केले आहे. महोत्सवासाठी पुणे श्रमिक पत्रकार संघ सहआयोजक असून, भारतीय विचार साधना आणि खडकी शिक्षण संस्थेचे सहकार्य लाभले आहे. यामध्ये पुस्तक प्रदर्शनाबरोबर विविध सांस्कृतिक कार्यक्रम, चर्चासत्रे, साहित्यिकांच्या मुलाखती, सृजनशिलतेला वाव देणारे आणि वाचन संस्कृतीचा विकास घडविणारे कार्यक्रम खुला रंगमंच आणि अँफी थिएटरमध्ये होणार आहेत. या पुस्तक महोत्सवाच्या निमित्ताने होणाऱ्या विविध उपक्रम आणि कार्यक्रमांमध्ये विद्यार्थ्यांनी सहभागी होण्याबाबत शाळा, महाविद्यालये आणि विद्यापीठांना राज्य सरकारने सूचना दिल्या आहेत, अशी माहिती महोत्सवाचे संयोजक राजेश पांडे यांनी दिली आहे. पुस्तक न्यासाचे प्रकल्प अधिकारी कांचन शर्मा, एज्युकेशन सोसायटीचे अध्यक्ष डॉ. शरद कुंटे यांची उपस्थिती होती.

या महोत्सवाचे उद्घाटन शनिवारी १६ डिसेंबरला दुपारी १२ वाजता उच्च शिक्षण आणि तंत्रज्ञान मंत्री चंद्रकांत पाटील आणि ज्येष्ठ साहित्यिक डॉ. सदानंद मोरे यांच्या हस्ते होणार आहे. तत्पूर्वी, सकाळी १०.३० वाजता राजीव तांबे यांचा लहान मुलांसाठी कथाकथन हा कार्यक्रम होणार आहे. उद्घाटनाच्या सत्रानंतर दुपारी ४.३० बँडचे सादरीकरण करण्यात येणार आहे. या दिवशी रात्री प्रसिद्ध गायक नंदेश उमप यांचा लोकरंग हा सांस्कृतिक कार्यक्रम सायंकाळी ६.३० वाजता होणार आहे. या महोत्सवात दररोज दुपारी दीड ते साडेचार या वेळेत राष्ट्रीय पुस्तक न्यासाच्या वतीने महाविद्यालयीन विद्यार्थ्यांसाठी टॅलेंट हंट उपक्रमाचे आयोजन होणार आहे. या अंतर्गत विद्यार्थ्यांना नृत्य, गायन, वादन अशा विविध प्रकारच्या कला सादर करता येणार आहे. या पुस्तक महोत्सवाची वेळ दररोज सकाळी १०.३० ते ८.३० अशी राहणार आहे. पुण्यातील शाळा, महाविद्यालये आणि विद्यापीठांमधील अधिकाधिक विद्यार्थ्यांनी सहभागी व्हावे. त्याचप्रमाणे पुणेकरांनी मोठ्या संख्येने उपस्थित राहून महोत्सव यशस्वी करावा, असे आवाहन संयोजक राजेश पांडे यांनी केले आहे.
…..
१६ डिसेंबर, शनिवारी
…..

• सकाळी १०.३० – लहान मुलांसाठी कथाकथन कार्यक्रम (खुला मंच) – सादरकर्ते – राजीव तांबे –
• दुपारी १२ वाजता – उद्घाटन सत्र
• दुपारी १.३० ते ४.३० – टॅलेंट हंट
• दुपारी ४.३० – बँड सादरीकरण
• सायंकाळीं ६.३० – लोकरंग हा सांस्कृतिक कार्यक्रम – सादरकर्ते – नंदेश उमप
  ……..
  १७ डिसेंबर, रविवारी
  …
• सकाळी १०.३० – लहान मुलांसाठी ‘सुट्टी आली, सुट्टी आली ‘ कार्यक्रम – सादरकर्त्या – डॉ. माधवी वैद्य
• दुपारी १.३० ते ४.३० – टॅलेंट हंट
• सायंकाळीं ७.३० – तुकाराम दर्शन महानाट्य
  …..
  १८ डिसेंबर, सोमवार
• दुपारी ११.३० – प्रसिद्ध कवी कुमार विश्वास यांचे व्याख्यान
• दुपारी १.३० ते ४.३० – टॅलेंट हंट
• दुपारी ४.३० – प्रसिद्ध पत्रकार सौरभ द्विवेदी यांच्याशी संवाद
• सायंकाळीं ५.३० – प्रसिद्ध लेखक विक्रम संपत यांचे व्याख्यान आणि गप्पा
• सायंकाळीं ७.३० – काश्मिरी बँडचे सादरीकरण
  …..
  १९ डिसेंबर , मंगळवारी
  …
• सकाळी १०.३० – गाथा शिवरायांची – सादरकर्ते – मोहन शेटे (खुला मंच)
• दुपारी १.३० ते ४.३० – टॅलेंट हंट
• दुपारी ३.३० – स्वातंत्र्यपूर्व काळातील कारागृहात साहित्य निर्मिती करणाऱ्या ५८ स्वातंत्र्यसैनिकांवर ‘ कारागृहातील कल्लोळ ‘ हा दृक-श्राव्य कार्यक्रम ( अँफी थिएटर )
• सायंकाळीं ५.३० – हिंदुस्थानच्या फाळणीची शोकांतिका कार्यक्रमात व्यथा हिंदुस्थानच्या फाळणीची पुस्तकाचे प्रकाशन – हस्ते – सुनील आंबेकर
• सायंकाळीं ६.३० – आर्मी बँडचे सादरीकरण
• सायंकाळीं ७.३० – महाराष्ट्राची संस्कृती
  ……
  २० डिसेंबर, बुधवारी
  …
• सकाळी १०.३० – ओंकार काव्यदर्शन – सादरकर्ते – विसुभाऊ बापट ( आंफी थियटर)
• दुपारी १.३० ते ४.३० – टॅलेंट हंट
• दुपारी १. ३० – वाचणारे अधिकारी अंतर्गत आमचा वाचन कारभार कार्यक्रम – सहभाग – अविनाश धर्माधिकारी, सदानंद दाते, विश्वास पाटील
• सायंकाळीं ५.३० – ज्ञानपीठातील ज्ञानतपस्वी कार्यक्रम ( अँफी थियटर) – सहभाग – प्रसिद्ध साहित्यिक
• सायंकाळीं ७.३० – इंद्रधनुष्य – सादरकर्ते – सावित्रीबाई फुले पुणे विद्यापीठाची चमू
  …..
  २१ डिसेंबर, गुरुवारी
  ….
• सकाळी १०.३० – व्यंगचित्रे आणि चिंटू ( अँफी थिएटर) – सादरीकरण – चारुहास पंडित
• दुपारी १.३० ते ४.३० – टॅलेंट हंट
• सायंकाळीं ७.३० – फैजल हा काश्मिरी गीतांचा कार्यक्रम
  ….
  २२ डिसेंबर, शुक्रवारी
  …
• सकाळी १०.३० – कथाकथन ( खुला मंच) – सादरकर्ते – राजीव तांबे
• दुपारी ४.३० – ज्येष्ठ शास्त्रज्ञ डॉ. रघुनाथ माशेलकर यांनी प्रकट मुलाखत ( अँफी थिएटर) मुलाखतकार पत्रकार सागर देशपांडे
• सायंकाळीं ७.३० – श्रीमंत योगी – शिवराज्याभषेक महानाट्य -जाणता राजा सादरकर्ते महाराष्ट्र कीर्ती सौरभ प्रतिष्ठान
  ….
  २३ डिसेंबर , शनिवारी
  …
• दुपारी १.३० ते ४.३० – टॅलेंट हंट
• दुपारी ३.३० – राजकीय नेते काय वाचतात – सहभाग – आशिष शेलार, सतेज पाटील, डॉ. निलम गोऱ्हे, सिद्धार्थ शिरोळे
• सायंकाळीं ७.३० – मालिनी अवस्थी – उत्तर भारतीय लोकसंगीताचा कार्यक्रम
  …..
  २४ डिसेंबर, रविवारी
  …
• दुपारी १.३० ते ४.३० – टॅलेंट हंट
• सायंकाळीं ७.३० – कलर्स बँड

अखिल मंडई मंडळ आणि लायन्स क्लब इंटरनॅशनल डिस्ट्रिक्ट ३२३४ डी २ च्या वतीने शिबिराचे आयोजन

पुणे : अखिल मंडई मंडळ आणि लायन्स क्लब इंटरनॅशनल डिस्ट्रिक्ट ३२३४ डी २ यांच्या वतीने मोफत आरोग्य तपासणी शिबिराचे आयोजन  करण्यात आले होते. यामध्ये १४५० नागरिकांनी विविध आरोग्य तपासण्या करत शिबिराचा लाभ घेतला. महिलांसाठी स्तन कर्करोग तपासणी देखील यावेळी करण्यात आली. 
शुक्रवार पेठेतील शारदा गजानन मंदिरा शेजारील पटांगणात शिबिराचे आयोजन करण्यात आले होते.  शिबिराचे उद्घाटन आरोग्यसेनेचे संस्थापक हृदयरोगतज्ज्ञ  डाॅ. अभिजित वैद्य यांच्या हस्ते झाले. यावेळी प्रमुख पाहुणे म्हणून लायन्स  क्लबचे डिस्ट्रीक्ट गव्हर्नर विजय भंडारी, उपजिल्हाअधिकारी मिनल कळसकर, अखिल मंडई मंडळाचे अध्यक्ष अण्णा थोरात, सचिव विश्वास भोर, अभय थोरात, श्याम खंडेलवाल उपस्थित होते. 
यावेळी स्तन कर्करोग तपासणी, डोळे तपासणी, चष्मा वाटप, नाक, कान, घसा, दात, त्वचारोग, हाडांची तपासणी करण्यात आली. शरद पवार आणि प्रतिभा पवार यांच्या वाढदिवसानिमित्त आरोग्य शिबिराचे आयोजन करण्यात आले होते. 
अभिजित वैद्य म्हणाले, देशापुढे आरोग्याचे अनेक प्रश्न आहेत. अनेक आजार असे आहेत जे लोकांना माहित देखील नाहीत. यासाठी आम्ही सातत्याने लोकांना जागृत करण्याचे प्रयत्न करतो. लोकांनी देखील नियमित आरोग्य तपासणी करुन घ्यायला हवी. 
विजय भंडारी म्हणाले, सामाजिक संस्थांचे कार्यकर्ते आणि गणेशोत्सव मंडळ यांनी मिळून मिसळून काम केले तर समाजासाठी उपयुक्त असे उपक्रम राबविता येतात. आज लोकांचे आरोग्य चांगले रहावे यासाठी प्रयत्न कऱण्याची गरज आहे. ते अशा प्रकारच्या मोफत आरोग्य तपासणी शिबिराच्या माध्यमातून करता येणे शक्य आहे. 

अण्णा थोरात म्हणाले, मंडई परिसरात कष्टकरी वर्ग मोठ्या प्रमाणात आहे. कामाच्या निमित्ताने अनेक कष्टकरी या भागात येतात.  शिबिराच्या माध्यमातून त्यांची आरोग्य तपासणी करण्यात आली. त्यामुळे काही आजार असतील तर निदान होऊन प्रतिबंधात्मक उपचार करण्यास मदत होईल, असेही त्यांनी सांगितले. 

शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळाच्या वतीने योगीश्वर याज्ञवल्क्य वैदिक पुरस्कार वितरण सोहळा संपन्न
पुणे ः  अध्यात्मातून सर्व जगाचे कल्याण होणार आहे आणि हे अध्यात्म वेद विद्येत आहे. आज पर्यंत अनेक पोथी आणि ग्रंथातातून ही विद्या मिळवता येते. परंतु, अशी एकही आदर्श पोथी किंवा ग्रंथ नाही की, ज्यामध्ये एकही चूक नाही. म्हणून गुरू शिष्य परंपरेला शरण जावून वेदाचे पारायण करणे व ते कंठस्थ असले पाहिजे. त्यामुळे ग्रंथांचे संरक्षण आणि संवर्धन होणार आहे, असे प्रतिपादन वेदाचार्य शांताराम भानोसे यांनी केले.

शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळाच्या वेदविद्या संवर्धन उपक्रमाअंतर्गत योगीश्वर याज्ञवल्क्य वैदिक पुरस्कार वितरण सोहळ्याचे आयोजन करण्यात आले. सारसबागेजवळील वेदशास्त्रोत्तेजक सभा येथे कार्यक्रमाचे आयोजन करण्यात आले. यावेळी वैदिक संशोधन मंडळ पुणे संचालक सुब्रह्मण्यम वेरीवेंटी, वेद विद्या संवर्धन समितीचे अध्यक्ष डॉ. रवींद्र मुळे, आहिताग्नी सुधाकर कुलकर्णी, अध्यक्ष विलास देशपांडे, कार्याध्यक्ष विश्राम कुलकर्णी, कार्यवाह श्रीकांत जोशी आदी उपस्थित होते.

यावेळी निखिल भालेराव यांना योगीश्वर याज्ञवल्क्य पुरस्कार ( १५०००/- व मानपत्र),  वेदांग शहरकर यांना आदर्श छात्र पुरस्कार, ( ११०००/- व मानपत्र), श्रीमती रत्नमाला गजानन जोशी स्मरणार्थ  सेवारत्न पुरस्कार (१००००/- व मानपत्र) अरुण देवगावकर यांना  देऊन  ह.भ. प.  बाळू कुंभार यांना ज्ञानेश्वरी प्रदान करून  सन्मानित करण्यात आले. याशिवाय अथर्व हरदास, कौस्तुभ पाठक, प्रशांत जोशी, चिन्मय जोशी, अभय जोशी यांना छात्र पुरस्कार(प्रत्येकी २५००/-) प्रदान करण्यात आले. यावेळी  वेदविद्या शिकणाऱ्या ५ विद्यार्थ्यांचा सत्कार करण्यात आला. इयत्ता १० वी आणि १२ वी तील विद्यार्थ्यांना प्रातिधिनिक स्वरूपात पारितोषिक वितरण करण्यात आले.

शांताराम भानोसे म्हणाले, वेद हे जगातील आद्य वाड्.मय असून ते जगाच्या कल्याणासाठी सांगितले आहे. त्याचा योग्य अभ्यास केला तर राष्ट्राचे कल्याण होईल आणि भारताचे जगात विश्वगुरू होण्याचे स्वप्न पूर्ण होईल. गुरू शिष्य परंपरेची ही वैदिक विद्या लोप पावत आहे. त्याच्या संरक्षणासाठी आणि वेदांचा अभ्यास करणाऱ्यांना, वेदपाठ शाळांना अनुदान दिले पाहिजे, असेही त्यांनी सांगितले पाहिजे.

सुब्रह्मण्यम वेरीवेंटी म्हणाले, वेद विद्या किंवा इतर कोणतीही विद्या असो त्यातील विद्या हा शब्द महत्वाचा आहे. विद्या या शब्दाचे गुरू, शिष्य, विषय आणि अध्ययन हे चार स्तंभ महत्वाचे आहेत. भगवत गीतेचे महत्व सांगताना ते म्हणाले, भगवत गीता ही शिष्याने गुरू समोर कसे वागायचे हे सांगणारे व्यवस्थापन तंत्र आहे, असेही त्यांनी सांगितले.

यावेळी संस्थेचे कार्याध्यक्ष विश्राम कुलकर्णी यांनी संस्थेच्या कार्याचा आढावा देत नविन वास्तू स्थापने विषयीची माहिती दिली. श्रीकांत जोशी यांनी सूत्रसंचलन केले. डॉ. रवींद्र मुळे यांनी प्रास्ताविक केले आणि वैदिक राष्ट्रगीताने कार्यक्रमाची सांगता झाली.