पुणे दि. २२ : विधान परिषदेच्या बद्दल तांत्रिक माहिती चुकीचे सांगून हेतुपुरस्सर आरोप केले अश्या व्यक्तींच्या विरुद्ध त्यांच्याकडून दिलगिरी व्यक्त न झाल्यास हक्कभंग दाखल करून घेण्यात येईल अशा प्रकारे देखील निर्णय झाले. फारसे कामकाज तहकूब न होता अधिवेशनाच्या निमित्ताने सुसंवाद, वेळेचे नियोजन, त्याचबरोबर समाजातील सर्व प्रश्नांचे प्रतिबिंब विधिमंडळात पडावं या दृष्टीने डॉ.गोऱ्हे यांनी केलेल्या प्रयत्नांना चांगल्या प्रकारचे यश मिळाले. या कामांमध्ये सर्वच पक्षाच्या विधान परिषदेचे नेते, प्रतोद सर्व सदस्यांचे चांगले सहकार्य मिळाले. त्याचबरोबर माननीय मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजितदादा पवार, संसदीय कार्यमंत्री चंद्रकांतदादा पाटील यांचे चांगल्या प्रकारचे सहकार्य मिळाले असे प्रतिपादन डॉ.गोऱ्हे यांनी पुणे येथील सिल्व्हर रॉक्स या निवासस्थानी झालेल्या पत्रकार परिषद केले.

यावेळी उपसभापती डॉ. नीलम गोऱ्हे यांनी सांगितले की, नागपूरच्या हिवाळी अधिवेशनामध्ये कामकाज चांगल्या प्रकारे झाले. यामध्ये,

• अवकाळी पाऊस,
• मराठा आरक्षण,
• दुष्काळाची परिस्थिती तसंच अमलीपदार्थांच्या मुळे झालेली महाराष्ट्राची हानी,
• प्रचंड गुन्हेगारांचा उच्छाद,
• तुळजाभवानीचे दागिने चोरीला जाणं त्याच्यावरती ताबडतोब आरोपींना अटक करण्याचे दिलेले निर्देश,
• दुष्काळ सदृश परिस्थितीवरती आणि आवर्षणाच्या परिस्थिती वरती झालेली शासकीय अधिकाऱ्यांच्या बरोबर सामाजिक संस्थांच्या भरणाच्या बैठक,
• अल्पवयीन मुलींचे कलाकेंद्र वरती जो वापर होतो तो रोखण्यासाठी घेतलेली मराठवाडा स्तरीय बैठक,
• ⁠नंदुरबार जिल्ह्यातल्या आरोग्य विषयक प्रश्नांबद्दल घेतलेली उच्चस्तरीय बैठक,
• ⁠सिंधुदुर्ग जिल्ह्यातील मेडिकल कॉलेज आणि हॉस्पिटलच्या प्रश्नांच्या संदर्भात घेतलेली बैठक अशा अनेक बैठक देखील विधान परिषदेची उपसभापती या नात्याने मी घेतल्या.
• तळवडे, पिंपरी चिंचवड, पुणे येथील दि.०८ डिसेंबर, २०२३ रोजी आग दुर्घटना स्थळी भेट दिलेला अहवाल मा.मुख्यमंत्री, मा.उपमुख्यमंत्री यांना उपसभापती डॉ.नीलम गोर्‍हे यांनी दि.११ डिसेंबर, २०२३ सादर केला.

या सगळ्या दहा दिवसांच्या काळामध्ये ४७ लक्षवेधी, तसेच १४ विधेयके, १३३ विशेष सूचना आणि ३ अल्पकालीन चर्चा याच्यावरती तपशीलवार चर्चा झाली. साधारणपणे ९४.५५% उपस्थिती आमदारांची होती आणि गोंधळापेक्षा संवाद आणि निर्णय स्वरूपाची सरकारकडून आलेले उत्तर त्याच्यामुळे आपला अधिकाधिक कामकाज व्हावं त्या दृष्टिकोनातून सगळेच विधान परिषदेचे सदस्य त्यांनी बराच वेळ या कामकाजासाठी दिला.

विदर्भात अधिवेशन असल्यामुळे विदर्भातल्या परिस्थितीच्याबद्दलचा एक प्रस्ताव देखील सत्ताधारी पक्षाने लावला होता त्याच्यावर देखील चर्चा झाली. त्याचबरोबर कायदा सुव्यवस्थेचे प्रश्न, शिक्षणाचे प्रश्न, महिलांचे प्रश्न, पर्यावरण विषयक प्रदूषणाचे प्रश्न, आरोग्याचे प्रश्न अशा अनेक विविध अंगीच्या भूमिकातून चर्चा झाली. त्याच्यावरती चांगल्या प्रकारे उत्तरे देखील मिळाली.

लोक आयुक्त विधेयक संयुक्त चिकित्सा समितीकडे जाऊन मंजूर झालं हे जसं अत्यंत महत्त्वाचा आहे. त्याचबरोबर कॅसिनो रद्द करण्याच्या बद्दलचा विधेयक मांडून ते पाठीमागे घेण्यात आलं हे देखील एक महत्त्वाचे घटना म्हणायला हरकत नाही. त्याच्या खेरीज उच्चतंत्र शिक्षण विद्यापीठा विषयक विधेयके, जमिनीचा गैरवापर होत असेल तर मग महसूल विभागाने हस्तक्षेप करून स्वतःहा मोहीम हाती घेणे अशा प्रकारचे विधेयक आणले व याच्याबद्दल चर्चा झाली.

विधानपरिषदेचा शतक महोत्सवी कार्यक्रम असल्यामुळे नागपूरमध्ये हिवाळी अधिवेशनात आतापर्यंत ज्यांनी- ज्यांनी वार्तांकन केले आहे, त्या ज्येष्ठ पत्रकारांचा सत्कार आणि त्यांचे मनोगत माननीय मुख्यमंत्री एकनाथ शिंदे, उपमुख्यमंत्री देवेंद्र फडणवीस, संसदीय कार्य मंत्री चंद्रकांतदादा पाटील यांच्या उपस्थितीमध्ये करण्यात आले. हा कार्यक्रम देखील विशिष्ट प्रकारचा झाला.

याखेरीज लोकसभा निवडणुकीमध्ये किंबहुना लोकसभा आणि विधानसभा निवडणूकमध्ये महिलांना आरक्षण याच्यावरती राष्ट्रकुल संसदीय मंडळाच्या परिषदेत उपसभापती डॉ.नीलम गोऱ्हे यांनी मत मांडले.

वेगवेगळ्या ठिकाणी भेटीगाठी आणि चर्चा याच्यात तसेच विविध बैठकांमध्ये डॉ.गोऱ्हे सहभागी झाल्या. त्यातून राहिलेले जे प्रश्न आहेत, ज्या प्रश्नावरती काही तसा तोडगा निघालेला नाही. त्याच्याबद्दल सुद्धा बैठका घेऊन त्याचा पाठपुरावा करण्याचा निर्णय झाला.

विरोधी पक्ष नेत्यांना बोलू दिले जात नाही अशी ही टीका होते. त्याच्यावरती जर काही 10 दिवसातले वेळ मोजला कमीत-कमी सहा तास विधान परिषदेचे विरोधी पक्ष नेते यांनी विविध विषयांच्या मध्ये भाषण केलेले आहे. हे जर पाहिलं तर सरासरी कामकाजाचा तुलने मध्ये जवळजवळ पाऊण दिवस एकटेच्या कामकाजावरती खर्च झाला हे देखिल याच्यामध्ये स्पष्ट होत आहे.

राज्याचे आगामी अर्थसंकल्पीय अधिवेशन मुंबई येथे २६ फेब्रुवारी, २०२४ रोजी होणार असल्याचे उपसभापती डॉ. गोऱ्हे यांनी सांगितले.

 ‘व्यापार क्षेत्रातील आधुनिकतेचा राजमार्ग डिजिटल मार्केटींग आणि आर्टिफिशियल इंटेलिजन्स’ या विषयावरील सेमिनार
पुणे : डिजिटल युगात पुण्यातील व्यापाऱ्यांनी एकत्र येण्याची गरज आहे. दुसऱ्या व्यापाऱ्याला आपला स्पर्धक समजू नका, तुमची स्पर्धा ॲमेझॉन सोबत आहे. यासाठी  व्यापाऱ्यांनी एकत्र येऊन मॉल तयार करा.  जागतिक पातळीवर पोहोचण्यासाठी आधुनिक तंत्रज्ञानाचा वापर करा. जितक्या लवकर डिजिटल युगातील तेवढे व्यापाऱ्यांसाठी चांगले आहे. तुळशीबाग हा ब्रँड खूप मोठा आहे. डिजिटल मार्केटिंग च्या माध्यमातून त्याला जागतिक पातळीवर पोहोचवा, असे मत संगणक तज्ञ दीपक शिकारपूर यांनी व्यक्त केले.

स्टेशनरी, कटलरी अँड जनरल मर्चंटस् असोसिएशन, तुळशीबाग व्यापारी असोसिएशन,लायन्स क्लब ऑफ शिवाजीनगर भाजपा कसबा मतदार संघ व्यापारी आघाडी यांच्या संयुक्त विद्यमाने व्यापार क्षेत्रातील आधुनिकतेचा राजमार्ग डिजिटल मार्केटींग आणि आर्टिफिशियल इंटेलिजन्स या विषयावरील सेमिनारचे आयोजन करण्यात टिळक रस्त्यावरील नीतू मांडके सभागृहात करण्यात आले होते.

यावेळी संगणक तज्ञ डाॅ.दीपक शिकारपूर, कृत्रिम बुद्धिमत्तेचे अभ्यासक अमेय पांगारकर यांचे व्याख्यान झाले. यावेळी नितीन पंडित, सचिन जोशी, जीवन हेंद्रे, मदनसिंग रजपूत, संजय मुनोत, संजीव फडतरे, विकास पवार, चकोर सुगंध, किरण चव्हाण, राजेश शिंदे उपस्थित होते.

दीपक शिकारपूर म्हणाले, व्यापाऱ्यांनी ग्राहकांची माहिती संकलित करा. माहिती संकलन केल्याने तुम्ही व्यापारात क्रांती करू शकता. हे वैयक्तिक पातळीवर देखील व्हायला पाहिजे. आजचा काळ हा तंत्रज्ञानाचा आहे प्रत्येकाच्या हातात स्मार्टफोन असतो, परंतु त्याच्या आहारी जाऊ नका. आठवड्यातील एक दिवस डिजिटल डिटॉक्स करा.

स्मार्टफोन वापरात भारत जगामध्ये पहिल्या क्रमांकावर आहे. सगळे काही डिजिटल होत असताना आपण त्यापासून लांब राहू शकत नाही, परंतु त्याच्या आहारी देखील जाऊ नये. तुळशीबाग आणि लक्ष्मी रोडवर व्यवहार करणे हा अनुभव असतो या गोष्टी चा आहे अनुभव ऑनलाईन मिळू शकत नाही. पारंपारिक व्यवसाय तंत्रज्ञानाने मोठा करता येतो असे त्यांनी सांगितले.

डॉ.अमेय पांगारकर म्हणाले, आर्टिफिशियल इंटेलिजन्स हे फार पूर्वीपासून अस्तित्वात आहे. ए आय तंत्रज्ञान वापरण्यात भारताचा जगात दुसरा क्रमांक येतो. बेंगलोर आणि पुण्यामध्ये सर्वाधिक एआय टूल्स वापरण्यात येतात. व्यापाऱ्यांनी आपला व्यापार मोठा करण्यासाठी एआय तंत्रज्ञानाचा वापर करायला सुरुवात केली पाहिजे.

मंगळवारपासून गोल्डन कार्डसाठी पॅनलवरील रुग्णालयात विशेष मोहीम-जिल्हाधिकारी डॉ.राजेश देशमुख

पुणे दि. २२- जिल्हाधिकारी डॉ.राजेश देशमुख आणि आयुष्मान भारत मिशन महाराष्ट्र समितीचे प्रमुख डॉ.ओमप्रकाश शेटे यांच्या उपस्थितीत जिल्हाधिकारी कार्यालयात विकसित भारत संकल्प यात्रा २०२३ अंतर्गत आयुष्मान भारत, महात्मा ज्योतिबा फुले जनआरोग्य योजना, राष्ट्रीय बाल स्वास्थ्य कार्यक्रम आणि राष्ट्रीय आरोग्य अभियानातील पायाभुत सुविधांच्या आढावा बैठकीचे आयोजन करण्यात आले.

आयुष्मान भारत योजनेअंतर्गत राज्यातील एकही पात्र लाभार्थी आरोग्य उपचारापासून वंचित राहणार नाही यासाठी आरोग्य यंत्रणेसोबत इतर संबंधित शासकीय यंत्रणांनी गोल्डन कार्ड नोंदणी व प्रत्यक्ष लाभार्थ्यांना वितरण प्रक्रिया गतिमान पद्धतीने राबवावी. या योजनेचा लाभ प्रत्येक लाभार्थ्यांच्या होईल यादृष्टीने प्रयत्न करावे, असे आवाहन आयुष्मान भारत मिशन महाराष्ट्र समितीचे प्रमुख डॉ.ओमप्रकाश शेटे यांनी केले. मंगळवारपासून गोल्डन कार्डसाठी पॅनलवरील रुग्णालयात विशेष मोहीम सुरू करण्याचे निर्देश जिल्हाधिकारी डॉ.राजेश देशमुख यांनी दिले.

बैठकीस जिल्हा शल्य चिकित्सक डॉ. नागनाथ येमपल्ले, जिल्हा आरोग्य अधिकारी डॉ.सचिन देसाई , क्षेत्रीय व्यवस्थापक डॉ. अमोल मस्के, आयुष्मान भारत योजनेच्या जिल्हा समन्वयक डॉ. प्रिती लोखंडे आदी उपस्थित होते.

डॉ. शेटे म्हणाले, आयुष्मान भारत योजनेअंतर्गत संपूर्ण देशभरात गरजू लाभार्थ्यांची नोंदणी करून त्यांना गोल्डन कार्ड वितरीत करून देण्याबाबत मोहीम सुरू आहे. याद्वारे रुग्णांना त्यांच्या जवळच्या रुग्णालयात आरोग्य उपचारांच्या सुविधा उपलब्ध करून देण्यासाठी शासन प्रयत्नशील आहे. योजनेचा लाभ रुग्णांना देण्यासाठी त्यांना गोल्डन कार्ड देणे आवश्यक असल्याने कार्ड नोंदणीसाठी विशेष प्रयत्न करावेत. हे कार्ड लाभार्थ्यांना दिल्याशिवाय योजनेचा लाभ त्याला देता येणार नाही.

गोल्डन कार्ड नोंदणी आणि वितरणासाठी विशेष नियोजन करावे. महापालिका क्षेत्रात कार्डची नोंदणी कमी असल्याने महापालिकेने गोल्डन कार्डची संख्या वाढविण्यासाठी सूक्ष्म नियोजन करावे, या कामाचा दैनंदिन आढावा घ्यावा. धार्मिकस्थळाच्या ठिकाणी मोहिमेसाठी देवस्थान व्यवस्थापनाची मदत घ्यावी, असेही त्यांनी सुचित केले.

जिल्हाधिकारी डॉ.देशमुख यांनी आयुष्मान भारत योजनेअंतर्गत लाभार्थ्यांची नोंदणी करून घेण्यासाठी करण्यात येत असलेल्या उपाययोजनांची माहिती दिली. संबंधित यंत्रणांनी या कामाला विशेष प्राधान्य द्यावे. सीएसई केंद्रांनी या योजनेच्या कामांच्या प्रगतीबाबत दररोजचा अहवाल सादर करावा आणि गोल्डन कार्ड नोंदणीच्या कामाला गती द्यावी.

पॅनलवरील रुग्णालयांनी गोल्डन कार्ड काढण्यासाठी स्वतंत्र सुविधा उपलब्ध करून द्यावी. अधिकाधिक लोकसहभाग घेतांना चांगले काम करणाऱ्या गाव पातळीवरील कर्मचाऱ्यांचा प्रत्येक आठवड्यात सन्मान करावा. चांगले काम करणाऱ्या गावांना जिल्हा परिषदेमार्फत पुरस्कार घोषित करावे, अशा सूचना त्यांनी दिल्या.

प्रारंभी आयुष्मान भारत योजनेच्या डॉ.लोखंडे यांनी या योजनेअंतर्गत जिल्ह्यात केलेल्या कामाची माहिती सादर केली. पुणे जिल्ह्यात आयुष्मान भारत योजना आणि महात्मा ज्योतिराव फुले जनआरोग्य योजनेअंतर्गत ३८ लाख ५४ हजार लाभार्थ्यांपैकी ९ लाख ५ हजार लाभार्थ्यांना गोल्डन कार्ड वितरित करण्यात आले आहेत. गेल्या महिन्याभरात मोहीम स्तरावर १ लाख ६४ हजार कार्ड वितरित करण्यात आले. विकसित भारत संकल्प यात्रेद्वारे या मोहिमेला वेग देण्यात आला आहे, अशी माहिती डॉ.लोखंडे यांनी दिली.

बैठकीस आरोग्य विभागाचे अधिकारी व जिल्ह्यातील खाजगी रुग्णालयाचे प्रतिनिधी उपस्थित होते.

जाधवर ग्रुप आॅफ इन्स्टिटयूटतर्फे ७ व्या जाधवर फेस्टिव्हलमध्ये १६ हजार विद्यार्थ्यांचा सहभाग
पुणे : स्त्रियांवर होणारे अत्याचार थांबवा… आई-वडिल, आजी-आजोबा असा एकत्र कुटुंबाचा नात्यामधील गोडवा टिकवा… अशा सामाजिक संदेशांसह देशासाठी लढणा-या जवानांप्रती कृतज्ञता व्यक्त करण्यासोबत विविध विषयांसंबंधी विद्यार्थ्यांनी नाट्य – नृत्यातून विद्यार्थ्यांनी जनजागृती केली. विविध नाटयगीते, बालगीते आणि चित्रपटगीतांच्या माध्यमातून सादर केलेल्या नृत्याविष्काराने  बालचमूंच्या रुपात प्रत्यक्ष तारे जमीन पर अवतरले. महाराष्ट्रीय संस्कृतीसह भारतातील वैविध्यपूर्ण संस्कृती व वेशभूषेचे दर्शन घडवित विद्यार्थ्यांनी विविधतेतून एकतेचा संदेश दिला. 
न-हे येथील जाधवर ग्रुप आॅफ इन्स्टिटयूटच्या ७ व्या जाधवर फेस्टिव्हलमध्ये संस्थेतील विद्यार्थ्यांनी विविध नृत्यरचना व नाटिका सादर केल्या. यावेळी अभिनेते सिद्धेश्वर झाडबुके, अशितोष वाडेकर, मिलिंद दास्ताने, विजय पटवर्धन, अमीर तडवळकर, हेमांगी कवी, सुरेखा कुडची यांसह संस्थेचे प्राचार्य डॉ.सुधाकर जाधवर, उपाध्यक्ष अ‍ॅड. शार्दुल जाधवर, खजिनदार सुरेखा जाधवर व शाळांचे मुख्याध्यापक शिक्षक, पदाधिकारी, कर्मचारी उपस्थित होते. 
रंगीबेरंगी पोषाखात आपल्या निरागस नृत्यशैलीने बच्चे कंपनीने उपस्थितांची मने जिंकली. स्नेहसंमेलनात १६ हजारहून अधिक विद्यार्थ्यांनी सहभाग घेत आपली कला सादर केली. भारतातील विविध राज्यांमधील संस्कृतीचे दर्शन आपल्या कलाविष्कारातून सादर करण्यासोबतच विविध सामाजिक विषयांवरील नाटिकाही संमेलनात सादर करण्यात आल्या. 
फेस्टिव्हलमध्ये प्राचार्य डॉ.सुधाकरराव जाधवर कला व वाणिज्य महाविद्यालय, शार्दुल सुधाकरराव जाधवर वाणिज्य व विज्ञान महाविद्यालय, प्रा.डॉ.सुधाकरराव जाधवर प्राथमिक व माध्यमिक विद्यालय, इन्स्टिटयूट आॅफ नर्सिंग, पॅराडाईज ज्युनियर कॉलेज, पॅराडाईज इंग्लिश मिडियम स्कूल, जाधवर इंटरनॅशनल स्कूल, प्रा.डॉ.सुधाकरराव जाधवर प्राथमिक व माध्यमिक विद्यालय इंद्रप्रस्थ, पॅराडाईज किडस्, जाधवर इंग्लिश मिडियम स्कूल अ‍ँड ज्युनियर कॉलेज, आदित्य इन्स्टिटयूट आॅफ मॅनेजमेंट, प्रा.डॉ.सुधाकरराव जाधवर विज्ञान महाविद्यालय या संस्थेतील विद्यार्थ्यांनी सहभाग घेतला.

पुणे-भारतीय संसद ही देशाची सर्वोच्च संस्था आहे. हिवाळी अधिवेशन सुरू असताना संसद भवनाची सुरक्षा भेदून दान तरूणांनी लोकसभेमध्ये स्मोक हल्ला केला. ही घटना राष्ट्रीय सुरक्षेच्या दृष्टीने अतिशय गंभीर स्वरूपाची असून आणि केंद्रिय गृहमंत्री यांनी केंद्र शासनाची भूमिकेबाबत स्पष्ट निवेदन करावे, अशी मागणी करणाऱ्या विरोधी पक्षाच्या १४२ खासदारांचे भाजप सरकारने निलंबन केले आहे याच्या निषेधार्थ पुणे शहर जिल्हा काँग्रेस कमिटीच्या वतीने व इंडिया आघाडीतील काही घटक पक्षाच्या उपस्थितीमध्ये शहराध्यक्ष अरविंद शिंदे यांच्या नेतृत्वाखाली आज जिल्हाधिकारी कार्यालय पुणे येथे केंद्रातील भाजप सरकार विरोधात निषेध आंदोलन घेण्यात आले.यावेळी माजी न्यायमूर्ती बी. जे. कोळसे पाटील, माजी गृहमंत्री रमेश बागवे, माजी आमदार मोहन जोशी, अनंत गाडगीळ, दिप्ती चवधरी, संगीता तिवारी, आप पक्षाचे सुदर्शन जगदाळे आदींची भाषणे झाली.

     यावेळी केंद्र सरकारच्या विरोधात जोरदार घोषणाबाजी करण्यात आली. त्यानंतर कार्यकर्त्यांना मार्गदर्शन करताना काँग्रेस शहराध्यक्ष अरविंद शिंदे म्हणाले की, ‘‘संविधानाची पायमल्ली करून लोकशाही पध्दतीने निवडून आलेल्या १४२ खासदारांचे निलंबन हे देश अराजकतेकडे नेण्याचे लक्षण आहे. विरोधी पक्षाच्या खासदारांचे भाजप सरकारने केलेले निलंबन हा एक लोकशाहीवरील अभूतपूर्व हल्ला असून ही एक प्रकारे लोकशाही तत्वांची नग्न हत्या आहे. तसेच लोकशाहीला स्मशान बनविण्याचे काम भाजपकडून सातत्याने होताना दिसत आहे. त्यामुळे लोकशाहीच्या या अपमानाच्या विरोधात व आगामी काळात आपल्याला संविधान अबाधित ठेवायचे असेल तर आता आपल्याला पहिल्यापेक्षा जास्त ताकतीने एकत्रितपणे भाजप सरकारला कडाडून विरोध करण्याशिवाय गत्यंतर नाही अन्यथा हे RSS प्रणित भाजप सरकार लोकशाहीचा मुडदा पाडल्याशिवाय स्वस्थ बसणार नाही’’

     यावेळी माजी आमदार बाळासाहेब शिवरकर, कमल व्यवहारे, अविनाश बागवे, लता राजगुरू, सुजाता शेट्टी, राजेंद्र भुतडा, मेहबुब नदाफ, महिला अध्यक्ष पुजा आनंद, प्रियंका रणपिसे, संगीता पवार, द. स. पोळेकर, ब्लॉक अध्यक्ष सुजित यादव, विशाल जाधव, अक्षय माने, रमेश सोनकांबळे, हेमंत राजभोज, संतोष पाटोळे, दिलीप तुपे, अजित जाधव, विजय खळदकर, मेहबुब नदाफ, समिर शेख, प्रकाश पवार, शिलार रतनगिरी, आशुतोष शिंदे, सुंदरा ओव्हाळ, सिमा सावंत, सोनिया ओव्हाळ, छाया जाधव, ॲड. अश्विनी गवारे, ज्योती परदेशी, नलिनी दोरगे, वाल्मिक जगताप, अभिजीत महामुनी, अविनाश अडसुळ, राज घेलोत, सुरेश चौधरी, रवि ननावरे, सीमा महाडिक, कृष्णा सोनकांबळे, सचिन सावंत आदींसह असंख्य कार्यकर्ते उपस्थित होते.

 आंदोलनाचे सूत्रसंचालन सुजित यादव यांनी केले तर आभार विठ्ठल गायकवाड यांनी मानले. 

आम आदमी पार्टीने दिली १८ बोगस अभियंत्यांची नावे आणि २ वर्षे आयुक्त कारवाई ऐवजी त्यांना संरक्षण देत असल्याचा केला आरोप

पुणे- जे आर एन राजस्थान विद्यापीठाच्या दूरस्थ पद्धतीने अभियांत्रिकी पदविका मिळवल्याची बोगस प्रमाणपत्रे सादर करून महापालिकेच्या वेगवेगळ्या खात्यात तब्बल ४२ बोगस अभियंते पालिकेत वावरत आहेत असा आरोप करत १८ बोगस अभियंते यांच्या नावानिशी माहिती दिलेली असताना महापालिका आयुक्त हे गेली २ वर्षे कारवाई न करता त्यांना संरक्षण देत असल्याचे म्हटले आहे. हे अभियंते प्रत्येकी १०/ १० लाख घेऊन तत्कालीन एका बड्या पदाधिकाऱ्याने लावल्याचा ही आरोप आम आदमी पार्टी चे विजय कुंभार ,डॉ . अभिजित मोरे ,घनश्याम मारणे,सर्फराज मोमीन यांनी केला आहे. या संदर्भात त्यांनी महापालिका आयुक्त आणि संबधितांना ४ पानी लेखी पत्र पुन्हा दिले आहे .

या पत्रात असे म्हटले आहे कि ,’
पुणे महानगरपालिकेत बोगस अभियंत्यांचा सुळसुळाट झाला असून तब्बल ४२ बोगस अभियंते पालिकेत वावरत आहेत. याबाबत आम आदमी पार्टीने पुणे मनपाबाहेर आंदोलने केली आहेत. आम आदमी पार्टी तर्फे डॉ अभिजित मोरे यांनी आपल्याशी वारंवार पत्रव्यवहार केलेला आहे. पोलिसांकडे तक्रार केली आहे. या प्रकरणाची तार तत्कालीन मनपा महापौर व भाजपचे अनेक नगरसेवक यांच्याशी जुडली आहे. त्यामुळेच गेली २ वर्षे मनपा आयुक्त हे त्यांच्यावर कारवाई करण्याऐवजी त्यांना संरक्षण देत आहेत असे आम्हाला खेदाने नमूद करावे लागत आहे.याबाबत कारवाई रोखण्यासाठी बोगस अभियंत्यांनी प्रत्येकी सुमारे १० लाख रुपये दिल्याची चर्चा दबक्या आवाजात केली जात आहे. करोडो रुपयांचा भ्रष्टाचार करून बोगस अभियंत्यांना पाठीशी घालत असल्याची चर्चा पसरली आहे. अशा चर्चांमुळे पुणे मनपाची बदनामी होत आहे. बोगस अभियंत्यांवर कारवाई करून ही बदनामी थांबवण्याची संधी आपणास आहे.

काल दिनांक २० डिसेंबर २०२३ रोजी मनपा आयुक्त विक्रम कुमार यांच्या कार्यालयीन परिपत्रक जावक क्र : मआ/ साप्रवि/ प्र. ३/ १००९५ या परिपत्रकामध्ये मनपातील कनिष्ट अभियंता (स्थापत्य ) या पदासाठी विहित शैक्षणिक अर्हता धारण करणाऱ्यामधून ८५ % पदे नामनिर्देशनाने तर १५% पदे मनपा कर्मचाऱ्यांतून (५ वर्षांचा अनुभव आवश्यक) परीक्षा घेऊन गुणवत्तेनुसार पदोन्नतीने भरणार आहेत असे नमूद केले आहे. माननीय आयुक्तांच्या या परिपत्रकासोबत जोडलेल्या परिशिष्ट ब मध्ये दिलेल्या ६० कर्मचाऱ्यांची परीक्षा दिनांक २८ जानेवारी २०२४ रोजी घेतली जाणार आहे.या यादीवर आम आदमी पार्टीचा आक्षेप असून या यादीतील १८ मनपा कर्मचाऱ्यांनी जे आर एन राजस्थान विद्यापीठ येथून दूरस्थ पद्धतीने अभियांत्रिकी पदविका मिळवल्याची बोगस प्रमाणपत्रे सादर केली आहेत. 

त्यांची नावे या पत्रात लेखी नमूद करण्यात आली आहेत .या शिवाय या पत्रात पुढे असे म्हटले आहे कि,’

पुणे मनपाच्या जावक क्रमांक- अतिमआ(ज)/साप्रवि/७६४१, दि. ३ डिसेंबर २०२१ पत्रातील प्रारूप सेवा जेष्ठता यादीतील या १८ मनपा कर्मचारी यांवर आम आदमी पार्टी तर्फे डॉ अभिजित मोरे यांनी वेळोवेळी लेखी आक्षेप नोंदवून त्यांची पदविका ही नियमबाह्य असल्याचे आपणास सप्रमाण दाखवून दिले आहे.
अभियांत्रिकी हा प्रात्यक्षिकासोबत पूर्ण वेळ करावयाचा कोर्स असल्याने दूरस्थ पद्धतीने तो शिकता येत नाही. AICTE ची मान्यता नसल्याने दूरस्थ शिक्षण पद्धतीने प्रदान केलेल्या अभियांत्रिकी पदवी, पदविका ह्या नियमबाह्य आहेत आणि त्याआधारे कोणतीही पदोन्नती, सरकारी नोकरी देऊ नये असा स्पष्ट निर्वाळा सर्वोच्च न्यायालय, उच्च न्यायालय यांनी दिलेला आहे. (Supreme Court of India – CIVIL APPEAL NOS. 17869-17870 /2017 (Arising out of Special Leave Petition (C) Nos.19807-19808/2012- ORISSA LIFT IRRIGATION CORP. LTD ……APPELLANTS VERSUS RABI SANKAR PATRO & ORS. ….RESPONDENTS); Punjab and Haryana High Court- CWP No.20430 of 2011 (O&M) and connected cases).  याबाबत AICTE, UGC यांची अनेक परिपत्रके आहेत.
एवढेच नव्हे तर  पिंपरी चिंचवड मनपाचे आयुक्त शेखर सिंह यांनी देखील अशा दूरस्थ शिक्षण पद्धतीने अभियांत्रिकी पदवी, पदविका घेतलेल्यांना नोकरी अथवा पदोन्नती देऊ नये असे आदेश काढले होते. पण विद्येचे माहेरघर म्हणवल्या जाणाऱ्या पुण्याच्या मनपामध्ये मात्र बोगस अभियंत्यांना पदोन्नती दिली जात आहे.आपल्याच कालच्या परिपत्रकातील “मान्यताप्राप्त विद्यापीठाची स्थापत्य अभियांत्रिकी शाखेची पूर्णवेळ पदवी / पदविका उत्तीर्ण असणे आवश्यक” ही विहित अट सदर १८ कर्मचारी पूर्ण करू शकत नाहीत. मग त्यांची परीक्षा पुणे मनपा का घेत आहे ?विहित शैक्षणिक अर्हता नसताना देखील अभियंते असल्याचे भासवून शासनाची फसवणूक केल्याबद्दल त्यांचे अर्ज आधीच बाद करून त्यांच्यावर फसवणुकीचा गुन्हा दाखल करायला हवा, बडतर्फीची कारवाई करायला हवी. पण मग तसे न करता या बोगस अभियंत्यांना पुणे मनपा पाठीशी का घालत आहे ? यामागे भारतीय जनता पार्टीचा व त्यांच्या सहकाऱ्यांचा राजकीय दबाव आहे का ? की याबाबत होत असलेल्या भ्रष्टाचाराच्या दबक्या चर्चेमध्ये खरंच तथ्य आहे ?

तरी, आपणास विनंती आहे की-

1. या परिपत्रकाच्या परिशिष्ट “ब” मधील परीक्षार्थींच्या यादीतून विहित शैक्षणिक अर्हता नसणाऱ्या व जे आर एन राजस्थान विद्यापीठातून दूरस्थ पद्धतीने अभियांत्रिकी पदविका घेतलेल्या वर नामनिर्देशित केलेल्या १८ मनपा कर्मचाऱ्यांची नावे वगळावीत. त्यांची कोणतीही परीक्षा घेऊ नये. त्यांच्यावर बडतर्फीची कारवाई करावी. फसवणुकीचा गुन्हा दाखल करावा.
2. दूरस्थ शिक्षणाद्वारे नियमबाह्य बोगस अभियंता पदविका प्रमाणपत्र सादर करून वर्ष २०१५, २०१८, २०१९, २०२१ यावर्षी महानगरपालिकेत प्रमोशनने अभियंता झालेल्या/ होऊ पाहणाऱ्या ४२ बोगस अभियंत्यांवर शासन निर्णय क्रमांक सीडीआर १०९३/ १०७७ प्र क्र २३/ ९३/ अकरा दिनांक १२- १०- १९९३ अनुसार सेवासमाप्ती / बडतर्फीची कारवाई करावी आणि फसवणूक, संघटीत कट, संगनमताने केलेला गुन्हा याबद्दल फौजदारी कारवाई करावी.
   
   डॉ अभिजीत मोरे यांनी या संदर्भात माय मराठीला सांगितले कि हे पत्र आम्ही आयुक्त विक्रम कुमार , अतिरिक्त आयुक्त रवींद्र बिनवडे, उपायुक्त सचिन इथापे यांना दिले आहे.