मुंबई-जरांगे यांच्या आंदोलना विषयी बोलताना हे कोणाचे पाप, हे सर्वांना माहिती आहे. कोणाचे ओएसडी आणि पीए त्यांना भेटण्यासाठी जात होते, हे देखील पूर्ण महाराष्ट्राला माहिती असल्याची टीका विधानसभेचे विरोधी पक्ष नेते विजय वडेट्टीवार यांनी केली आहे. राज्य विधिमंडळाच्या अर्थसंकल्पीय अधिवेशनाला आजपासून सुरुवात झाली. या अधिवेशनाच्या पार्श्वभूमीवर विरोधी पक्ष नेते विजय वडेट्टीवार यांनी राज्य सरकार तसेच उपमुख्यमंत्री देवेंद्र फडणवीस यांच्यावर जारेदार हल्हाबोल केला. राज्यात सुरू असलेल्या मराठा आरक्षणाच्या प्रश्नावर त्यांनी सडकून टीका केली.

जरांगे यांना कोणी तयार केले. त्यांना तयार करणारे कोण? त्यांची इच्छाशक्ती वाढवणारे कोण? सर्व महाराष्ट्राला माहिती आहे. कोणाचे ओएसडी त्यांना भेटण्यासाठी जात होते? कोणाचे पीए जात होते? कोण तडजोडी करत होते? कोण त्यातून मार्ग काढत होते? त्यातून जरांगे यांची हिम्मत कोण वाढवत होते? हे सर्वांना माहिती आहे. हे कोणाचे पाप आहे, हे सर्वांना माहिती आहे. आमचे पीए थोडीच त्यांना भेटण्यासाठी जात होते. जे पेराल तेच उगवेल अशा शब्दात विजय वडेट्टीवार यांनी नाव न घेता देवेंद्र फडणवीस आणि राज्य सरकार यांच्यावर टीका केली.

राज्यात मनोज जरांगे पाटील यांच्या नेतृत्वात सुरू असलेल्या मराठा आरक्षणाच्या पार्श्वभूमीवर राज्य सरकारच्या वतीने विशेष अधिवेशनाच्या माध्यमातून स्वतंत्र दहा टक्के आरक्षण जाहीर करण्यात आले आहे. मात्र, असे असले तरी मनोज जरांगे पाटील यांना ओबीसी समाजातूनच आरक्षण हवे आहे. त्यामुळे त्यांनी आंदोलन कायम ठेवले आहे. या सर्व पार्श्वभूमीवर विरोधकांच्या वतीने राज्य सरकारला कोंडीत पकडण्याचा प्रयत्न या अधिवेशनात केला जाणार आहे.

आगामी काळात होणाऱ्या लोकसभा तसेच त्यानंतर होणाऱ्या विधानसभा निवडणुकीच्या पार्श्वभूमीवर राज्य सरकारच्या वतीने अंतरीम अर्थसंकल्प सादर केला जाणार आहे. या अधिवेशनाच्या माध्यमातून राज्य सरकार आगामी काळात होणाऱ्या लोकसभा आणि विधानसभा निवडणुकीच्या पार्श्वभूमीवर काही महत्त्वाच्या घोषणा करण्याची शक्यता वर्तवली जात आहे.

मुंबई-मला जरांगे यांच्यावर बोलायचे नाही. सध्या माझा 2 जुन्या नाटकांचा अभ्यास सुरू आहे. एक डॉक्टर काशिनाथ घाणेकर यांचे गृह खात्याला जेव्हा जाग येते आणि दुसरे म्हणजे सीमेवरून परत जा. या 2 नाटकांच्या जुळवाजुळवीचे काम सध्या सुरू आहे. त्यामुळे मला या मुद्यावर बोलण्यास वेळ नाही, असे राज्याचे अन्न व पुरवठा मंत्री छगन भुजबळ पत्रकारांशी संवाद साधताना म्हटले.आपल्या या वक्तव्याद्वारे त्यांनी राज्याचे गृहमंत्री देवेंद्र फडणवीस व मनोज जरांगे पाटील यांना टोला हाणला आहे.

मनोज जरांगे मराठा समाजाला ओबीसीत आरक्षण देण्याच्या मु्द्यावरून चांगलेच आक्रमक झालेत. त्यांनी रविवारी उपमुख्यमंत्री देवेंद्र फडणवीस यांच्यावर तुफान टीका करत तावातावाने मुंबईच्या दिशेने निघाले. पण आता पोलिसांनी संचारबंदी लागू केल्यामुळे त्यांना सोमवारी पुन्हा आंतरवाली सराटीत परतावे लागले. यामुळे ते काहीसे बॅकफुटवर गेल्याचे चित्र आहे. ते सायंकाळी आपली पुढील दिशा स्पष्ट करतील. दुसरीकडे, मनोज जरांगे यांच्या या स्थितीविषयी पत्रकारांनी छगन भुजबळ यांना छेडले असता त्यांनी आपल्याला जरांगेंच्या मुद्यावर बोलण्यास वेळ नसल्याचे स्पष्ट केले.

मंत्री छगन भुजबळ यांनी मनोज जरांगे यांच्यावर बोलण्यास नकार दिला. पण त्याचवेळी त्यांनी त्यांना उपरोधिक टोलाही हाणला. सध्या अधिवेशन सुरू आहे मला तिकडे पाहू द्या.

उल्लेखनीय बाब म्हणजे छगन भुजबळ यांनी रविवारीच मनोज जरांगे यांचे पितळ उघडे पडत असल्यामुळे ते आक्रमक होत असल्याचा दावा केला होता. मराठा समाजाला विधिमंडळात एकमताने स्वतंत्र आरक्षण दिले आहे. त्यामुळे आता जरांगेंनी अशी आदळ आपट करण्याचे काय कारण आहे? ता त्यांचेच लोक त्यांच्या विरोधात आरोप करत आहेत. कदाचित त्यामुअळेच त्यांनी हे आकांडतांडव सुरू केले आहे. आता त्यांचे पितळ उघडे पडत चालले आहे. त्यात त्यांनी केलेल्या गुप्त बैठका, फिरवलेले निर्णय, मराठा समाजाची केलेली दिशाभूल, हे सर्व काही उजेडात येत आहेत. यामुळे रक्तदाब वाढल्यामुळे ते असे बोलत असावेत, असे भुजबळ यांनी म्हटले होते.

मनोज जरांगे पाटील यांनी रविवारी मराठा आरक्षणाच्या मुद्यावरून थेट देवेंद्र फडणवीस यांच्यावर हल्ला चढवला. देवेंद्र फडणवीस यांनी आपल्याला बदनाम करण्याचा, सलाईनमधून विष द्यायचा व एन्काउंटरमध्ये ठार मारण्याचा कट रचला आहे, असे ते म्हणाले होते. त्यानंतर त्यांनी फडणवीसांना माझा बळी हवा असेल तर मीच त्यांच्यापुढे जाऊन उभा राहतो, असे म्हणते ते अचानक मुंबईतील फडणवीस यांच्या सागर बंगल्याच्या दिशेने निघाले होते. पण सोमवारी राग शांत झाल्यानंतर ते पुन्हा आंतरवाली सराटीत परतलेत.

जरांगेंकडून सुसंस्कृत. महाराष्ट्राला गालबोट; बोलविता धनी कोण?

नागपूर:मनोज जरांगे पाटील यांनी उपमुख्यमंत्री देवेंद्र फडणवीस यांच्यावर केलेले आरोप म्हणजे सुसंस्कृत महाराष्ट्राला लावलेले गालबोट आहे. जातीवरून टीका करतानाच त्यांनी अर्वाच्च भाषेचा वापर केला, हे महाराष्ट्र व भाजपा सहन नाही, असे प्रत्युत्तर भारतीय जनता पार्टीचे प्रदेशाध्यक्ष श्री चंद्रशेखर बावनकुळे यांनी दिले. मनोज जरांगे पाटील यांचा बोलविता धनी कोण आहे, असा प्रश्नही त्यांनी विचारला.

नागपूर येथे माध्यमांना त्यांनी प्रतिक्रीया दिली. ते म्हणाले, देवेंद्र फडणवीस सुसंस्कृत आणि संयमी नेते आहेत त्यांनी कधीही जातीपातीचे राजकारण केले नाही. मुख्यमंत्री असताना त्यांनी मराठा समाजाला आरक्षण दिले व ते उच्च न्यायालयात टिकविले. मनोज जरांगे यांचा जीव वाचायला हवा आणि त्यांना सुरक्षा देण्याचे काम फडणवीस यांनी केले. त्यांच्यासारख्या निष्कलंक माणसावर आरोप करणे हा महाराष्ट्रासाठी वाईट दिवस आहे.

पुढे ते म्हणाले, जरांगे सागर बंगल्यावर जात आहेत; यात फडणवीसांची काय चुक आहे. ज्यांनी ४० वर्षे मराठा समाजाला आरक्षणापासून वंचित ठेवले, ज्यांनी सर्वोच्च न्यायालयात आरक्षण घालविले, अशा शरद पवार व उद्धव ठाकरे यांच्या बंगल्यावर जाऊन प्रश्न विचारायला हवा. फडणवीसांवर केलेले असे वक्तव्य मराठा समाजाला मान्य नाहीं आणि महाराष्ट्रातील जनतेला देखील मान्य नाही. देवेंद्र फडणवीस आमचे नेतृत्त्व आहे त्यांचा अपमान आम्ही सहन करणार नाही, असेही ते म्हणाले.

मुंबई दिनांक २५ फेब्रुवारी २०२४

मुंबई भाजपा महिला मोर्चा आणि भाजपा आ. मनीषा चौधरी यांच्या पुढाकाराने नारीशक्ती वंदन अभियान यशस्वीरित्या राबवण्यात आले. यानिमित्ताने आज दहिसर येथील गणपत पाटील नगरात भव्य कार्यक्रमाचे आयोजन करण्यात आले. यावेळी मुंबई भाजपा महिला मोर्चाच्या अध्यक्ष शितल गंभीर यांची प्रमुख उपस्थिती होती.

यावेळी बोलताना आ. मनीषा चौधरी म्हणाल्या, मोदी सरकारच्या काळात महिलांसाठी अनेकविध योजना यशस्वीरित्या राबवण्यात आल्या त्याचा फायदा महिला सक्षमीकरणासाठी झाला. भारतातील महिला संपूर्ण देशाला दिशा देत आहेत. देशातील पहिली व्यक्ती म्हणून राष्ट्रपती द्रौपदी मुर्मू सर्व महिला शक्तीचा अभिमान वाढवत आहेत.

मुंबई भाजपा महिला मोर्चाच्या अध्यक्ष शितल गंभीर म्हणाल्या, पंतप्रधान नरेंद्र मोदी यांच्या नेतृत्वाखाली देशाची महिला शक्ती जगात झेंडा फडकवत आहे. भाजप सरकारच्या काळात देशातील महिला आर्थिक आणि सामाजिकदृष्ट्या सक्षम झाल्या आहेत असेही त्या म्हणाल्या. यावेळी मोठ्या संख्येने महिला उपस्थित होत्या.

मुंबई, दि.२५ : मराठा समाजासाठी दहा टक्के आरक्षणाचा घेतलेला निर्णय ऐतिहासिक, धाडसी आणि कायद्याच्या कसोटीवर टिकणारा असल्याचे सांगून इतर मागास वर्ग (ओबीसी) अथवा इतर कोणत्याही समाजाच्या आरक्षणाला धक्का न लावता मराठा समाजाला आरक्षण देण्याचा महत्त्वाचा निर्णय घेण्यात आला आहे.कायदा कोणीही हातात घेवू नये.कायदा व सुव्यवस्था राखण्याची जबाबदारी शासनाची असून यासाठी शासन कटिबद्ध असल्याने मुख्यमंत्री एकनाथ शिंदे यांनी सांगितले.

राज्याच्या अंतरिम अर्थसंकल्पीय अधिवेशनाच्या पूर्वसंध्येला सह्याद्री अतिथीगृह येथे आयोजित चहापान कार्यक्रमानंतर पत्रकार परिषदेत मुख्यमंत्री एकनाथ शिंदे बोलत होते. यावेळी उपमुख्यमंत्री देवेद्र फडणवीस, उपमुख्यमंत्री अजित पवार, शालेय शिक्षण व मराठी भाषा मंत्री दिपक केसरकर, गृह निर्माण व इतर मागास बहूजन कल्याण मंत्री अतुल सावे, क्रीडा मंत्री संजय बनसोडे, मदत व पुर्नवसन आपत्ती व्यवस्थापन मंत्री अनिल पाटील आदी उपस्थित होते.

मुख्यमंत्री श्री. शिंदे म्हणाले की, या अर्थसंकल्पीय अधिवेशनाकडून सर्व सामान्य कामगार, कष्टकरी, महिला, युवा याचा सर्वांगीण विकासाला चालना देणारे निर्णय घेतले जातील. या दिड वर्षात अनेक योजना सुरू केल्या. त्यामध्ये शेतकरी, महिला यांचा आयुष्यात बदल घडवणारे अनेक निर्णय राज्य सरकारने घेतले आहेत. अवकाळी, गारपीट, महापूर मध्ये अडकलेल्या शेतकऱ्यांना शासन मदत करत आहे. शेतकऱ्यांसाठी 45 हजार कोटींची मदत केली. तसेच शेतकऱ्यासाठी 1 रुपयात पिक विमा योजना सुरु केली. एस.टी महामंडळाच्या बस प्रवासात महिला सन्मान योजना सवलत देण्यात आली आहे.

राज्यात 8 लाख कोटी रुपयाचे पायाभूत सुविधा, अटल सेतू, समृद्धी महामार्ग असे विविध उपक्रमाला चालना देण्याचे काम सरकार करीत आहे. दावोस येथे 3 लाख 73 हजार कोटी रुपयांचे सामजंस्य करार करण्यात आले. नवी मुंबई विमानतळाचे काम प्रगतीपथावार आहे. जलयुक्त शिवार, मागेल त्याला शेततळे याला प्राधान्य देण्यात येत आहे. शासन आपल्या दारी असा लोकाभिमुख उपक्रम राबविण्यात येत आहे. सरकार गतीमान आहे. सर्वांगीण विकासासाठी प्रयत्नशील आहे.स्वच्छाता मोहिम राज्यात राबविण्यात येत असून यामुळे प्रदुषण कमी होत आहे. राज्याला प्रगतीपथावर नेत असतांना सर्व क्षेत्रांना स्पर्श करण्यात येत असल्याचे, श्री. शिंदे यांनी सांगितले.

मुख्यमंत्री श्री शिंदे म्हणाले,न्यायमूर्ती संदीप शिंदे (निवृत्त) समितीने राज्यातील मराठा समाजास कुणबी, मराठा-कुणबी, कुणबी-मराठा जात प्रमाणपत्र देण्यासाठी पुराव्यांची वैधानिक व प्रशासकीय तपासणी करून पात्र व्यक्तींना जात प्रमाणपत्र देण्यासाठी नोंदींचा डेटा बेस करुन कार्यपद्धती विहित केली, ज्यामुळे जात प्रमाणपत्र मिळणे सुकर झाले. कायद्याच्या चौकटीत टिकणारे व इतर कोणत्याही समाजाच्या आरक्षणाला धक्का न लावता मराठा समाजास आरक्षण देण्याकरीता दि. २० फेब्रुवारी २०२४ रोजी विधिमंडळाचे विशेष अधिवेशना विधेयक मंजूर करण्यात आले असल्याचे मुख्यमंत्री श्री शिंदे यांनी सांगितले.

मुख्यमंत्री श्री शिंदे म्हणाले, सारथी संस्थेमार्फत अधिछात्रवृत्ती शिष्यवृत्ती योजने अंतर्गत मराठा समाजाच्या विद्यार्थ्यांना मदत करण्यात आली. तसेच विद्यार्थ्यांना रोजगार व स्वयंरोजगारासाठी कौशल्य विकासाचे प्रशिक्षण देण्यात आले. शेतकरी प्रशिक्षण कार्यक्रम सारथीमार्फत सुरू असल्याचे त्यांनी सांगितले.

मराठा समाजाच्या विद्यार्थ्यांना स्वाधार योजनेच्या धर्तीवर निर्वाह भत्त्यात भरीव वाढ करण्याचा निर्णय घेण्यात आला. बँक खात्यात डीबीटीद्वारे वितरीत करण्यात येत आहेत. राजर्षी छत्रपती शाहू महाराज शिक्षण शुल्क शिष्यवृत्ती योजनेंतर्गत १७ लाख ५४ हजार ४९४ विद्यार्थ्यांना व्यावसायिक शिक्षणासाठी ९ हजार २६२ कोटी मंजूर करण्यात आले. इ. डब्ल्यू. एस. अंतर्गत १० टक्के आरक्षणातून विविध शैक्षणिक अभ्यासक्रमांमध्ये ३१ हजार विद्यार्थ्यांपैकी ७८ टक्के मराठा समाजाच्या विद्यार्थ्यांना प्रवेश. तसेच एम. पी. एस. सी. मार्फत शासकीय सेवेत ६५० उमेदवारांपैकी ८५ टक्के मराठा समाजाच्या उमेदवारांच्या नियुक्ती करण्यात आले असल्याचे श्री शिंदे यांनी सांगितले.

अण्णासाहेब पाटील आर्थिक विकास महामंडळामार्फत वैयक्तिक आणि गट कर्ज व्याज परतावा वितरीत करण्यात आला. मराठा आरक्षण कायदा सर्वोच्च न्यायालयाने अवैध ठरविल्यामुळे शासकीय सेवेत निवड होऊन नियुक्ती न मिळालेल्या १ हजार ५५३ उमेदवारांची अधिसंख्य पदावर नियुक्ती देण्यात आली.

एस. ई. बी. सी. मधून इ. डब्ल्यू. एस. व खुल्या प्रवर्गाचा विकल्प देऊन उमेदवारांना नियुक्त्या देण्याचा ऐतिहासिक निर्णय. अशा प्रकारे एकूण ४ हजार ७०० उमेदवारांना नियुक्ती देण्यात आली.⁠मराठा समाजाच्या सर्वांगीण विकासासाठी मराठा आरक्षण व सुविधा मंत्रिमंडळ उपसमिती धोरणात्मक निर्णय घेण्यासाठी कार्यरत असल्याचे श्री.शिंदे यांनी सांगितले.

सरकार लोकांचे जीवन सुकर होईल असे काम करत आहे – देवेंद्र फडणवीस

यावेळी उपमुख्यमंत्री तथा गृहमंत्री देवेंद्र फडणवीस म्हणाले, राज्यात विकासाची कामे वेगात सुरू आहेत दुष्काळ, आरोग्य, रोजगार, शिक्षण आदी बाबींवर सरकारचे लक्ष आहे. मुख्यमंत्री एकनाथ शिंदे यांनी मराठा समाजास दहा टक्के आरक्षण देण्यासाठी जो शब्द दिला होता तो पूर्ण केला आहे. धान उत्पादक शेतकऱ्यांसाठी जो बोनस घोषित झाला आहे. त्यासाठी या शेतकऱ्यांच्या वतीने मी मुख्यमंत्री शिंदे यांचे आभार व्यक्त करतो आहे.हे सरकार लोकांचे जीवन सुकर होईल असे काम करते आहे असे उपमुख्यमंत्री फडणवीस यावेळी म्हणाले.

राज्याचा अंतिम अर्थसंकल्प जुलैमध्ये – अजित पवार

याप्रसंगी उपमुख्यमंत्री तथा वित्त व नियोजन मंत्री अजित पवार म्हणाले, लोकसभा सार्वत्रिक निवडणूक पार्श्वभूमीवर राज्याचा अंतिम अर्थसंकल्प जुलैमध्ये सादर केला जाईल परंतु येत्या चार महिन्यांसाठी चा खर्चास मान्यता घेण्यासाठी अधिवेशनात सादर केले जातील. महानंद प्रकल्प राज्याचा असून गोरेगाव येथे मुख्यालय आहे राष्ट्रीय दुग्ध विकास मंडळ हे देशपातळीवर कार्य करणारी संस्था असून यापूर्वी देखील जळगाव जिल्हा दूध संघाचे त्यांच्याकडे हस्तांतर केले होते परंतु त्या दूध संघाची आर्थिक सुधारणा झाल्याने सुस्थिती आलेला दूध संघ जळगाव जिल्हा कडे हस्तांतरित करण्यात आला. दूध उत्पादकांसाठी आवश्यक ते सर्व उपाय केले जात असून त्यांच्यावर कोणताही अन्याय होऊ दिला जाणार नाही.

ते पुढे म्हणाले, ड्रग्जच्या गुन्ह्याचे तपास करताना पुणे पोलीस आयुक्तालयामार्फत पंजाब व परदेशापर्यंत धागेदोरे शोधले आहेत या त्यांच्या कामगिरीबद्दल त्यांना 25 लाखाचे रोख पारितोषिक देखील जाहीर केले आहे. मराठा आरक्षण बाबत शासनाने मार्ग काढण्याचे धोरण स्वीकारून ते पूर्ण केले आहे यापूर्वी देखील देवेंद्र फडणवीस मुख्यमंत्री असताना आणि पृथ्वीराज चव्हाण मुख्यमंत्री असताना मराठा आरक्षण देण्यासाठी कार्यवाही झाली होती . बिहारचे 50% पेक्षा अधिक आरक्षण मध्ये मर्यादा असून राज्यांमध्ये त्याच धर्तीवर 50% पेक्षा अधिक आरक्षण झाले आहे. ते टिकणारे असून या अनुषंगाने कायदा सुव्यवस्था चांगली रहावी हे गरजेचे आहे सर्वसामान्यांसाठी सरकार काम करीत आहे असे उपमुख्यमंत्री श्री. पवार यावेळी म्हणाले.