पुणे,  दि.  ११  डिसेंबर : विश्वशांती केंद्र (आळंदी), माईर्स एमआयटी विश्वशांती विद्यापीठ, पुणे, भारत  व श्रीक्षेत्र आळंदी-देहू परिसर विकास समिती यांच्या संयुक्त विद्यमानेे संत शिरोमणी श्री ज्ञानेश्वर महाराज यांचा ७२७ वा संजीवन समाधी सोहळा व जागतिक  सहिष्णुता सप्ताहाचा समारोप विश्वरूपदर्शन मंच, श्रीक्षेत्र आळंदी येथे दुपारी १२.०० वाजता वारकर्‍यांच्या उपस्थितीत पार पडला. इंद्रायणी नदीच्या दोन्ही तीरावरील वारकर्‍यांनी गुलाल, बुक्का व फुलांची ओंजळ वाहून ज्ञानेश्वर माऊलीचे भावपूर्ण स्मरण केले. भजन करून नामस्मरणाचा गजर केला. यावेळी विश्वरुप दर्शन मंचावर घंटानाद करण्यात आला. विश्वशांती केंद्राच्या वतीने वारकर्‍यांना महाप्रसाद देण्यात आला.
तत्पूर्वी ह.भ.प.डॉ.सुदाम महाराज पानेगांवकर यांनी काल्याचे कीर्तन केले. त्यानंतर मान्यवरांच्या हस्ते दहीहंडी फोडण्यात आली. याद्वारे शेकडो वर्षांची परंपरा जपण्यात आली. इंद्रायणीच्या घाटावर वारकर्‍यांनी या समाधी सोहळ्याच्या काल्याच्या महाप्रसादाचा लाभ घेतला.
या समारंभासाठी विश्वशांती केंद्र (आळंदी), माईर्स एमआयटी विश्वशांती विद्यापीठाचे संस्थापक अध्यक्ष विश्वधर्मी प्रा.डॉ. विश्वनाथ दा. कराड, ह.भ.प. तुळशीराम दा. कराड,  सौ. उषा विश्वनाथ कराड, माईर्स मायमर वैद्यकीय महाविद्यालयाच्या कार्यकारी संचालिका डॉ. सुचित्रा कराड-नागरे, प्रा.स्वाती कराड चाटे, नागपूर विद्यापीठाचे माजी कुलगुरू डॉ. एस.एन.पठाण, डॉ. मिलिंद पांडे व योगगुरू पाडेकर गुरूजी हे उपस्थित होते.
या सप्ताहात हभप अर्जुन महाराज लाड गुरूजी, हभप हरिहर महाराज दिवेगांवकर, हभप रामराव महाराज ढोक, हभप यशोधन महाराज साखरे व हभप चिन्मय महाराज सातारकर यासारख्या नामवंत कीर्तनकारांनी कीर्तनरूपी सेवा सादर केली. तसेच, प्रियंका ढेरंगे चौधरी, गायिका अपर्णा संत, ज्येष्ठ संगीतकार व गायक श्रीधर फडके, पं. शौनक अभिषेकी व विश्वशांती संगीत कला अकादमीच्या शिक्षक व विद्यार्थ्यांनी अभंगवाणी व भक्तीसंगीताचे कार्यक्रम सादर केले.
ह.भ.प.श्री.बापूसाहेब मोरे-देहूकर म्हणाले,” दुष्काळ पडला तर जनावरे मरतात. मोठा दुष्काळ पडला माणसे व जनावरे मरतात आणि चांगल्या संस्कारांचा व विचारांचा दुष्काळ पडला तर संपूर्ण मानवता मरते. त्यामुळे संताच्या वचनाचे महत्व सृष्टीवर अधिक आहे. संत हे जग वात्सल्य असतात म्हणून संताची महिमा ही शब्दात सांगता येत नाही. संत हे स्वतःच्या दुखांना विराम देऊन दुसर्‍यांचे दुख सावरण्यास पुढे येतात. त्यांना सुख व शांतीचा मार्ग दाखवितात.”
प्रा.डॉ. विश्वनाथ दा. कराड म्हणाले,”या सप्ताहात प्रवचन, कीर्तन, गायन व भजन या मार्गाने नामवंतांनी माऊलीचरणी आपली सेवा रुजू केली. यापुढेही वर्षभर लोकशिक्षणाचे विविध कार्यक्रम या विश्वरूप दर्शन मंचावर होणार आहेत. त्यामध्ये पर्यावरण स्वच्छता व निकोप, सुसंस्कृत समाजनिर्मितीसाठी जनजागृती याद्वारे विज्ञान व अध्यात्म यांचा संगम होईल. पवित्र तीर्थक्षेत्रांचे खर्‍या अर्थाने ज्ञानतीर्थक्षेत्रामध्ये परिवर्तन घडविण्याचा आमचा प्रयत्न आहे. ज्ञान, कर्म आणि भक्तीतून ईश्वर दर्शन होते. त्याग आणि समर्पणाचा संतांनी दिलेला संदेश व त्यांची शिकवण आत्मसात करून त्या मार्गाने चालण्याचा प्रयत्न करावा.”
शालीकराम खंदारे यांनी सूत्रसंचालन व महेश महाराज नलावडे यांनी आभार मानले.

पुणे, ११ डिसेंबर
छत्रपती शिवाजी महाराजांच्या जीवनचरित्रातील विविध पैलूंचे वक्त्यांनी घडवलेले मनोज्ञ दर्शन, श्री शिवरायांच्या पराक्रमाची थोरवी गाणारी भाषणे आणि हिंदवी स्वराज्याचे अनन्यसाधारण महत्त्व श्रोत्यांसमोर उलगडत गेले आणि शिवचरित्राच्या या जागराने श्रोतेही भारावले.

अक्षय सेवा संशोधन प्रतिष्ठान आणि कौशिक आश्रम यांनी आयोजित केलेल्या शिवशाहीर बाबासाहेब पुरंदरे स्मृती व्याख्यानमालेचा समारोप इतिहासाचे अभ्यासक महेश तेंडुलकर यांच्या व्याख्यानाने झाला. शिवचरित्राच्या या जागराला श्रोत्यांची उत्स्फूर्त दाद मिळाली. महर्षी विनोद रिसर्च फाऊंडेशनचे संचालक डॉ. संप्रसाद विनोद आणि राष्ट्रीय स्वयंसेवक संघाचे पुणे महानगर संघचालक रवींद्र वंजारवाडकर यांची यावेळी प्रमुख उपस्थिती होती. शिवशाहीर बाबासाहेब पुरंदरे यांनी शिवचरित्र सर्वदूर पोहोचवण्यासाठी लेखन आणि व्याख्यानांच्या रूपाने जे कार्य केले, त्या कार्याची थोरवी देखील यावेळी मांडण्यात आली.

छत्रपती शिवाजी महाराज सिंहासनाधीश्वर झाले आणि इतिहासाला वेगळे वळण मिळाले. त्यांचे प्रेरणादायी चरित्र सर्वांपर्यंत पोहोचवले पाहिजे, असे वंजारवाडकर म्हणाले. शिवशाहीर बाबासाहेब पुरंदरे कवी होते, लेखक होते, दिग्दर्शक होते, इतिहास संशोधक होते. छत्रपती शिवाजी महाराज यांचे कर्तृत्व त्यांनी विविध माध्यमातून सर्वांपर्यंत पोहोचवले. असे डॉ. विनोद यांनी सांगितले.

शिवचरित्र सर्वांना भावेल अशा पद्धतीने मांडणी करत बाबासाहेब पुरंदरे यांनी शिवचरित्राचा प्रसार केला. त्यांचे हे कार्य अत्यंत महत्त्वपूर्ण आहे. त्यांचे शिवचरित्र मराठी मनावर पकड निर्माण करते. त्यांचे व्यक्तिमत्त्व कला, प्रतिभेसह अनेक गुणांनी संपन्न होते, असे तेंडुलकर म्हणाले.

संस्थेचे ज्येष्ठ विश्वस्त दिवाकर पांडे यांनी प्रास्ताविक आणि नागेश पाटील यांनी सूत्रसंचालन केले.

पुणे:

काँग्रेस चा अजून एक भ्रष्टाचार उघड झाला असून यावेळी तब्ब्ल 300 कोटी रुपये मोहब्बत च्या दुकानातून जप्त झाले असून आजवरच्या सर्व रेड मध्ये सापडलेली ही सर्वात मोठी रक्कम आहे, यावरूनच काँग्रेस चा भ्रष्ट कारभार उघड होतं आहे असा आरोप करत आज भारतीय जनता पार्टीच्या महिला आघाडी च्या वतीने महिला मोर्चा अध्यक्षा कोथरूड दक्षिण मंडल कांचन रुपेश कुंबरे यांच्या अध्यक्षतेखाली कोथरूड च्या कर्वे पुतळा चौकात जोरदार निदर्शने करण्यात आली. यावेळी
पुनीत जोशी सरचिटणीस पुणे शहर , डॉ. संदीप बुटाला कोथरूड दक्षिण मंडल अध्यक्ष , महिला मोर्चा अध्यक्षा कोथरूड दक्षिण मंडल कांचन रुपेश कुंबरे, कोथरूड च्या सरचिटणीस व महिला मोर्चा कोथरूड मंडल च्या प्रभारी सौ.मंजुश्री संदीप खर्डेकर,माजी नगरसेविका वासंतीताई जाधव , वृषाली चौधरी जयंत भावे , कोथरूड महिला मोर्चा सरचिटणीसकेतकी कुलकर्णी , पल्लवी गाडगीळ, सुप्रिया माझिरे, विद्या टेमकर,उपाध्यक्षा सुरेखा डाबी, गायत्री लांडे , रमा डांगे , चिटणीस जयश्री घाटे , पूनम चव्हाण, सारिका सणस, प्रियांका चव्हाण सुरेखा जगताप , निर्मला रायरीकर, अनिता तलाठी, जान्हवी जोशी , मनीषाताई बुटाला , वर्षा पाटील , प्राची बगाटे, कोथरूड मंडल सरचिटणीस दीपक पवार, गिरीश खत्री,कोथरूड युवा मोर्चा अध्यक्ष अमित तोरडमल, कोथरूड मंडल उपाध्यक्ष दिनेश माथवड, विशाल रामदासी,कुणाल तोंडे, सुहास साठे , नाना कुंबरे , अमोल डांगे, आशुतोष वैशंपायन , सुजित मगर व इतर पदाधिकारी व कार्यकर्ते मोठ्या संख्यने उपस्थित होते.
यावेळी पुनीत जोशी, डॉ. संदीप बुटाला, कांचन कुंबरे, मंजुश्री खर्डेकर, वृषाली चौधरी, ऍड. प्राची बगाटे आणि केतकी कुलकर्णी यांनी आपल्या भाषणात काँग्रेस चे वाभाडे काढले.जनतेला आता समजलं असेल की काँग्रेस ने एकीकडे गरीबी हटाव चा नारा दिला आणि दुसरीकडे स्वतःच्या तिजोऱ्या भरून घेतल्या.असा आरोप केला.

 
पुणे, दि.११डिसेंबर : १४ वर्षाखालील रिदमिक योगासन क्रीडा प्रकारात ध्रुव ग्लोबल स्कूलच्या महिका पटवर्धन ने चमकदार कामगिरी करत सुवर्ण पदक पटकावले.  ध्रुव ग्लोबल स्कूलचे नाव विभागीयस्तरावर उंचावले आहे. अत्यंत लवचिक आणि शास्त्रशुद्ध पद्धतीने रिदमिक योगासन करणारी महिकाने सर्वांचीच मने जिंकली. तिच्या सादरीकरणाला उत्कृष्ट दाद मिळाली. तीच्या यशाबद्दल ध्रुव ग्लोबल स्कूलचे संचालक यश मालपाणी व प्रिन्सीपल संगीता राऊतजी यांनी कौतुक करून शुभेच्छा दिल्या.
अहमदनगर येथील वाडिया पार्क जिल्हा संकुल मध्ये शालेय विभागीय योगासन स्पर्धा संपन्न झाल्या. या स्पर्धेत पूणे विभागातील अनेक शाळांनी सहभाग नोंदविला होता. यामध्ये वैयक्तिक १४ वर्षाखालील मुलींच्या रिदमिक योगासन क्रीडा प्रकारात ७ व्या वर्गातील महिका पटवर्धन ने अप्रतिम खेळाचे प्रदर्शन केले. उल्लेखनीय म्हणजे, यापूर्वीही महिका ने अनेक योगासन स्पर्धेत पदके मिळवली आहेत. ही स्पर्धा १४, १७ आणि १९ वयोगटातील मुले व मुलींसाठी होती. प्रशिक्षक गायत्री वारे व वैष्णवी आंद्रे यांनी तिला मार्गदर्शन केले.  तीच्या या यशाबद्दल सर्व स्तरांतून अभिनंदन होत आहे.

पुणे : ओशो आश्रम वाचवण्यासाठी गेल्या अनेक वर्षांपासून लढा देणाऱ्या ओशो भक्तांच्या प्रयत्नांना यश आले आहे. कोरेगाव पार्क येथील ओशो आश्रमातील सर्व्हे नं. १५ व १६ मधील जागा राजीव बजाज यांना विकण्यास मनाई करण्यात आली असून, आश्रम व्यवस्थापनाने बजाज यांच्याकडून आगाऊ स्वरूपात घेतलेले ५० कोटी रुपये परत करण्याचे निर्देश धर्मादाय सहआयुक्त आर. यु. मालवणकर यांनी दिले आहेत. गेल्या अनेक दिवसांपासून हा निकाल प्रतीक्षेत होता. ही जागा विकण्याची ट्रस्टला खरोखर गरज आहे का? आणि ट्रस्टच्या हितासाठी व संरक्षणासाठी योग्य आहे का? या दोन मुद्द्यांच्या आधारे हा निकाल देण्यात आला आहे. धर्मादाय आयुक्तालयाच्या या ऐतिहासिक निकालाने जगभरातील ओशो शिष्यांना आनंद झाला आहे.
नुकत्याच एक डिसेंबरला झालेल्या युक्तिवाद व उलट तपासणीनंतर माननीय धर्मादाय सहआयुक्तांनी ओशो इंटरनॅशनल फाउंडेशन ट्रस्टची जागा विक्रीसाठीची याचिका क्रमांक २/२०२१ फेटाळून लावली.
धर्मादाय सहआयुक्तानी दिलेल्या  निकालात म्हटले आहे की , याचिकाकर्त्या ट्रस्टने राजीवनयन राहुलकुमार बजाज व रिषभ परिवाराला बयाणा रक्कम ५० कोटी रुपये विनव्याज परत करावेत. ओशो इंटरनॅशनल फाउंडेशनच्या २००५ ते २०२३ या कालावधीत व्यवहारांचे सहायक धर्मादाय आयुक्तांच्या परवानगीने विशेष लेखापरीक्षकांच्या समितीमार्फत हा निकाल दिल्यापासून एक महिन्याच्या आत पीटीए विशेष लेखापरीक्षण करावे. महाराष्ट्र पब्लिक ट्रस्ट अधिनियम १९५१ मधील नियम २० नुसार या विशेष ऑडिटसाठी २५ हजार प्रतिवर्ष हे स्थिर शुल्क किंवा ओशो इंटरनॅशनल फाउंडेशनच्या वार्षिक उत्पन्नाच्या एक टक्के यापैकी जे कमी असेल ते अदा करावे. हा निकाल दिल्यापासून १५ दिवसांच्या कालावधीत ओआयएफच्या विश्वस्तांनी तरतूद म्हणून २,२५,०००/- रक्कम जमा करावी. विश्वस्त, व्यवस्थापक अथवा अन्य अधिकृत व्यक्ती जे फाउंडेशनच्या अकौंट्सचे काम पाहतात, त्यांनी विशेष ऑडिटर्सना सर्व रेकॉर्ड व खातेपुस्तके, पावत्या, व्हाउचर्स, लेजर्स उपलब्ध करून द्यावीत आणि निर्धारित वेळेत ऑडिट पूर्ण करण्यासाठी सर्व प्रकारचे सहकार्य करावे. विशेष लेखापरीक्षकांनी त्यांच्या नियुक्तीच्या तारखेपासून सहा महिन्यांच्या कालावधीत त्यांचा एकत्रित अहवाल या प्राधिकरणाकडे सादर करावा.

दरम्यान, हा निकाल देताना नोंदवलेल्या निरीक्षणांनुसार, ओशो इंटरनॅशनल फाउंडेशनच्या नोंदींनुसार विश्वस्तांकडून ट्रस्टच्या मालमत्तेसंदर्भात वारंवार व्यवहार करण्याचा प्रयत्न झालेला दिसतो आहे. ट्रस्टचा निधी आणि उत्पन्न याबाबत त्यांच्यामध्ये गांभीर्य दिसत नाही. कोणत्याही तज्ञाचा सल्ला न घेता घाईघाईने विश्वस्त निर्णय घेत आहेत, याचा दीर्घकालीन परिणाम ओशो इंटरनॅशनल फाउंडेशन, तसेच नियो सन्यास फाउंडेशनच्या (एनएसएफ) भविष्यातील आर्थिक स्वातंत्र्यावर होत आहेत. लाखो शिष्य आणि ओशो भक्तांच्या भावना या संस्थांशी, ओशो समाधी आणि ओशो समाधीच्या आजूबाजूच्या परिसराशी, इथल्या संपत्तीशी जोडलेल्या आहेत. 
हा मनावर हृदयाचा, हेराफेरीवर भक्तीचा, उंदीरांच्या शर्यतीवर कृपेचा, खोट्या दाव्यांवर तथ्यांचा, द्वेषावर प्रामाणिकपणाचा हा विजय आहे. ओशो आश्रम हा निव्वळ मालमत्तेचा तुकडा नाही, तो आध्यात्मिक साधकांसाठी एक मरुभूमी आहे. ही जागा सर्व प्रकारे संरक्षित केली पाहिजे, अशी भावना ओशोभक्त स्वामी अखिल सरस्वती यांनी व्यक्त केली. 
या लढ्यात ओशो भक्तांची बाजू मांडणारे वरिष्ठ विधिज्ञ ऍड. निखिल राजेशिर्के म्हणाले, माननीय धर्मादाय सहआयुक्तांनी मुंबई विश्वस्त संस्था कायदा १९५० मधील सेक्शन ३६ अंतर्गत निकाल देत मालमत्तेचे संरक्षण तर केलेच, शिवाय चौकशी करून ट्रस्टच्या व्यवस्थापनावरही नियंत्रण ठेवले आहे.
ऍड. राधिकेश उत्तरवार व पूजा ठाकूर यांनी हा निकाल जगभरातील ओशोंच्या लाखो शिष्यांचा आणि अनुयायांचा एक मोठा विजय आहे. हा निकाल कायद्यातील तरतुदी आणि ओशो भक्तांच्या भावनांचे अनोखे मिश्रण आहे. विशेष लेखापरीक्षणाचा आदेश दीर्घकाळ दिलासा देणारा होता. कारण गेल्या तीन दशकांपासून नियामक मंडळावर लावण्यात आलेल्या गैरव्यवस्थापनाच्या आरोपांबाबत सत्य समोर येण्याची शक्यता आहे, असे नमूद केले.
वरिष्ठ वकील ऍड. वेणुगोपाल म्हणाले, ओशो इंटरनॅशनल फाउंडेशनच्या २००५ ते २०२३ या कालावधीतील आर्थिक व्यवहारांच्या लेखापरीक्षणानंतर सर्व विश्वस्तांची गच्छंती निश्चित आहे. ट्रस्टच्या मालमत्तेचे संरक्षण करण्यासाठी ओशो प्रेमींच्या प्रामाणिक आणि निःस्वार्थ सेवेचा उल्लेखही माननीय न्यायाधीशांनी आदेशात केला आहे.
सर्वोच्च न्यायालयातही माघारमुंबई उच्च न्यायालय व धर्मादाय आयुक्तालयाने आश्रमाच्या जागा विक्रीसंदर्भात दिलेल्या अंतरिम आदेशाला आव्हान देण्यासाठी ओशो इंटरनॅशनल फाउंडेशनच्या वतीने काही महिन्यांपूर्वी सर्वोच्च न्यायालयात स्पेशल लिव्ह पिटिशन (एसएलपी) दाखल केली होती. तसेच जागा विक्रीच्या समर्थनार्थ काही दस्तावेज सादर केले होते. ओशो इंटरनॅशनल फाउंडेशनने सोमवारी (११ डिसेंबर) ही पिटिशन सर्वोच्च न्यायालयातून मागे घेण्याचा निर्णय घेतल्याने ही याचिका निकाली निघाली आहे.

पुणे : अयोध्येतील श्रीराम जन्मभूमी मंदिरातील श्री रामाच्या मूर्तीसाठी लाखो हातांनी वस्त्र विणले जाणार आहे. त्याकरिता ‘दो धागे श्रीराम के लिए’ या अभियानाचे आज पुणे येथे केंद्रीय मंत्री स्मृती इराणी, विधानपरिषद उपसभापती डॉ. नीलम गोऱ्हे, उच्च व तंत्र शिक्षण मंत्री श्री. चंद्रकांतदादा पाटील, श्री राम मंदिर न्यास अयोध्या पूज्य श्री गोविंद देव गिरी महाराज यांच्या हस्ते उद्घाटन झाले. तसेच ‘रामजन्म भूमीचे रामायण’ या पुस्तकाचे प्रकाशनही यावेळी करण्यात आले. या दरम्यान उपसभापती डॉ. गोऱ्हे यांनी स्वतःच्या हाताने प्रभू श्रीराम यांच्या वस्त्राचे काही धागे विणले.

या कार्यक्रमाला केंद्रीय मंत्री स्मृती इराणी, विधानपरिषद उपसभापती डॉ. नीलम गोऱ्हे, उच्च व तंत्र शिक्षण मंत्री श्री. चंद्रकांतदादा पाटील, श्री राम मंदिर न्यास अयोध्या पूज्य श्री गोविंद देव गिरी महाराज, श्री राम मंदिर न्यास अयोध्या श्री सुरेशजी (भैय्याजी) जोशी यांसह अन्य मान्यवर उपस्थित होते.

या कार्यक्रमाचे आयोजन श्रीमती. अनघा घैसास यांनी केले आहे.

पुणे, दि. १२: राष्ट्रीय विधी सेवा प्राधिकरण नवी दिल्ली, महाराष्ट्र राज्य विधी सेवा प्राधिकरण उच्च न्यायालय मुंबई यांच्या निर्देशानुसार आणि प्रमुख जिल्हा न्यायाधीश तथा जिल्हा विधी सेवा प्राधिकरण पुणेचे अध्यक्ष के.पी.नांदेडकर यांच्या मार्गदर्शनाखाली ९ डिसेंबर रोजी आयोजित करण्यात आलेल्या राष्ट्रीय लोकअदालतमध्ये जिल्ह्याने प्रलंबित ३३ हजार ३५९ आणि दाखलपूर्व ५० हजार ४५८ असे एकूण ८३ हजार ८१७ प्रकरणे निकाली काढण्यात आले. लोकअदालतीमध्ये सर्वाधिक प्रकरणे निकाली काढण्यात पुणे जिल्ह्याने सातत्याने प्रथम क्रमांक कायम राखला असल्याची माहिती जिल्हा विधी सेवा प्राधिकरणाच्या सचिव सोनल पाटील यांनी दिली आहे.

जिल्हा विधी सेवा प्राधिकरण पुणे तर्फे विधी सेवा प्राधिकरण अधिनियम १९८७ मधील तरतुदी अंतर्गत राज्य, जिल्हा विधी सेवा प्राधिकरणे व तालुका विधी सेवा समित्याद्वारे अशा प्रकारच्या लोकन्यायालयांचे वेळोवेळी आयोजन करण्यात येते. लोकअदालत किंवा लोक न्यायालय हे एक अनोखे व्यासपीठ आहे जिथे विवाद लवकर आणि परवडण्याजोगे सोडवले जातात.

लोकअदालतीमध्ये मोठ्या प्रमाणात खटल्यांचा यशस्वी निपटारा हा न्यायालयाच्या सक्रिय दृष्टिकोनाचा आणि पारंपारिक न्यायव्यवस्थेवरील भार कमी करण्याच्या क्षमतेचा पुरावा आहे. खटल्यांचा अनुशेष कमी करण्यासाठी आणि वेळेवर न्याय मिळेल याची खात्री करण्यासाठी हा टप्पा महत्त्वाचा आहे.

राष्ट्रीय लोक अदालतीला जिल्ह्यात चांगला प्रतिसाद मिळत असून लोकअदालत यशस्वी करण्यासाठी सर्व न्यायीक अधिकारी, जिल्ह्यातील सर्व तालुका विधीज्ञ संघटना, विविध शासकीय आणि सामाजिक संस्था, जिल्हा विधी सेवा प्राधिकरण सदस्य, अधिकारी, कर्मचारी यांचे सहकार्य लाभले, असे जिल्हा विधी सेवा प्राधिकरणाच्या सचिव श्रीमती पाटील यांनी कळविले आहे.

पुणे–

शाळेत व्यावसायिक भागिदारी देण्याच्या मुद्यावरून एका महिलेची तब्बल 1 कोटी 17 लाख रुपयांची फसवणूक केल्याची घटना पुण्यात घडली आहे. या प्रकरणी महिला प्राचार्यासाह 3 जणांवर आर्थिक फसवणुकीचा गुन्हा दाखल करण्यात आला आहे.

या प्रकरणी येरवडा पाेलिस ठाण्यात पुर्णिमा मिलिंद काेठारी (वय-63,रा.येरवडा, पुणे) यांनी आराेपी प्राचार्य शेफाली तिवारी, तन्मय शर्मा, राेहीत भार्गव (रा.वाघाेली, पुणे) यांचे विराेधात फिर्याद दाखल केली आहे. सदरचा प्रकार ऑगस्ट 2019 ते मार्च 2023 दरम्यान घडला आहे. पाेलिसांनी दिलेल्या माहितीनुसार, सी.पी.गाेयंका इंटरनॅशनल स्कुलच्या प्राचार्य शेफाली तिवारी यांनी त्यांची आयुष्मती नावाची ट्रस्ट असल्याचे तक्रारदार काेठारी यांना सांगितले. त्या ट्रस्टची कॅनरी हाय इंटरनॅशनल स्कुल चालविण्याबाबतच्या सर्व परवानगी त्यांच्याकडे असल्याचे भासवून आराेपी यांनी तक्रारदार यांना सदर ट्रस्टच्या नावाने कॅनरी हाय इंटरनॅशनल स्कुल सुरु करुन भागीदारी देऊ असे सांगितले.

त्यानुसार एक ते दाेन वर्षासाठी पैशांची गुंतवणूक करण्यास सांगून तक्रारदार यांचेकडून भागीदारीसाठी 1 काेटी 17 लाख 67 हजार रुपये घेण्यात आले. त्याप्रमाणे तक्रारदार व त्यांचा मुलगा हे दाेघे सदर शाळेत 70 टक्के भागीदार असताना, प्राचार्य तिवारी व त्यांच्या साथीदारांनी तक्रारदार यांना काेणत्याही प्रकारचा अधिकार शाळेत दिला नाही. तसेच शाळेच्या नावाने भागीदार असताना देखील बँक खात्यावर जमा हाेणारा विद्यार्थ्यांचा निधी व इतर कामांचा निधी स्वत:च्या फायद्याकरिता वापरुन शाळा बंद हाेण्यास कारणीभूत ठरल्या. त्याचप्रमाणे तक्रारदार हे शाळा बंद हाेण्यास कारणीभूत असल्याचे विद्यार्थ्यांचे पालकांना सांगून त्यांची नाहक बदनामी केल्याचा प्रकार घडला आहे. याप्रकरणी कलम 156 (3) नुसार न्यायालयाचे आदेशाने याबाबत पाेलिसांनी गुन्हा दाखल केला आहे. याबाबत पुढील तपास येरवडा पाेलिस करत आहेत.

पुणे -मोठ्या हौसेने पत्नीला जेवणासाठी हाॅटेल बझुकामध्ये नेलेल्या पतीने हॉटेलमधील भांडणात महिलांपुढे अश्लील शिवीगाळ न करण्याची सूचना केली आणि भांडणे करणाऱ्या टोळक्याने या पतीच्या डोक्यात बिअरची बाटली फोडल्याची घटना घडली आहे. यावेळी या टोळक्याने घटनास्थळी आरडाओरडा करून दहशत पसरवण्याचा प्रयत्न केला.एकंदरीत अशा परिस्थिती पुण्यात सहकुटुंब हॉटेल वारी आता काळजीपूर्वक बाब ठरणार आहे

याप्रकरणी मुंढवा पाेलिस ठाण्यात मंगेश तांबे , अक्षय गागडे व गाेट्या (पूर्ण नाव माहिती नाही) यांच्या विराेधात गुन्हा दाखल करण्यात आला आहे. याबाबत आराेपी विराेधात भैरवनाथ बाबुराव साळुंखे (36,रा.मुंढवा राेड,पुणे) यांनी पाेलिसांकडे तक्रार दाखल केली आहे. पाेलिसांनी दिलेल्या माहितीनुसार, तक्रारदार भैरवनाथ साळुंखे हे त्यांच्या पत्नीसह मुंढवा परिसरात धायरकर वस्ती याठिकाणी हाॅटेल बझुकामध्ये जेवणासाठी गेले हाेते. त्यावेळी सदर आरोपी हाॅटेलचे बील देण्याच्या मुद्यावरून हाॅटेल मॅनेजरशी वाद घालून अश्लील शिवीगाळ शिवीगाळ करत हाेते. त्यामुळे तक्रारदार साळुंखे यांनी त्यांना महिलांचा दाखला देत शिवीगाळ करु नका असे सांगितले. त्याचा राग धरून त्यांनी तक्रारदाराच्या डोक्यात थेट बिअरची बाटली घातली.

त्यानंतर तीच बाटली हवेत फिरवून हॉटेलमध्ये आरडाओरडा केला. यामुळे हॉटेलमध्ये आलेले ग्राहक व हॉटेलच्या कर्मचाऱ्यांमध्ये भीतीचे वातावरण तयार झाले. या प्रकरणी पुढील तपास सहाय्यक पाेलिस निरीक्षक आर व्ही महानाेर 9923406097करत आहेत.