लोकसभा सार्वत्रिक निवडणूक पारदर्शी पद्धतीने पार पाडण्यासाठी प्रशिक्षण उपयुक्त ठरेल-जिल्हाधिकारी डॉ. राजेश देशमुख

पुणे, दि. २१ : लोकसभा सार्वत्रिक निवडणूक पारदर्शी पद्धतीने पार पाडण्यासाठी प्रशिक्षकांसाठी आयोजित करण्यात आलेले प्रशिक्षण अत्यंत उपयुक्त ठरेल, असा विश्वास जिल्हाधिकारी तथा जिल्हा निवडणुक अधिकारी डॉ. राजेश देशमुख यांनी व्यक्त केला. निवडणूक कामासाठी नियुक्त असलेल्या सर्व अधिकाऱ्यांनी त्यांची जबाबदारी नियमानुसार आणि चोखपणे बजवावी, अशी अपेक्षाही त्यांनी व्यक्त केली.

आगामी लोकसभा सार्वत्रिक निवडणुकांसाठी पुणे विभागातील मतदार नोंदणी अधिकारी, सहायक मतदार नोंदणी अधिकारी यांच्यासाठी आयोजित करण्यात आलेल्या प्रशिक्षणाच्या उद्घाटन प्रसंगी ते बोलत होते. यावेळी उपजिल्हा निवडणूक अधिकारी मिनल कळसकर यांच्यासह पुणे महसूल विभागातील पुणे, सातारा, सोलापूर, सांगली आणि कोल्हापूर जिल्ह्यातील मतदार नोंदणी अधिकारी, सहायक मतदार नोंदणी अधिकारी आदी उपस्थित होते.

डॉ. देशमुख म्हणाले, लोकसभा सार्वत्रिक निवडणूकीचे काम अत्यंत महत्वाचे असून आचारसंहितेचे पालन करण्याची मोठी जबाबदारी या कालावधीत पार पाडावी लागते. यासाठी निवडणूक आयोगाचे कायदे आणि मार्गदर्शक तत्वे मार्गदर्शक आहेत. त्यांनी जारी केलेल्या नियम पुस्तीका आणि परिपत्रकांचे काळजीपूर्वक वाचन करुन नियमांची निटपणे अंमलबजावणी करावी. आयोगाच्या निर्देशांची सातत्याने माहिती घेवून त्यांचा अभ्यास करावा. निवडणूकीच्या कामात कोणतीही चूक अपेक्षित नाही. निवडणूकीच्या कामात दस्तऐवजीकरण खूप महत्वाचे असून त्याचे काम प्राधान्याने आणि गांभिर्याने करावे.

भारत निवडणूक आयोगाच्या हस्तपुस्तीकांमध्ये ‘काय करावे’ आणि ‘काय करू नये’ या बाबींचा उल्लेख केला आहे. त्यापैकी काय करू नये याची जाणिवपूवर्क वारंवार उजळणी करावी. यापुर्वी चुकीच्या घटना घडल्या आहेत त्याची पुनरावर्ती होणार नाही याची दक्षता घ्यावी. राजकीय पक्षांची प्रत्येक आठवड्याला बैठक घ्यावी. मतदार यादीतील १०० वर्षाच्या पुढच्या प्रत्येक मतदाराची पडताळणी करावी. निवडणूक विषयक दस्तऐवजांचे निटपणे संकलन आणि जतन करण्यात यावे.

निवडणूकीदरम्यान चुकीच्या पद्धतीने मतदान होणार नाही याकडे लक्ष असणे गरजेचे आहे. पुणे जिल्ह्यात खुप मोठ्या प्रमाणात नव मतदारांची नोंदणी झाली आहे. पोस्ट कार्यालयाकडून पोस्टाने मतदान ओळखपत्र पाठविण्यात येते. पाठवलेले मतदान ओळखपत्र मतदारांना भेटणे आवश्यक असून ते परत येता कामा नये. ५ जानेवारी २०२४ ला मतदान यादी प्रसिद्ध करण्यात येणार आहे. त्यापूर्वी मतदार यादीची पडताळणी करावी. निवडणूकीच्या सर्व पीपीटी मानक स्वरूपात आहेत, त्याचा अभ्यास करावा.

येत्या २९ फेब्रवारी पर्यंत जिल्ह्यात ईव्हीएम प्रात्याक्षिक जनजागृती मोहीम राबवण्यात येत आहे. जनजागृतीच्या प्रत्येक ठिकाणी प्रात्याक्षिकाचे फलक लावावेत आणि नागरिकांना यात सहभागी करून घ्यावे. या प्रशिक्षणाचा सर्व अधिकाऱ्यांनी चांगला फायदा करून घ्यावा, असे आवाहनही त्यांनी यावेळी केले.

प्रशिक्षणात उमेदवारांची निवडणूकीसाठी अर्ज भरण्यासाठी पात्रता, नामांकन फार्म भरणे, उमेदवारांचे शिक्षणाची अर्हता, वैधानिक पात्रता, अपात्रता, अर्जाची छाननी, उमेदवारांचे शपथपत्र, उमेदवारांची गुन्हेगार पार्श्वभूमी असतांना नियमानुसार घ्यावयाची काळजी, अर्ज मागे घेणे, जिल्हा निवडणूक व्यवस्थापन, खर्च व्यवस्थापन, मतदान केंद्र व्यवस्थापन, मनुष्यबळ व्यवस्थापन, प्रशिक्षण व्यवस्थापन, अतिसंवेदनशिल मतदान केंद्राचे निकष, मतदान साहित्य व्यवस्थापन, निवडणूक निर्णय अधिकारी, सहायक निवडणूक अधिकारी यांची कर्तव्य आदी विविध विषयांवर प्रशिक्षण देण्यात आले.

पुण्यातील ‘युरोकूल’मध्ये पर्यायी ‘रिझूम थेरपी’ यंत्र दाखल; प्रख्यात युरॉलॉजिस्ट डॉ. संजय कुलकर्णी यांची माहिती
पुणे : प्रोस्टेट ग्रंथीच्या पारंपारिक शस्त्रक्रियेला फाटा देत शस्त्रक्रिया विना प्रोस्टेट ग्रंथीवर उपचार करण्याची सुविधा भारतात पहिल्यांदाच उपलब्ध झाली आहे. अवघ्या १० मिनिटात कोणत्याही त्रासाशिवाय प्रोस्टेट ग्रंथावर उपचार करणारे ‘रिझूम थेरपी’ तंत्रज्ञान पुण्यातील बाणेरस्थित युरोकुल-कुलकर्णी युरो सर्जरी इन्स्टिट्यूटमध्ये दाखल झाले आहे. हे तंत्रज्ञान भारतात तेही पुण्यात पहिल्यांदाच आणले आहे, याचा आनंद वाटतो, असे ‘युरोकुल’चे संस्थापक व युरॉलॉजिकल सोसायटी ऑफ इंडियाचे अध्यक्ष, प्रख्यात युरॉलॉजिस्ट डॉ. संजय कुलकर्णी यांनी सांगितले.  

‘रिझूम थेरपी’ यंत्राद्वारे पहिल्या रुग्णावर यशस्वी उपचार केल्यानंतर डॉ. संजय कुलकर्णी यांनी रुग्णांसह पत्रकार परिषदेत ही माहिती दिली. बाणेर येथील युरोकुल रुग्णालयात झालेल्या या पत्रकार परिषदेला देशातील पहिल्या महिला लॅप्रोस्कोपी तज्ज्ञ डॉ. ज्योत्स्ना कुलकर्णी, युरॉलॉजिस्ट डॉ. पंकज जोशी, बाणेर-बालेवाडी मेडिकोज असोसिएशनचे अध्यक्ष डॉ. राजेश देशपांडे, रेडिओलॉजिस्ट डॉ. साकेत पटवर्धन, युरोकुलचे मुख्य कार्यकारी अधिकारी डॉ. अभय चौधरी, प्रशासकीय अधिकारी डॉ. प्रमोद भावे यांच्यासह रुग्ण व यंत्र पुरवणाऱ्या टीमची यावेळी उपस्थिती होती.

डॉ. संजय कुलकर्णी म्हणाले, “प्रोस्टेट ग्रंथींवरील पारंपरिक शस्त्रक्रियेला ‘ट्रांसूरेथ्रल रिसेक्शन ऑफ द प्रोस्ट्रेट’ (टीयूआरपी – TURP) म्हणून ओळखले जाते. यामध्ये रुग्णाला साधारण दोन ते तीन दिवस रुग्णालयात राहावे लागते. ही शस्त्रक्रिया तब्बल तासभर चालते. रुग्णांना असह्य वेदना सहन कराव्या लागतात. शिवाय, संभोगानंतर रुग्णांची वीर्यस्खलन करण्याची क्षमता गमावून जाते. यावर उपाय म्हणून युरोकुलने क्रांतिकारक तंत्रज्ञान भारतात आणले आहे.”

“या ‘रिझूम थेरपी’ तंत्रज्ञानाद्वारे विना शस्त्रक्रिया प्रोस्टेट ग्रंथींचा वाढलेला भाग पाण्याच्या वाफेच्या साहाय्याने विरघळून टाकता येतो. ही थेरपी सामान्यत: बाह्यरुग्ण प्रक्रिया म्हणून केली जाते. या यंत्रामुळे प्रोस्टेट ग्रंथीवरील उपचार अवघ्या १० मिनिटात होणार असून, रुग्ण त्याच दिवशी दोन ते तीन तासांत घरी जाऊ शकणार आहे. एक लहान कॅथेटर ५-७ दिवस ठेवला जाईल. या प्रक्रियेनंतर रुग्णांना होणाऱ्या त्रासापासून त्वरित आराम मिळू लागतो आणि जास्तीत जास्त फायदा तीन महिन्यात दिसू लागतो. या तंत्रज्ञानाच्या यशाचा दर ८० टक्क्यांपेक्षा पेक्षा जास्त आहे. प्रोस्टेटच्या समस्यांमुळे लघवी रोखून धरलेल्या रुग्णांवर उपचार कारण्यासाठी याचा मोठ्या प्रमाणात उपयोग केला जातो. एवढेच नाही तर प्रोस्टेट ग्रंथीच्या सर्व रुग्णांवर उपचार करण्यासाठी ‘रिझूम’ तंत्रज्ञान उपयुक्त ठरेल. याचा सर्वाधिक फायदा तरुण रुग्णांना होणार आहे.” असे डॉ. संजय कुलकर्णी यांनी नमूद केले.

पुणे-एका हॉटेलसाठी क्रेडीटवर मटन विक्रेत्या व्यापार्‍याकडून तब्बल 2 कोटी 91 लाखांचे मटन खरेदी करून त्यातील 2 कोटी 30 लाख 19 हजार 675 रूपये देऊन उर्वरीत रक्कम 61 लाख 62 हजार 140 रूपयांची फसवणूक व अपहार केल्याप्रकरणी लष्कर पोलिस ठाण्यात कोंढव्यातील बागवान हॉटेलच्या मालकांविरोधात पोलिसांकडून गुन्हा दाखल करण्यात आला आहे.

बागवान हॉटेलचे मालक अफजल युसूफ बागवान (65, रा. कौसरबाग) आणि अहतेशाम अयाज बागवान (35) अशी गुन्हा दाखल करण्यात आलेल्यांची नावे आहेत. याबाबत मटन विक्रेता शादाफनिजाम पटेल (43, रा. जान मोहम्मद स्ट्रीट, कॅम्प, पुणे) यांनी तक्रार दिली आहे. हा प्रकार 2019 ते 2023 दरम्यान घडला.

पोलिसांनी दिलेल्या माहितीनुसार, बागवान हॉटेलचे मालक बागवान यांनी तक्रारदार पटेल यांच्याकडून एकूण 2 कोटी 91 लाख रूपयांचे मटन, चाप, खिमा, गुरदा ईत्यादी मटन घेतले. त्यापैकी बागवान यांनी केवळ 2 कोटी 30 लाख 19 हजार रूपये परत केले नाही. त्यांनी उर्वरीत 61 लाख 62 हजार न देता बागवान यांनी त्या रकमेचा अपहार केल्याचे फिर्यादीत नमूद करण्यात आले आहे. पुढील तपास लष्कर पोलिस करत आहे.

व्यावसायिक प्रगतीला सामाजिक कार्याची जोड द्यावी-अजित गुलाबचंद
पुणे : “बांधकाम क्षेत्रात सातत्याने बदल होत आहेत. तंत्रज्ञानाचा, कलात्मकतेचा अंतर्भाव होत असून, बांधकामाची गुणवत्ता वाढली आहे. घरांच्या वाढत्या मागणीमुळे व्यावसायिक प्रगती वेगाने होत आहे. ही प्रगती साधतानाच सामाजिक जबाबदारीचेही भान जपायला हवे. सामाजिक कार्याची आणि सकारात्मक विचारांची जोड मिळाली, तर चांगल्या शहरांचे व समाजाचे निर्माण होईल,” असे प्रतिपादन ज्येष्ठ उद्योगपती, हिंदुस्थान कन्स्ट्रक्शनचे अध्यक्ष अजित गुलाबचंद यांनी केले.

बिल्डर्स असोसिएशन ऑफ इंडिया (बीएआय) पुणे सेंटरतर्फे आयोजित ‘बीएआय-शिर्के वेल बिल्ट स्ट्रक्चर कॉम्पिटिशन २०२३’ या पुरस्कार वितरण सोहळ्यात अजित गुलाबचंद बोलत होते. पुणे स्टेशनजवळील हॉटेल शेरेटॉन ग्रँडमध्ये झालेल्या कार्यक्रमावेळी ‘बीएआय’ पश्चिम विभागाचे उपाध्यक्ष सुनील मुंदडा, ‘बीएआय’ महाराष्ट्रचे अध्यक्ष सचिन देशमुख, डब्ल्यूबीएससीचे अध्यक्ष हरप्रीत सिंग आनंद, बीएआय पुणे सेंटरचे अध्यक्ष डी. एस. चौधरी, उपाध्यक्ष व डब्ल्यूबीएससीचे संयोजक सुनील मते, मानद सचिव अजय गुजर, खजिनदार राजाराम हजारे आदी मान्यवर उपस्थित होते. यंदाचा ‘बीएआय-पद्मश्री बी. जी. शिर्के लाईफटाईम अचीवमेंट अवॉर्ड’ श्रॉफ उद्योग समूहाचे जयप्रकाश प्रवीणचंद्र उर्फ जेपी श्रॉफ यांना प्रदान करण्यात आला. पुणेरी पगडी, शाल, सन्मानचिन्ह, मानपत्र आणि एक लाख अकरा हजार रोख रुपये असे पुरस्काराचे स्वरूप होते. यावेळी ‘बीएआय’च्या इंजिनीअरिंग डायरीचे प्रकाशन करण्यात आले.

बांधकाम क्षेत्रातील विविध विभागात उल्लेखनीय काम करणाऱ्या कंपन्यांना सन्मानित करण्यात आले. यामध्ये एस्कॉन प्रोजेक्ट्सला निवासी श्रेणीत, रोहन बिल्डर्स हाऊसिंग कॉम्प्लेक्स आणि बी. जी. शिर्के यांना निवासी सोसायटी श्रेणी, रत्नरूप प्रोजेक्ट यांना व्यावसायिक इमारतीत दोन पुरस्कार, रतिलाल भगवानदास कन्स्ट्रक्शन आणि सुरज बिल्डर्स प्रायव्हेट लिमिटेड यांना औद्योगिक श्रेणी, टी अँड टी इन्फ्रा लिमिटेड आणि अजवानी यांना इन्फ्रास्ट्रक्चर श्रेणी, बी. जी. शिर्के आणि शुभम एपिक प्रायव्हेट लिमिटेड यांना सरकारी प्रकल्प, मिलेनियम इंजिनियर्स अँड प्रायव्हेट लिमिटेड यांना वर्क अप टु बेअर शेल श्रेणीत दोन पुरस्कार, सुगम कन्स्ट्रक्शन यांना लँडस्केप (हॉर्टिकल्चर) या श्रेणीमध्ये पुरस्कार देऊन सन्मानित करण्यात आले. स्मृतीचिन्ह, शाल, सन्मानपत्र असे पुरस्काराचे स्वरूप होते.

जेपी श्रॉफ म्हणाले, “बीएआयच्या वतीने गुलाबचंद यांच्या हस्ते हा पुरस्कार स्वीकारताना आनंद होतो आहे. नव्वदीच्या दशकात बांधकाम क्षेत्रात एक छोटा कॉन्ट्रॅक्टर म्हणून काम सुरु केले. आज याचे उद्योग समूहात रूपांतर झाले आहे. माझ्या वाटचालीत घरच्यांचा सहभाग मोलाचा आहे. वर्ल्ड स्कीलिंग चॅम्पियनशिप स्पर्धेच्या निमित्ताने मला तरुणांना मार्गदर्शन करण्याची संधी मिळाली.”

सचिन देशमुख म्हणाले, “बीएआय पुणे सेंटरचा आदर्श महाराष्ट्रातील इतर सेंटरने घ्यायला हवा. यातून बांधकाम विभागातील नावीन्यता सर्वांसमोर सिद्ध करता येते. काळ बदलतो, तसेच बांधकामातील सुधारणाही वाढत आहेत. बांधकामाचा दर्जा आज उंचीवर पोहोचला आहे. आज बांधकाम क्षेत्रातील उणीव भरून निघताना दिसत आहे.”

सुनील मुंदडा म्हणाले, “देशात बीएआयचे कार्य एकूण २२२ सेंटरमधून सुरु आहे. पुणे सेंटर अधिक मजबूत आणि वेगाने प्रगती करत आहे. बांधकाम विभागातील वाढत्या दर्जामुळे ‘रेरा’ अंतर्गत प्रकल्प सहजरित्या पूर्ण होत आहेत. शासनाचे प्रकल्पही उच्च दर्जाचे होताहेत, ही चांगली गोष्ट आहे.”

डी. एस. चौधरी यांनी अध्यक्षीय मनोगत व्यक्त केले. स्वागत-प्रास्ताविक हरप्रीत सिंग आनंद यांनी केले.  कार्यक्रमाचे सूत्र संचलन प्रशांत देशमुख आणि संजय आपटे यांनी केले आणि आभार अजय गुजर यांनी मानले.

मुंबई, दि. २१ : देशातील नामांकित संस्थांमध्ये उच्च शिक्षण घेण्यासाठी राज्याच्या समाज कल्याण विभागाकडून राजर्षी शाहू महाराज गुणवत्ता शिष्यवृत्ती योजना राबविली जाते. या योजनेसाठी सन २०२३ -२४ या वर्षाकरिता अर्ज मागविण्यात आले होते, मात्र  नामांकित शैक्षणिक संस्थांमध्ये प्रवेश प्रक्रिया अद्याप पूर्ण झालेली नसल्याने या योजनेसाठी अर्ज  करण्यास ४ जानेवारी २०२४ पर्यंत मुदतवाढ देण्यात आली आहे.

देशातील एआयआयएमएस (AIIMS), आयआयएम(IIM), आयआयआयटी (IIIT), एन‌आयटी(NIT),आयआयएससी (IISc), आयआयएसइआर (IISER) इन्स्टीट्यूट ऑफ नॅशनल इंपार्टन्स व इतर कॉलेज या शैक्षणिक संस्थांसह भारत सरकारच्या मनुष्यबळ विकास मंत्रालय संकेतस्थळावरील मान्यता प्राप्त नामांकित संस्थांमध्ये उच्च शिक्षण घेण्यासाठी अनुसूचित जाती/नवबौद्ध घटकातील विद्यार्थ्यांसाठी राजर्षी शाहू महाराज गुणवत्ता शिष्यवृत्ती योजना राज्याच्या समाज कल्याण विभागाकडून राबविली जाते. राज्यातील १०० अनुसूचित जातीच्या, नवबौद्ध घटकांतील विद्यार्थ्यांना या योजनेचा लाभ देण्यात येतो. राज्यातील सर्व विभागातील विद्यार्थ्यांना समान संधी देण्याच्या उद्देशाने विभागीय माध्यमिक व उच्च माध्यमिक शिक्षण मंडळनिहाय १०० विद्यार्थ्यांची निवड करण्यात येते. या योजनेसाठी पात्र ठरलेल्या विद्यार्थ्यांस संबंधित विद्यापीठ/ संस्थेने अभ्यासक्रमासाठी ठरवून दिलेले पुर्ण शिक्षण शुल्क, नोंदणी फी, जिमखाना, ग्रंथालय, संगणक इत्यादी शुल्क संबंधित  विद्यापीठ/ शैक्षणिक संस्थेमार्फत विद्यार्थ्यांच्या आधार संलग्न बॅक खात्यात जमा करण्यात येते. वसतीगृह व भोजन शुल्क याचा देखील संस्था आकारणीनुसार खर्च देण्यात येणार आहे. तसेच पुस्तकांसाठी ५ हजार रुपये व इतर शैक्षणिक खर्चासाठी ५ हजार असे रुपये १० हजार दोन टप्प्यात देण्यात येणार आहेत.

या योजनेविषयी अधिक माहिती, जाहिरात, अर्ज व नियमावली शासनाच्या  www.maharashtra.gov.in या संकेतस्थळावर  जलद दुवे रोजगार या मथळ्याखाली उपलब्ध आहे. या संकेतस्थळावरुन विहित अर्जाचा नमुना डाऊनलोड करुन तो परिपूर्ण भरुन कागदपत्रासह ४ जानेवारी २०२४ रोजी सायंकाळी ६.१५ वाजेपर्यंत आयुक्त, समाज कल्याण, महाराष्ट्र राज्य,३ चर्च पथ पुणे येथे करावा. पदवी, पदव्युतर पदवी,  पदव्युतर पदविका पूर्णवेळ अभ्यासक्रसाठी या योजनेचा लाभ देय असणार आहे.  राज्यातील रहिवासी असलेल्याच विद्यार्थ्याना याचा लाभ मिळणार आहे. या योजनेसाठी जास्तीत जास्त विद्यार्थानी अर्ज सादर करण्याचे आवाहन समाज कल्याण विभागाकडून करण्यात आले आहे.

पुणे- महापालिकेच्या प्रत्येक क्षेत्रीय कार्यालयाच्या अंतर्गत टॉयलेट सेवा ॲपच्या माध्यमातून स्वच्छ शौचालय स्पर्धा भरविण्यात येत असल्याची माहिती अतिरिक्त आयुक्त कुणाल खेमनार आणि उपायुक्त संदीप कदम यांनी दिली.टॉयलेट सेवा ॲपच्या दुसऱ्या टप्प्याची सुरुवात होत असताना त्यांनी हि माहिती पत्रकार परिषदेतून दिली. यावेळी स्वच्छ पुणे चे ब्रांड अॅम्बेसिडर संगीतकार डॉ.सलील कुलकर्णी,तसेच अॅप चे अमोल भिंगे यावेळी उपस्थित होते .

खेमनार म्हणाले कि,’ पुणे शहरातील सार्वजनिक स्वच्छतागृहांची उपलब्धता व सोयीसुविधांबाबत अधिक प्रमाणात जनजागृती होणेकरीता अमोल भिंगे यांनी शहरातील सार्वजनिक शौचालयांची ठिकाणे शोधणे, वापरानंतर या शौचालयास Feedback देणे किंवा तकारी नोंदविणे इ.सुविधा उपलब्ध असलेले Toilet Seva app तयार केले असून या App द्वारे टॉयलेट्स search करणे, टॉयलेट add करणे, ओव्हरऑल रेटिंग नुसार results sort करणे, टॉयलेटमध्ये असणाऱ्या सुविधा पहाणे किंवा त्यानुसार search results चे filtering करणे उदाहरणार्थ वॉशबेसिन, पाणी, liquid soap किंवा sanitizer, डस्टबिन, lights, महिलांसाठीच्या सनिटरी नॅपकिन्स, टॉयलेट कुठे लोकेटेड आहे हे तपासणे अशा विविध सुविधा उपलब्ध आहेत. पुणे महानगरपालिका कार्यक्षेत्रातील एकूण ११८३ सार्वजनिक स्वच्छतागृहांची (public टॉयलेट्स, community टॉयलेट्स) माहिती टॉयलेटसेवा app मध्ये उपलब्ध करून देण्यात आलेली आहे. ही माहिती शहरातील नागरिक, तसेच प्रवास करणाऱ्यांना उपयोगी पडणार आहे. शहरातील सार्वजनिक शौचालयांविषयी नागरिकाना आपला अभिप्राय टॉयलेटसेवा app मधून रेटिंग्सच्या मार्फत देणे आणि आपल्या तक्रारी नमूद सरपणे सोयीचे होणार आहे. दिनांक २२/०६/२०२३ रोजी महापालिका आयुक्त यांचे हस्ते या Toilet Seva app घे लॉचिंग करण्यात आली होती व ते नागरीकांना वापरासाठी खुले करण्यात आले होते.

तसेच केंद्र सरकारच्या गृहनिर्माण आणि शहरी व्यवहार मंत्रालयाने स्वच्छ भारत अभियान अंतर्गत Clean Tollet Challenge २०२३ च्या अनुषंगाने आवश्यक कामकाज करणेविषयी सर्व स्थानिक स्वराज्य संस्थाना सूचना दिलेल्या आहेत. त्यानुसार सुरक्षित स्वच्छतेसाठी वेगवान बदल करणेकरिता Clean Toilet Challenge प्रक्षेपित करण्यात आले आहे. या अंतर्गत पाच आठवड्यांचा (१९ नोव्हेंबर २०२३ ते २५ डिसेंबर २०२३) संपूर्ण शहरभर सार्वजनिक व सामुदायिक शौचालयांचे मोठ्या प्रमाणावर सामूहिक स्वच्छता व देखभाल दुरुस्ती अभियान राबविण्यात येणार आहे. शौचालयांचे वापरकर्त्यांना अपेक्षित सेवा सुविधा देणे व उत्कृष्ठ शौचालयांना सर्वज्ञात करणे असे या अभियानाचे उद्दिष्ट आहे.

सध्या सुरु असणारया Clean Toilet Challenge २०२३ च्या अनुषंगाने Toilet Seva App च्या माध्यमातून शौचालय प्रतवारी करून शहर पातळीवर स्वच्छ शौचालाय स्पर्धा राबविल्यास शौचालय व्यवस्थापन अधिक सक्षमपणे होऊन नागरिकांना योग्य सोयीसुविधा देण्यात येतील. याकरिता स्वच्छ शौचालय स्पर्धा संपूर्ण शहरभर राबविण्यात येणार आहे. सदर स्पर्धेमध्ये प्रत्येक क्षेत्रीय कार्यालयातून उकृष्ट पाच शौचालयांपैकी एका शौचालयाची निवड अंतिम फेरीकरिता केली जाणार आहे. शहर पातळीवर १५ शौचालयामधून तीन उत्कृष्ट शौचालय निवडले जातील. सदर स्पर्धेचा कालावधी ०१ जानेवारी २०२४ते ३० जून २०२४ असा असणार आहे. एकूण १०० गुणांकरिता Toilet Seva App Rating/ मानाकन- 30गुण, Toilet Seva App वापर ३० गुण व प्रत्यक्ष निरीक्षण (FACES Parameters (मापदंड)- ४० गुण हे स्पर्धेचे निकष असतील,

स्पर्धेचे परीक्षण करण्याकरीत क्षेत्रीय कार्यालय स्तरावर प्रत्येकी एक अश्या एकूण १५ समिती मुख्य खात्याच्या स्तरावर केंद्रीय समिती कार्यरत असतील. केंद्रित स्तरावर अपेक्स कमिटीचे सदस्य पत्रकार स्वयं सेवी संस्था प्रतिनिधी, नागरिक प्रतिनिधी, निवृत्त अधिकारी, सफाई कर्मचारी आयोग प्रतिनिधी इत्यादी सदस्य असणार आहेत व विकेद्रित स्तरावर मोहल्ला कमिटी सदस्य, स्वयं सेवी संस्था प्रतिनिधी, नागरिक प्रतिनिधी, निवृत अधिकारी इत्यादी सदस्य असणार आहेत. महापालिका सहाय्यक आयुक्त क्षेत्रीय स्तरावरील समितीचे अध्यक्ष राहतील व मुख्य खात्याच्या स्तरावर केंद्रीय समिती चे अध्यक्ष उप आयुक्त घनकचरा व्यवस्थापन असणार आहेत. परीक्षणाबाबत सदस्यांमध्ये मतभिन्नता अढळल्यास अंतिम निर्णय अध्यक्षांचा असेल.

या स्पर्धेची व Toilet Seva App च्या दुसऱ्या पर्वाची सुरवात संत गाडगेबाबा पुण्यतिथीनिमित माहे डिसेंबर २०२३ मध्ये मा. स्वच्छता बॅन्ड अॅम्बेसिडर डॉ. सलील कुलकर्णी यांच्या हस्ते करण्यात येईल व स्पर्धेचा कालावधी ०१ जानेवारी २०२४ ते ३० जून २०२४ असा असणार आहे. माहे जुलै २०२४ मध्ये परीक्षण पूर्ण करण्यात येईल. या स्पर्धेविषयी पुणे महानगरपालिका सोशल मिडिया व प्रिंट मिडिया द्वारे जनजागृती करण्यात येईल.