पुणे, दिनांक 13 – ‘डीईएस पुणे विद्यापीठा’त (डीईसपीयू)’भारतीय ज्ञान प्रणाली’ या विषयावर 14 व 15 डिसेंबर रोजी केंद्रीय शिक्षण विभागाच्या सहकार्याने आंतरराष्ट्रीय परिषदेचे आयोजन करण्यात आले असल्याची माहिती कुलगुरु डॉ. प्रसाद खांडेकर यांनी प्रसिद्धी पत्रकाद्वारे दिली आहे.

खांडेकर म्हणाले, राष्ट्रीय शैक्षणिक धोरणात भारतीय ज्ञान प्रणालीवर विशेष भर देण्यात आला आहे. विद्यार्थ्यांमध्ये देशासंबंधी आस्था व प्रेम निर्माण करणे, आपल्या देशाच्या गरजा भागविण्यासाठी संशोधनाची दिशा निर्माण करणे आणि परंपरा व इतिहास याचा अभिमान जागृत करणे. या विषयांच्या संदर्भात जगभरात सामाईक अभ्यासक्रमाची निर्मिती करणे हा या परिषदेचा मुख्य उद्देश आहे.

खांडेकर पुढे म्हणाले, गेल्या दहा हजार वर्षांच्या इतिहासात भारताने जगाला सुसंस्कृत करण्याचेच काम केले आहे. जगाला सुख, समृद्धी व शांती देण्यासाठी भारत स्वतः सुख, समृद्ध व शांती उपभोगत असलेला होणे आवश्यक आहे. त्यासाठी भौतिक प्रगतीबरोबर भारतीय जनतेची पारमार्थिक प्रगती झाली पाहिजे. या उद्देशाने जगभरातील शिक्षण संस्थांशी शिक्षण व संशोधन विषयांत सहकार्य मिळविणे, वैश्विक स्तरावर आपल्या शिक्षणाची गुणवत्ता प्रस्थापित करणे यासाठी ही परिषद उपयुक्त ठरेल.

भारताची सांस्कृतिक, वैचारिक, धार्मिक, दार्शनिक विविधता विद्यमान उच्च शिक्षण व्यवस्थेत प्रभावित करण्याच्या अनुषंगाने राष्ट्रीय शैक्षणिक धोरणाला अनुसरून अंमलबजावणीचे काय टप्पे असू शकतील याचे निर्देश शिक्षण मंत्रालयाला देण्यासाठी चर्चा करून योजना सादर केली जाणार आहे.

शिक्षण मंत्रालयाच्या भारतीय ज्ञान प्रणाली शाखेचे राष्ट्रीय संयोजक प्रोफेसर गंटी मूर्ती, भांडारकर प्राच्यविद्या संशोधन संस्थेचे अध्यक्ष प्रदीप रावत, पद्मश्री कपिल तिवारी, साधु भद्रेशदासजी, पद्मश्री गिरीश प्रभुणे, डीईएसचे अध्यक्ष डॉ. शरद कुंटे, उपाध्यक्ष डॉ. रविंद्र आचार्य, देशातील 22 विद्यापीठांचे कुलगुरू, आयआयटीतील 12 प्राध्यापक आणि देश विदेशातील भारतीय ज्ञान परंपरेवर मौलिक मूलभूत संशोधन कार्य करणाऱ्या अध्यापकांचा परिषदेत सहभाग असणार आहे.

पूर्वार्धात कलापिनी यांच्या गायनाने भरले रंग

पुणे, दि. १३ डिसेंबर २०२३ : उतरत्या मध्यान्ही स्वरमय वातावरणात बुधवारी ६९ व्या सवाई गंधर्व भीमसेन संगीत महोत्सवाला दिमाखदार प्रारंभ झाला.

परंपरेनुसार तुकाराम दैठणकर यांच्या सनई वादनाने ६९ व्या सवाई गंधर्व भीमसेन संगीत महोत्सवाची सुरुवात झाली. त्यांनी राग मधुवंतीने सुरवात केली. मोजक्या स्वरावलींतून रागरूप मांडून त्यांनी दाद मिळवली. त्यांना तबला – कार्तिक स्वामी, निखिल तुकाराम दैठणकर सनई सहवादन, सूरपेटी – गणेश दैठणकर, तानपुरा – केतकी दैठणकर आणि मयुरी दैठणकर यांनी साथसंगत केली. ‘वैष्णव जन तो’ या भजनाच्या वादनाने त्यांनी सांगता केली.

यानंतर पं. श्रीकांत देशपांडे यांचे शिष्य आणि किराणा घराण्याचे गायक संजय गरूड यांनी गायनाची सुरुवात राग भीमपलास मधील ‘अब तो बडी देर’ या रचनेतून केली. रागवाचक आलापीतून भीमपलासचा स्वरविस्तार त्यांनी उत्तम मांडला. त्याला जोडून द्रुत त्रितालात ‘बीरज मे धूम मचाए शाम’ ही प्रसिद्ध बंदिश त्यांनी रंगवली. ‘माझे माहेर पंढरी’ या प्रसिद्ध अभंगाने त्यांनी भक्तिरसपूर्ण भाव निर्माण केले. त्यांना संवादिनी शांतीभूषण देशपांडे, तबला रोहन पंढरपूरकर, तानपुरा – प्रसाद कुलकर्णी व ऋत्विक हिर्लेकर, पखवाज माऊली फाटक, सारंगी फारुख लतिफ खान तर गायनसाथ दिनेश माझिरे यांनी केली.

‘सवाई’ च्या स्वरमंचावर सुविख्यात गायक पं. कुमार गंधर्व यांना जन्मशताब्दीनिमित्त आदरांजली अर्पण करण्यात आली. कुमार गंधर्व यांच्या कन्या आणि शिष्या कलापिनी कोमकली यांनी आपल्या बहारदार सादरीकरणातून कुमारजींच्या समृद्ध आणि प्रयोगशील गायन वारशाचे दर्शन घडवले. समयानुकूल अशा राग पूरियाधनाश्री मध्ये कलापिनी यांनी विलंबित एकतालात ख्यालाची मांडणी साधली. दोन्ही रचना पं. कुमार गंधर्व यांच्या होत्या. ‘आजरा दिन डूबा’ या बंदिशीतून सायंकालीन वातावरण मूर्तिमंत उभे राहिले. ‘ मृगनयनी तेरो यार री’ ही रचना अतिशय ढंगदारपणे त्यांनी पेश केली. त्यानंतर राग हमीर मध्ये त्रितालात त्यांनी आक्रमक तानांचे पॅटर्न घेत हा उत्तरांप्रधान राग मोजक्या वेळात ‘कैसे घर जाऊ लंगरवा’ या रचनेतून खुलवला. रसिकांच्या आग्रहास्तव त्यांनी पं. कुमार गंधर्व यांनी अजरामर केलेली ‘सुनता है गुरु ग्यानी’ ही निर्गुणी रचना प्रस्तुत करत रसिकांना कुमारजींची आठवण करून दिली. त्यांना तबल्यावर प्रशांत पांडव, संवादिनीवर सुयोग कुंडलकर यांनी अनुरूप साथसंगत केली. तानपुरा साथ वत्सल कपाळे आणि वैदेही अवधानी यांनी केली.

पुणे- गुन्हा घडल्यावर पोलीस येतात असा अनुभव असतोच पण कधी तरी गुन्हा होण्यापूर्वी गुन्हा करू पाहणाऱ्या आरोपींना अगोदरच बेड्या ही पडतात . अशाच एका घटनेत पुणे पोलिसांनी हिंदुस्थान पेट्रोलपंप वर दरोडा टाकण्यास निघालेल्या टोळीस दरोडा टाकण्यापूर्वीच पकडून बेड्या ठोकल्या आहेत. या संदर्भात पोलिसांनी सांगितले कि,’दि. १२/१२/२०२३ रोजी गुन्हे शाखा, युनिट-५, कडुन युनिट कार्यक्षेत्रात युनिट-५ प्रभारी पोलीस निरीक्षक महेश बोळकोटगी यांचेसह अधिकारी व अंमलदार असे हडपसर पोलीस स्टेशनचे हद्दीत पेट्रोलिंग करीत असताना युनिट-५ कडील पथकाला बातमी मिळाली की, भोसले व्हिलेज सोसायटीचे कमानीचे पाठीमागे मोकळ्या जागेत ०५ संशईत इसम जमलेले असुन त्याचेजवळ घातक हत्यार असुन ते जवळच असलेल्या हिंदुस्थान पेट्रोलपंप वरील कॅश लुटणार आहे. अशी बातमी मिळाली.
सदर बातमीप्रमाणे बातमीच्या ठिकाणी युनिट कडील अधिकारी व अंमलदार यांनी छापा टाकला, त्यादरम्यान नमुद इसमांपैकी काही इसमांना पोलीसांची चाहुल लागल्याने अंधाराचा फायदा घेऊन पळुन गेले व ३ इसमांना ताब्यात घेतले. त्यांची नावे १) अमन संजय दिवेकर वय २२ वर्षे रा. लेन नंबर ४, जयहिंदनगर, अप्पर इंदिरानगर, पुणे २) विशाल संजय लोखंडे वय २४ वर्षे रा. कांबळे वस्ती, अप्पर इंदिरानगर, पुणे व ३) विधीसंघर्षीत बालक असे असल्याचे सांगितले. त्यावेळी त्यांची अंगझडती घेता त्यांचे ताब्यातुन एकुण ६५,९४०/- रुपये कि.चा मुद्देमाल त्यामध्ये दोन कोयते, लाल मिरची पावडर, नायलॉनची दोरी असे घातक शस्त्रे व साधने जप्त करण्यात आलेली आहे. त्याचेकडे सदरबाबत विचारणा करता, वर नमुद तीन इसम व पळुन गेलेले त्यांचे इतर ३ साथीदारासह विठ्ठल पेट्रोलपंपावर दिवसभरात गोळा झालेली कॅश कॅशीयर रुममध्ये जमा झालेली कॅश आम्ही पाच जण मिळुन कॅशीयरला कोयत्याचा धाक दाखवुन ती कॅश लुटण्याकरीता जाणार होतो, वगैरे सांगितले. तसेच त्यांचेकडे केलेल्या सखोल तपासात व त्यांचे ताब्यात मिळालेल्या दोन मोबाईल फोन हे कोंढवा पोलीस स्टेशनचे हद्दीत रात्रीचे वेळी इसमांना कोयत्याचा धाक दाखवुन जबरदस्तीने चोरी केल्याचे व त्यांनी हडपसर पोलीस ठाणे हद्दीत एका इसमाची जबरदस्तीने कॅश लुटली असल्याचे निष्पन्न झाले. म्हणुन त्यांचेविरुध्द हडपसर पोलीस ठाणे येथे गुन्हा रजि. नं. १८९२/२०२३, भा.दं. वि. कलम ३९९,४०२ व भा.ह.का. कलम ४(२५) व महाराष्ट्र पोलीस अधिनियम कलम ३७ (१) (३), १३५ प्रमाणे गुन्हा दाखल केला असुन अधिक तपास पोलीस करीत आहे.
नमुद आरोपीतांकडुन कोयत्याचा धाक दाखवुन जबरी चोरी केलेले कोंढवा, हडपसर वानवडी स्वारगेट, बिबवेवाडी भारती विद्यापीठ या पोलीस स्टेशनकडील एकुण १८ गुन्हे उघडकीस आले आहे.
सदरची कारवाई ही पोलीस आयुक्त श्री. रितेश कुमार, पोलीस सह आयुक्त (अतिरिक्त कार्यभार) व अपर पोलीस आयुक्त, गुन्हे, रामनाथ पोकळे, पोलीस उप आयुक्त, अमोल झेंडे, सहायक पोलीस आयुक्त, सतिश गोवेकर यांचे मार्गदर्शनाखाली पोलीस निरीक्षक महेश बोळकोटगी, सहायक पोलीस निरीक्षक कृष्णा बाबर, पोलीस उप निरीक्षक अविनाश लोहोटे, पोलीस अमंलदार, रमेश साबळे, राजस शेख, आश्रुबा मोराळे, प्रताप गायकवाड, शहाजी काळे, दया शेगर, प्रमोद टिळेकर, चेतन चव्हाण, विनोद शिवले, पृथ्वीराज पांडुळे, दाऊद सय्यद, अकबर शेख, अमित कांबळे, पांडुरंग कांबळे, विलास खंदारे, राहुल ढमढेरे, शशिकांत नाळे, पल्लवी मोरे, स्वाती गावडे व संजयकुमार दळवी यांनी केलेली आहे.

पुणे-तडीपार असताना मंगळवार पेठेत सर्रास फिरणाऱ्या एका गुंडाला समर्थ पोलिसांनी बेड्या ठोकल्या. या प्रकरणी पोलिसांनी सांगितले कि,’ समर्थ पोलीस ठाणेकडील तपास पथकातील अधिकारी पोलीस अमंलदार समर्थ पोलीस स्टेशनच्या हद्दीत पेट्रोलिंग करीत असताना, पोलीस अंमलदार हेमंत पेरणे यांना त्यांच्या गुप्त बातमीदारा मार्फत बातमी मिळाली की, समर्थ पोलीस स्टेशनकडील तडीपार गुन्हेगार दिपक सुभेदार परदेशी वय २३ वर्ष, रा. सदाआनंदनगर, मंगळवार पेठ पुणे. हा के. ई. एम्. हॉस्पिटल समोरील बाजुस एस.व्ही. युनियन गेट शेजारी, सोमवार पेठ पुणे येथे बसलेला आहे. लागलीच सदरची माहीती त्यांनी वरिष्ठांना कळवून त्याला स्टाफच्या मदतीने सापळा रचून ताब्यात घेतले. त्यास परवानगी बाबत विचारणा केली असता, त्याने पुणे जिल्हयात येण्याकरिता कोणत्याही प्रकारची परवानगी घेतली नसल्याचे समजले. त्यामुळे सदर गुन्हेगाराने पोलीस उपायुक्त साो परिमंडळ १ यांचा आदेश क्रमांक १४/२०२३ नुसार पोलीस आयुक्तालय पुणे शहर व संपूर्ण पुणे जिल्हा हद्दीतून तडीपार केलेले असताना देखील त्याने आदेशाचा भंग केला म्हणून सदर गुन्हेगार दिपक परदेशी यांस अटक करुन समर्थ पोलीस स्टेशन येथे गु. र. नं २६७/२०२३ महाराष्ट्र पोलीस कायदा कलम १४२ अन्वये गुन्हा दाखल करण्यात आलेला आहे. सदर गुन्हेगारावर यापुर्वी खुनाचा प्रयत्न, खंडणी मागणे, बेकायदेशीर हत्यार बाळगणे, असे गंभीर गुन्हे दाखल आहेत.
सदरची कामगिरी ही अप्पर पोलीस आयुक्त, पश्चिम प्रादेशीक विभाग, पुणे शहर प्रविण पाटील पोलीस उप आयुक्त, परिमंडळ १ पुणे शहर, संदीप गिल्ल, सहाय्यक पोलीस आयुक्त, फरासखाना विभाग, पुणे अशोक धुमाळ, समर्थ पोलीस स्टेशनचे वरिष्ठ पोलीस निरीक्षक, . सूरज बंडगर, पोलीस निरीक्षक, (गुन्हे) प्रमोद वाघमारे, यांचे मार्गदर्शनानुसार पोलीस उपनिरीक्षक सौरभ थोरवे, सुनिल रणदिवे, सहा. पोलीस फौज. दत्तात्रय भोसले, पोलीस अंमलदार हेमंत पेरणे, संताष डमाळे, गणेश वायकर, प्रमोद जगताप, रोहीदास वाघेरे, रहीम शेख, अमोल शिंदे, शरद घोरपडे यांनी केलेली आहे.

पुणे-भारती विद्यापीठ पोलीसांनी कात्रजच्या एका घर फोद्याला पकडले आहे,अरबाज खलील शेख, वय १९ वर्षे, रा. भारत नगर, कात्रज असे त्याचे नाव आहे . यासंदर्भात पोलिसांनी सांगितले कि,”दि.१९/११/२०२३ रोजी ते दि.०८/१२/२०२३ रोजी फिर्यादी यांचे मांगडेवाडी कात्रज पुणे येथील राहते घर कुलुप लावुन बंद असताना कोणीतरी अज्ञात चोरटयाने फिर्यादी यांचे घराचे खिडकीचे ग्रिल कशाचे तरी सहाय्याने तोडुन त्यावाटे आत घरात प्रवेश करून ताब्या पितळेची भांडी व इतर साहित्य चोरी केले म्हणुन भारती विद्यापीठ पोलीस स्टेशन गुन्हा रजि नंबर ७९२/२०२३, भादंवि कलम ४५४,४५७,३८० अन्वये गुन्हा दाखल आहे.
दाखल गुन्हयातील अज्ञात आरोपीतांचा भारती विद्यापीठ पोलीस स्टेशनचे तपास पथकाचे अधिकारी व अंमलदार हे वरीष्ठांचे मार्गदर्शनाखाली शोध घेत असताना पोलीस अंमलदार अवधुत जमदाडे, अभिनय चौधरी, सचिन गाडे यांना सदरचा गुन्हा हा इसम अरबाज खलील शेख, वय १९ वर्षे, रा. भारत नगर, कात्रज, पुणे याने केला आहे अशी बातमी मिळाली. त्यानुसार भारती विद्यापीठ पोलीस स्टेशनचे तपास पथकाचे अधिकारी व अंमलदार सदर आरोपीताचा शोध घेवुन त्यास अटक करुन त्यांचेकडुन गुन्हयातील चोरी केले ताब्या पितळेची भांडी जप्त करुन सदरचा गुन्हा उघडकीस आणला आहे.
सदरची कामगिरी मा. अपर पोलीस आयुक्त, पश्चिम प्रादेशीक विभाग, पुणे प्रविणकुमार पाटील,पोलीस उप आयुक्त परिमंडळ २ श्रीमती स्मार्तना पाटील, सहा. पोलीस आयुक्त स्वारगेट विभाग, पुणे श्री. नारायण शिरगावकर यांचे मार्गदर्शनाखाली भारती विदयापीठ पोलीस स्टेशनचे वरिष्ठ पोलीस निरीक्षक विनायक गायकवाड, तसेच पोलीस निरीक्षक (गुन्हे) विजय पुराणिक, गिरीश दिघावकर, सहा. पोलीस निरीक्षक अमोल रसाळ, पोलीस उपनिरीक्षक धिरज गुप्ता, पोलीस अंमलदार मितेश चोरमोले, अवधतु जमदाडे, सचिन गाडे, अभिनय चौधरी, आशिष गायकवाड, शैलेश साठे, चेतन गोरे, महेश बारावकर, मंगेश पवार, निलेश ढमढेरे, हर्षल शिंदे, अभिजीत जाधव, सचिन सरपाले, निलेश खैरमोडे, धनाजी धोत्रे, राहुल तांबे, विक्रम सावंत यांच्या पथकाने केली आहे.

कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे दीपोत्सवाचे आयोजन ; पुणेकरांच्या डोळ्यांचे फिटले पारणे 
पुणे :  सप्तरंगी दिव्यांनी सजलेले मंदिर… विविधरंगी फुलांची रंगावली आणि हजारो पणत्यांच्या प्रकाशात बुधवार पेठेतील लक्ष्मीबाई दगडूशेठ हलवाई दत्तमंदिराचा परिसर उजळून निघाला. मंदिर परिसरात तेलाच्या १० हजार दिव्यांची आकर्षक आरास पाहण्याकरिता भाविकांनी मोठी गर्दी केली होती. पारंपरिक पद्धतीने करण्यात आलेल्या या दीपोत्सवाने पुणेकरांच्या डोळ्यांचे पारणे फिटले. 
बुधवार पेठेतील कै. श्रीमती लक्ष्मीबाई दगडूशेठ हलवाई दत्तमंदिरात देवदिवाळीनिमित्त तेलाच्या १० हजार सप्तरंगी फिरत्या दिव्यांची रोषणाई करण्यात आली. तसेच आकर्षक पुष्परचना साकारुन पारंपरिक पद्धतीने दीपोत्सव करण्यात आला. दीपोत्सवाचे उद्घाटन रामराज्य सहकारी बँकेच्या चेअरमन नंदा नारायण लोणकर, पिसोळी ग्रामपंचायतीच्या सरपंच स्नेहल गणपत दगडे  यांच्या हस्ते झाले. 

यावेळी दत्तमंदिर ट्रस्टचे अध्यक्ष युवराज गाडवे, कार्यकारी विश्वस्त डॉ.पराग काळकर, खजिनदार अ‍ॅड.रजनी उकरंडे, उत्सवप्रमुख अक्षय हलवाई, उत्सव उपप्रमुख सुनील रुकारी, विश्वस्त अ‍ॅड. प्रताप परदेशी, महेंद्र पिसाळ, अ‍ॅड. शिवराज कदम जहागिरदार, राजू बलकवडे यांसह पदाधिकारी व कर्मचारी उपस्थित होते. सुभाष सरपाले व सहका-यांनी ही सजावट केली.
युवराज गाडवे म्हणाले, दरवर्षीप्रमाणे यंदाही देव दिवाळीनिमित्त मंदिरात दीपोत्सव साजरा करण्यात आला. मंदिराचे प्रवेशद्वार व गाभारा फुलांच्या माळांनी तसेच रांगोळीने सजविण्यात आले. तसेच कळसावर संपूर्णपणे रंगीबेरंगी दिव्यांची आकर्षक सजावट करण्यात आली. कळसावर ओम, श्री व स्वस्तिक च्या शुभचिन्हांची सजावट देखील पणत्यांच्या माध्यमातून करण्यात आली. मंदिरात अनेक प्रकारच्या समई व दिवे पाहण्यासोबतच दत्तमंदिरातील दीपोत्सवाचे मोबाईलमध्ये दृश्य कैद करण्याकरीता भाविकांनी मोठी गर्दी केली होती.

परमवीरचक्र विजेते योगेंद्रसिंग यादव यांच्या हस्तेरविवारी (दि. १७) ‘व्हायरल माणुसकी’चे प्रकाशन
पुणे : कारगिल युद्धात टायगर हिलच्या लढाईत दाखवलेल्या शौर्याबद्दल वयाच्या १९ व्या वर्षी देशातील सर्वोच्च शौर्य पुरस्कार परमवीरचक्र मिळालेल्या भारतीय सेनादलातील अधिकारी ग्रेनेडियर योगेंद्रसिंह यादव यांच्या हस्ते ‘व्हायरल माणुसकी’ पुस्तकाचे प्रकाशन होणार आहे. हा प्रकाशन सोहळा येत्या रविवारी (दि. १७ डिसेंबर) सकाळी १० वाजता लेडी रमाबाई सभागृह, सर परशुरामभाऊ (एसपी) महाविद्यालय, टिळक रस्ता, पुणे येथे होणार आहे. वैभव सुनंदा पंडित वाघ लिखित न्यू ईरा पब्लिशिंग हाऊसतर्फे प्रकाशित ‘व्हायरल माणुसकी’ या पुस्तकातून ‘निगेटिव्ह काळातील पॉझिटिव्ह स्टोरी’ शब्दबद्ध करण्यात आलेली आहे.
१९९९ च्या कारगिल युद्धात लढवय्या योगेंद्रसिंग यादव यांनी महत्वाची भूमिका बजावली होती. वयाच्या १९ व्या वर्षी त्यांना परमवीरचक्र देऊन सन्मानित करण्यात आले. टायगर हिल आणि तोलोलिंगमध्ये प्राण पणाला लावत केलेल्या शौर्याबद्दल त्यांना हा सन्मान मिळाला आहे. लढाऊ व्यक्तीला ऐकण्याची संधी पुणेकरांना मिळणार आहे. तेव्हा अधिकाधिक पुणेकरांनी या प्रकाशन सोहळ्यास, योगेंद्रसिंह यादव यांच्या सन्मानासाठी उपस्थित राहण्याचे आवाहन संयोजकांनी केले आहे.

पुणे : शहराच्या मध्यवर्ती भागातील जुन्या वाड्यांना झोपडपट्टी असल्याचा अभिप्राय देऊन तेथे झोपडपट्टी पुनर्वसन योजना राबविण्यात येत असल्याचा धक्कादायक प्रकार पुढे आल्यानंतर त्याची दखल महापालिका आयुक्त, प्रशासक विक्रम कुमार यांनी घेतली आहे. यासंदर्भात कुमार यांनी झोपडपट्टी पुनर्विकास प्राधिकरणाला पत्र दिले असून अशा सर्व प्रकरणांना स्थगिती द्यावी, अशी सूचना केली आहे. तसेच महापालिकेच्या स्तरावर या प्रकाराची चौकशी करण्यासाठी त्रिस्तरीय समिती स्थापन करण्यात आली आहे.बांधकाम विभागाचे अधीक्षक अभियंता युवराज देशमुख, मालमत्ता व्यवस्थापन विभागाचे उपायुक्त महेश पाटील आणि दक्षता विभागाचे कार्यकारी अभियंता दिनेश गिरोला यांची समिती स्थापन करण्यात आली आहे. या समितीच्या अहवालानंतर उपअभियंत्यांवर कारवाई केली जाणार आहे.

शहराच्या मध्यवर्ती भागात अनेक जुने वाडे असून एकात्मिक बांधकाम नियमावलीतील तरतुदींमुळे त्यांचा पुनर्विकास रखडला आहे. या दरम्यान, झोपडपट्टी पुनर्विकास प्राधिकरणाने शहरातील एखाद्या भागात झोपडपट्टीसदृश भाग असल्यास आणि महापालिकेच्या संबंधित विभागाने त्याबाबत अभिप्राय दिल्यास अशा ठिकाणी झोपडपट्टी पुनर्विकास योजना राबविता येईल, असे पत्राद्वारे शासनाला कळविले होते. त्यानंतर महापालिकेचे क्षेत्रीय कार्यालयातील अधिकारी आणि उपअभियंत्यांनी तसा अभिप्राय दिला होता. मध्यवर्ती भागातील ७० वाड्यांचे झोपडपट्टी पुनर्वसन योजनेत रुपांतर करण्यात आल्याचा धक्कादायक प्रकार पुढे आला होता. माजी नगरसेवक उज्ज्वल केसकर, प्रशांत बधे आणि सुहास कुलकर्णी यांनी यासंदर्भात आयुक्त कुमार यांच्याकडे तक्रार नोंदविली होती.या पार्श्वभूमीवर आयुक्तांनी झोपडपट्टी पुनर्वसन प्राधिकरणाच्या मुख्याधिकाऱ्यांना पत्र दिले आहे. जुन्या वाड्यांना झोपडपट्टी पुनर्वसन प्रकल्पाअंतर्गत देण्यात आलेल्या परवनग्या स्थगिती करून तेथील बांधकाम थांबवावे आणि त्याचा अहवाला महापालिकेला सादर करावा, अशी सूचना केली आहे. तसेच महापालिकेच्या स्तरावर त्रिस्तरीय समिती स्थापन करण्यात आली आहे.

पुणे –बालाजीनगर परिसरात खुशबू हॉटेल जवळ सृष्टी आयुर्वेदिक मसाज उपचार केंद्र नावाखाली वेश्या व्यवसायकरीता मुलींना प्राप्त करून घेत त्यांना पैशाचे आमिष दाखवून वेश्याव्यवसायासाठी प्रवृत्त केल्याचा गुन्हा उघडकीस आला आहे. याप्रकरणी सहकारनगर पोलिस ठाण्यात उमेश मलाप्पा तराळ (राहणार -बालाजीनगर, पुणे )या आरोपी विरोधात गुन्हा दाखल करून त्यास अटक करण्यात आली आहे.

याबाबत पुणे शहर गुन्हे शाखेचे सामाजिक सुरक्षा विभागाचे पोलिस हवालदार अजय नारायण राणे यांनी आरोपी विरोधात सहकारनगर पोलिस ठाणे तक्रार दाखल केली आहे. त्यानुसार आरोपीवर अनैतिक मानवी वाहतूक प्रतिबंधक कायदा 1956 चे कलम 3,4,5 व भादवी 370 नुसार गुन्हा दाखल करण्यात आलेला आहे. पोलिसांनी दिलेल्या माहितीनुसार, तक्रारदार अजय नारायण राणे हे सामाजिक गुन्हे शाखेत नेमणुकीस आहे. सामाजिक सुरक्षा विभागास माहिती मिळाली होती की ,उमेश तराळ हा पीडित मुलींना वेश्याव्यवसाय करीता प्राप्त करून घेत ,त्यांना पैशाचे आमिष दाखवून वेश्याव्यवसायासाठी प्रवृत्त करत आहे.आयुर्वेदिक मसाज उपचार केंद्राच्या नावाखाली मुलींकडून वेश्याव्यवसाय करून घेऊन त्यातून मिळालेल्या रकमेतून स्वतःची उपजीविका भागवीत असताना तो मिळवून आल्याने पोलिसांनी याप्रकरणी आरोपीवर गुन्हा दाखल केला आहे. याबाबत पोलिस निरीक्षक संदीप देशमाने पुढील तपास करत आहे.