पर्यायी वीजवाहिनीच्या दुरुस्तीसाठी खोदाईच्या परवानगीची प्रतीक्षा

पुणे, दि. ०८ एप्रिल २०२४: महावितरणच्या मंडई २२/११ केव्ही उपकेंद्राला वीजपुरवठा करणारी भूमिगत वीजवाहिनी पुणे महानगरपालिकेच्या पाइपलाइनच्या खोदकामात १५ दिवसांपूर्वी तोडण्यात आली होती. त्याच ठिकाणी पुन्हा रविवारी (दि. ७) रात्री ९ वाजता बिघाड झाला. त्यामुळे मंडई परिसरातील तुळशीबाग, शनिपार, विश्रामबाग वाडा आदी परिसरात खंडित झालेला १५०० ग्राहकांचा वीजपुरवठा सोमवारी (दि. ८) सकाळच्या सुमारास पूर्ववत करण्यात आला.

दरम्यान मंडई उपकेंद्राला वीजपुरवठा करणाऱ्या पर्यायी वीजवाहिनीच्या दुरुस्तीसाठी ५ मीटर खोदाई करणे आवश्यक आहे. त्यासाठी दि. १ एप्रिलला महावितरणकडून लेखी परवानगी मागण्यात आली. मात्र पालिकेकडून ती मिळाली नसल्याने पर्यायी स्वरूपात वीजपुरवठा उपलब्ध करून देता आला नाही.

याबाबत माहिती अशी, पर्वती विभाग अंतर्गत मंडई २२/११ केव्ही उपकेंद्रातून मंडई, तुळशीबाग, लक्ष्मी रोड आदी परिसरातील सुमारे १७ हजार ग्राहकांना वीजपुरवठा केला जातो. या उपकेंद्राला रास्तापेठ व नवी पेठ या दोन स्वतंत्र २२ केव्ही भूमिगत वाहिन्यांद्वारे वीजपुरवठ्याची सोय आहे. दरम्यान १५ दिवसांपूर्वी यातील रास्तापेठ वीजवाहिनी पुणे महानगरपालिकेच्या पाइपलाइनच्या खोदकामात तोडण्यात आली. संबंधित कंत्राटदाराने या वाहिनीच्या दुरुस्तीचे व जाईंटिंगचे काम केले होते. त्याच दरम्यान नवी पेठ वीजवाहिनीमध्ये बिघाड झाला. त्यामुळे मंडई उपकेंद्राच्या वीजपुरवठ्याची पर्यायी स्त्रोत बंद झाला. या वीजवाहिनीच्या दुरुस्तीसाठी पालिकेकडे ५ मीटर रस्ताखोदाईची परवानगी मागण्यात आली. परंतु ती मिळाली नाही.

दरम्यान रविवारी (दि. ७) रात्री ९ वाजता रास्तापेठ वीजवाहिनीला १५ दिवसांपूर्वी लावलेला जाईंट खराब झाल्याने वीजवाहिनी नादुरुस्त झाली. खोदाई परवानगी न मिळाल्याने नवीपेठ वीजवाहिनीचा पर्यायी उपलब्ध नव्हता. त्यामुळे मंडई उपकेंद्राचा वीजपुरवठा बंद पडल्याने सुमारे १७ हजार ग्राहकांचा वीजपुरवठा खंडित झाला. यानंतर महावितरणकडून मंडई उपकेंद्राच्या ६ पैकी ५ वीजवाहिन्यांना तासाभरात अथक प्रयत्नांनी पर्यायी स्वरुपात वीजपुरवठा उपलब्ध करून देण्यात आला. मात्र उन्हाळ्यामुळे वीजभार वाढल्यामुळे महालक्ष्मी या वीजवाहिनीवरील तुळशीबाग, शनिपार, विश्रामबाग वाडा, नागनाथ पार येथील १५०० ग्राहकांचा वीजपुरवठा बंद ठेवावा लागला. तो सकाळच्या सुमारास पूर्ववत करण्यात आला. महावितरणकडून रास्तापेठ भूमिगत वीजवाहिनीचे रविवारी रात्री ११.३० वाजता दुरुस्ती काम सुरु करण्यात आले. सकाळी ११ वाजता ते पूर्ण झाल्यानंतर चाचणी घेऊन या वीजवाहिनीद्वारे मंडई उपकेंद्राचा वीजपुरवठा पूर्ववत करण्यात आला.

वाघोली – खासदार डॉ. अमोल कोल्हे यांचा आज गावभेट दौरा वाघोली येथील “निओ सिटी” या सोसायटीमधून सुरुवात झाला. यावेळी नागरिकांनी उस्फुर्त प्रतिसाद मिळाला. वाघोली येथे मोठ्या प्रमाणात इतर जिल्ह्यातून आणि इतर राज्यातून नोकरीनिमित्त स्थलांतरित झालेले मतदार आहेत.

या दौऱ्यात वाघोलीतील स्थानिक ग्रामस्थांसह इतर नागरिकांनी डॉ. कोल्हे यांच्या दौऱ्याला मोठ्या प्रमाणात प्रतिसाद दिला. ठिकठिकाणी सोसायटीच्या चेअरमन, सचिव व रहिवासी वर्गाने मोठ्या उत्साहाने स्वागत केले. खासदार डॉ. कोल्हे यांनी विविध सोसायटीच्या नागरिकांशी संवाद साधला.

यावेळी बोलताना खासदार डॉ. अमोल कोल्हे यांनी आरोग्याच्या प्रश्नाबाबत लक्ष वेधले, लोकसंख्या निहाय देशात हॉस्पिटल असायला हवे त्यासाठीच आपण “इंद्रायणी मेडिसिटी” हा प्रकल्प देशात पहिला शिरूर लोकसभा मतदारसंघात उभारण्यासाठी प्रयत्नशील आहोत असे सांगितले. वाघोलीकरांसाठी अत्यंत महत्वाचा असलेला पुणे – नगर रोड देशात मॉडेल होतोय याचा मला आनंद होतोय. वाघोलीपर्यंत मेट्रोचा प्रवास करता येणार आहे. मेट्रो, रेल्वे, रोड यासाठी सातत्याने प्रयत्न करतोय. असे मत यावेळी डॉ. अमोल कोल्हे यांनी नागरिकांशी बोलताना व्यक्त केले.

आम्ही सर्वजण तुमच्या सोबतच आहोत, आमच्या सर्व समस्या आपल्या माध्यमातून सोडविल्या जात आहेत या पुढेही सोडविल्या जातील हा आमचा विश्वास आहे, तुम्ही केवळ सांसदरत्न खासदार नसून स्वाभिमानी खासदार आहात, महाराष्ट्राचा स्वाभिमान दिल्लीमध्ये राखण्याचे काम फक्त खासदार डॉ. अमोल कोल्हे करत आहेत असे मत सोसायटीच्या पदाधिकाऱ्यांनी व्यक्त केले. त्याचबरोबर देशातील आर्थिक, सामाजिक, विकासाचे धोरण ठरविण्यासाठी आम्ही तुमच्या पाठीमागे भक्कम उभे आहोत असा विश्वास देखील उपस्थित नागरिकांनी व्यक्त केला.

यावेळी आमदार अशोकबाप्पू पवार, शिवसेना जिल्हाप्रमुख अशोक खंडेभारड, संदीप गोते, शिवदास उबाळे, वसुंधरा उबाळे, राजेंद्र सातव, बाळासाहेब सातव, स्वप्नील कुंजीर, स्मिता कडू, शैलेश पवार, राजू पाटील, अमोल मुळे, सचिन साबळे, देशमुख सर, स्वप्नील जैन, चेअरमन गावडे, नितीन मतांडे, किरण मनकावले, लहू नवसुपे यांसह अनेक नागरिक उपस्थित होते.

पुणे : मानाचा पहिला श्री कसबा गणपती सार्वजनिक गणेशोत्सव मंडळाच्या साल २०२४ ते २०२७ कालावधीसाठी विश्वस्त पदासाठी लोकशाही पद्धतीने निवडणूक झाली. एकूण ९ पुरुष विश्वस्त व २ महिला विश्वस्त या पदासाठी १७ पुरुष उमेदवार उभे राहिले होते. सौ. दिपा तावरे व सौ. पल्लवी नेऊरगावकर या २ महिला विश्वस्तांची बिनविरोध निवड झाली. निवडणुकीसाठी उभे राहिलेले उमेदवार श्री. श्रीकांत शेटे, श्री. निलेश वकील, अॅड. ऋग्वेद निरगुडकर, श्री. सूरज गाढवे, श्री. अक्षय ढेरे, श्री. भूषण रुपदे, श्री. सौरभ धोकटे, श्री. आशुतोष शेरे, श्री. मंदार देशपांडे, श्री. मोरेश्वर घोळे, श्री. भूषण ढेरे, श्री. वरद ठकार, श्री. विशाल चौधरी, श्री. सचिन म्हसवडे, श्री. गिरीश देशपांडे, श्री. दर्शन भुतडा, श्री. आशुतोष वैद्य या उमेदवारांपैकी निवडून आलेले उमेदवार खालील प्रमाणेः

1. श्री. श्रीकांत शेटे : अध्यक्ष

2.श्री. सूरज गाढवे :- उपाध्यक्ष

3. सौ. दिपा तावरे :- सचिव
4. श्री. अक्षय ढेरे: सहसचिव
5. श्री. भूषण रुपदे :- कोषाध्यक्ष
6. अॅड. ऋग्वेद निरगुडकर :- सह कोषाध्यक्ष
7. श्री. आशुतोष शेरे :- सह कोषाध्यक्ष
8. श्री. निलेश वकील: कार्याध्यक्ष
9. श्री. मंदार देशपांडे :- स्वागताध्यक्ष
10. सौ. पल्लवी नेऊरगावकरः हिशोब तपासनीस
11. श्री. सौरभ धोकटे :- समन्वयक

अध्यक्ष श्री श्रीकांत शेटे यांची निवड एकमताने झाली. निवडणूक अधिकारी म्हणून अॅड. दीप्ती माहूरकर यांनी काम पाहिले व सर्व निवडणूक प्रक्रिया पार पडली.

पिंपरी, पुणे (दि. ७ एप्रिल २०२४) समाजात वावरत असताना लेखक वास्तववादी घटना, अनुभव ग्रहण करतो आणि त्याचेच प्रतिबिंब आपल्या लेखणीतून उतरवतो. तसेच दैनंदिन जीवनात शैक्षणिक, सामाजिक, आर्थिक, नैसर्गिक याबरोबरच वैचारिक प्रगल्भता याचे प्रतिबिंब डॉ. मालाडकर यांच्या लेखणीतून उतरले आहे. ज्याप्रमाणे तुम्ही एखाद्या क्षेत्रात काम करता त्याचा प्रभाव तुमच्या विचारसरणीवर होतो. मालाडकरांच्या लेखणीतून वैज्ञानिक दृष्टिकोन आपल्याला पाहायला मिळतो, असे प्रतिपादन महाराष्ट्र साहित्य परिषदेचे पिंपरी चिंचवड शहराध्यक्ष राजन लाखे यांनी केले.
ज्येष्ठ वैज्ञानिक, साहित्यिक डॉ. निळकंठ मालाडकर यांच्या ‘स्वानंदी’ कथासंग्रह आणि ‘राजस’ काव्यसंग्रहाचे प्रकाशन शनिवारी येथे करण्यात आले. यावेळी कर्नल (निवृत्त) सुरेश पाटील, लेखक डॉ. निळकंठ मालाडकर, उज्ज्वला मालाडकर, डॉ. समीर मालाडकर, डॉ. मनिष मालाडकर, दिपाली मालाडकर, एच. ए स्कूलच्या माजी विद्यार्थी संघाचे मोहन बाबर, सुयश कुलकर्णी, विजय भिसे आदी उपस्थित होते.
डॉ. मालाडकर यांच्या वैज्ञानिक कथांमधून वास्तववादी जीवनाची अनुभूती वाचकांना येईल. सध्या सर्जनशीलतेवर कृत्रिम बुद्धिमत्तेचे प्रयोग सुरू आहेत; याचा पुढील पिढीवर काय परिणाम होईल हे लेखकाने सांगण्याचा प्रयत्न केला आहे, असे उज्ज्वला मालाडकर यांनी प्रास्ताविकात सांगितले.
डॉ. मालाडकर यांच्या कथा, कवितांमधून सर्जनशीलता, समाजाप्रती प्रेमळ पण तेवढाच कणखर माणूस वाचकांना पहायला मिळतो. ९१ वर्षांच्या या तरुणाची विज्ञानाबरोबर साहित्यातील मुशाफिरी कौतुकास्पद असून आपल्याला नवी दिशा देणारी आहे, असे कर्नल (नि.) सुरेश पाटील म्हणाले.
विजय भिसे, सुयश कुलकर्णी यांनी सूत्रसंचालन केले. आभार उज्ज्वला मालाडकर यांनी मानले. यावेळी डॉ. मालाडकर यांच्या काही मोजक्या कवितांचे वाचन करण्यात आले. एच. ए. स्कूलच्या माजी विद्यार्थी संघाने कार्यक्रमाचे संयोजन केले.
चौकट –
जीवनात अमुलाग्र बदल – डॉ. निळकंठ मालाडकर
आज विज्ञान – तंत्रज्ञान क्षेत्रात प्रचंड मोठी क्रांती झाली आहे. माहिती तंत्रज्ञानाच्या युगात मनुष्याच्या जीवनात अनेक बदल झाले असून आपल्या भावविश्वावर त्याचा चांगला – वाईट परिणाम होतो आहे. त्यावर कुठेतरी चौकट आखून भविष्यातील संभाव्य धोके लक्षात घेऊन मात केली पाहिजे, असे डॉ. मालाडकर यांनी सांगितले. यावेळी त्यांनी भारतीय जवानांवर आधारित ‘झुंज’ कविता सादर केली. याला उपस्थितांनी टाळ्यांच्या गजरात भरभरून दाद दिली.

पुणे-उपमुख्यमंत्री अजित पवार, चंद्रकांत पाटील व उदय सामंत उपस्थितीत उद्या मावळ लोकसभा महायुती समन्वय बैठक आयोजित करण्यात आल्याची माहिती येथे पुणे, शिरूर, बारामती, लोकसभा क्लस्टरमधील महायुतीचे समन्वयक संदीप खर्डेकर यांनी दिली. ते म्हणाले ,’मावळ लोकसभा मतदारसंघाची बैठक दि.8 एप्रिल सोमवारी सकाळी 10 वाजता, हॉटेल रागा पॅलेस,मदर तेरेसा फ्लायओव्हर जवळ,काळेवाडी चिंचवड बी आर टी रस्ता, काळेवाडी,येथे संपन्न होईल. उपमुख्यमंत्री अजितदादा पवार ,शिरूर, बारामती, पुणे लोकसभा क्लस्टर चे प्रमुख चंद्रकांतदादा पाटील तसेच . उदय सामंत यांच्या उपस्थितीत होणाऱ्या बैठकीस महायुतीचे उमेदवार श्रीरंग अप्पा बारणे,भाजपा चे क्लस्टर प्रमुख बाळासाहेब पाटील, माजी मंत्री बाळासाहेब भेगडे,आ. सुनील शेळके, आ. अश्विनीताई जगताप, आ. अण्णा बनसोडे, आ. उमाताई खापरे, शिवसेनेचे संपर्क प्रमुख संजय माशिलकर, उपनेते इरफान सय्यद,भाजपा पिं.चिं अध्यक्ष शंकरभाऊ जगताप ,शिवसेनेचे अध्यक्ष बाळासाहेब वाल्हेकर, राष्ट्रवादी चे अध्यक्ष अजित गव्हाणे,आर पी आय (आठवले गट ) चे स्वप्नील कांबळे,परशुराम वाडेकर, चंद्रकांताई सोनकांबळे, कुणाल वाव्हळकर,इ मान्यवर उपस्थित राहून मार्गदर्शन करतील असे समन्वयक संदीप खर्डेकर यांनी सांगितले. आर पी आय (खरात गट ) रासप, शिवसंग्राम,पीपल्स रिपब्लिकन पार्टी ( जोगेंद्र कवाडे गट ),लोकजनशक्ती पक्ष, जनता दल सेक्युलर,जय मल्हार क्रांती संघटना,तसेच प्रहार संघटना, राष्ट्रीय स्वराज्य सेना, महाराष्ट्र क्रांती सेना,लहुजी सेना,लहुजी शक्ती सेना ,ह्या मित्र पक्षांच्या पदाधिकाऱ्यांसह सर्व आजी माजी लोकप्रतिनिधी व प्रमुख पदाधिकारी यांच्या उपस्थितीत संपन्न होणाऱ्या बैठकीत प्रचाराचे नियोजन करण्यात येईल असेही खर्डेकर यांनी स्पष्ट केले.

पुणे,दि.७: पुणे लोकसभा मतदार संघाअंतर्गत शिवाजीनगर विधानसभा मतदार संघातील मतदान केंद्रावर नियुक्त ३ हजार २७५ अधिकारी,कर्मचाऱ्यांना ईव्हीएम व व्हीव्हीपॅट हाताळणीबाबत शिवाजीनगर येथील अभियांत्रिकी महाविद्यालयात प्रशिक्षण
देण्यात आले.

यावेळी सहायक निवडणूक निर्णय अधिकारी दादासाहेब गीते, नायब तहसीलदार सायली धस, मनुष्यबळ व प्रशिक्षण नोडल अधिकारी गजानन देशमुख उपस्थित होते.

दोन दिवसीय प्रशिक्षण सत्राच्या पहिल्या दिवशी मार्गदर्शन करताना श्री. गीते यांनी निवडणूक प्रक्रियेची माहिती दिली. भारतीय लोकशाहीचे घटक असल्याची भावना मनात ठेवून प्रत्येकाने कर्तव्यात आपापली जबाबदारी पार पाडावी, मतदानाचे दिवशी मतदान अधिकारी म्हणून कर्तव्य बजावत असताना भारत निवडणूक आयोगाने दिलेल्या सूचनांचे काटेकोरपणे पालन करावे, असे त्यांनी सांगितले.

यावेळी प्रशिक्षणार्थींना सुलभ संदर्भासाठी मतदान केंद्राध्यक्ष मार्गदर्शिकांचे वितरण करण्यात आले. उपस्थितांना ईव्हीएम व व्हीव्हीपॅटच्या हाताळणीचे प्रात्यक्षिक दाखविण्यात आले. कर्मचाऱ्यांच्या शंकांचे श्री. गीते यांनी यावेळी निरसन केले.

पुणे : जनतेचे प्रश्न सोडवण्यासाठी सदैव धावून जाणारा कार्यकर्ता म्हणून ओळख असलेल्या धंगेकर यांना कोथरूडच्या मेळाव्यात नागरिकांनी ४२ हजाराचा निधी जमा करून दिला आहे.

पुणे लोकसभा निवडणुकीसाठी काँग्रेस पक्षाकडून रवींद्र धंगेकर यांच्या नावाची घोषणा झाल्यानंतर गाठीभेटी, मेळाव्याच्या माध्यमातून धंगेकर यांचा प्रचारही सुरू आहे. कोथरूड विधानसभा मतदारसंघात महाविकास आघाडीच्या कार्यकर्त्यांचा नुकताच मेळावा संपन्न झाला. या मेळाव्यात आमदार रवींद्र धंगेकर यांना कार्यकर्त्यांनी स्वइच्छेने निधी जमा केलेल्या निधीची पिशवी धंगेकर यांना भेट म्हणून दिली. “आम्हाला तुमची आर्थिक परिस्थिती माहिती आहे. त्यामुळेच आम्ही लोकसहभागातून जमा केलेला निधी फुल ना फुलाची पाकळी स्वरूपात तुम्हाला भेट म्हणून देत आहोत”, असे सांगत सुट्या पैशांची पिशवी दिली.

लोकसभेची उमेदवारी देवून काँग्रेस पक्षाने, महाविकास आघाडीने रवींद्र धंगेकर यांच्यावर नवा विश्वास टाकला आहे. अचानक ही नवी जबाबदारी धंगेकर यांच्या खांद्यावर आली आहे. त्यामुळे आर्थिक अडचण भासू नये म्हणून त्यांच्या कुटुंबातील एक घटक म्हणून आम्ही लोकसहभागातून जमा केलेली रक्कम त्यांना आज दिली. हा निधी जमा करताना दहा रुपयांपासून शंभर रुपयांपर्यंतची मदत कोथरुडकर नागरिकांनी केली आहे, अशी माहिती कोथरुड विधानसभा मतदारसंघाचे ब्लॉक उपाध्यक्ष विजय खळदकर यांनी दिली.

यावेळी बोलताना रवींद्र धंगेकर म्हणाले, जनतेचे प्रेम हेच माझे बळ आहे. मी आर्थिक अडचणीत आहे, असे आजवर कोणाला सांगितले नव्हते. पण, न सांगताही कार्यकर्त्यांना, जनतेला मनातले कळते. यातून माझे आणि जनतेचे नाते किती घट्ट आहे, हेच दिसते. जनतेसोबत असलेले आपुलकीचे नाते टिकून असल्यानेच मी या निवडणुकीत विजयी होणार, असा मला विश्वास आहे. जनतेचे ऋण मी कधीही विसरणार नाही.

दरम्यान, रवींद्र धंगेकर यांनी या निधीची पिशवी निवडणूक खर्चासाठी पक्षाचे पदाधिकारी चंदूशेठ कदम यांच्याकडे सुपूर्द केली.

पुणे , 07 एप्रिल 24

आंतरराष्ट्रीय योग दिवसाला 75 दिवस बाकी असताना त्याची उलटगणना सुरू करण्याच्या सोहळ्यानिमित्त पुण्यामध्ये वाडिया महाविद्यालयाच्या क्रीडांगणात आयोजित केलेल्या योग महोत्सवाला योगप्रेमींनी प्रचंड मोठा प्रतिसाद दिला. भारत सरकारच्या आयुष मंत्रालयाची राष्ट्रीय निसर्गोपचार संस्था आणि मोरारजी देसाई राष्ट्रीय योग संस्था यांनी संयुक्तपणे या महोत्सवाचे आयोजन केले होते. 7 एप्रिल रोजी पहाटे 6 वाजता सुरू झालेल्या कॉमन योगा प्रोटोकॉल (CYP) च्या सरावात हजारो योगप्रेमींनी सक्रीय सहभाग घेतला. उत्साह आणि सहभागाच्या या उल्लेखनीय प्रदर्शनातून वैयक्तिक आणि सामाजिक कल्याणासाठी योगाभ्यासाचे वाढते महत्त्व अधोरेखित होत झाले . या कार्यक्रमाला विश्वास मंडलिक, अध्यक्ष, योग विद्या गुरुकुल, नाशिक, प्रतिष्ठित योगगुरू, विजयालक्ष्मी भारद्वाज, संचालक, आयुष मंत्रालय, डॉ. सत्यलक्ष्मी, संचालक, राष्ट्रीय निसर्गोपचार संस्था, पुणे आणि वैद्य डॉ. काशिनाथ समागंडी, MDNIY चे संचालक उपस्थित होते. त्यांच्या सहभागामुळे योगशास्त्राला प्रोत्साहन देण्याची आणि व्यक्ती आणि समाजाच्या कल्याणासाठी प्रयत्न करण्याची बांधिलकी प्रदर्शित होऊन या कार्यक्रमाची शोभा आणखी वृद्धिंगत झाली.

आयुष मंत्रालय, राज्य सरकारचे वरिष्ठ अधिकारी, अनेक मान्यवर आणि तज्ञ या कार्यक्रमाला उपस्थित होते.

यावेळी बोलताना , आयुष मंत्रालयाचे उपमहासंचालक सत्यजित पॉल म्हणाले, अतिशय निसर्गरम्य वातावरणात या अद्भुत योग महोत्सवाचे आयोजन पुण्यात होत आहे ही अतिशय आनंदाची आणि अभिनंदनाची बाब आहे. निरोगी आणि अधिक चांगल्या भविष्यासाठी योगसाधना ही एक जागतिक चळवळ आहे. यावेळी त्यांनी उपस्थितांनी इतक्या मोठ्या प्रमाणात प्रतिसाद दिल्याबद्दल त्यांची प्रशंसा केली आणि त्यांचे अभिनंदन केले.

आंतरराष्ट्रीय योग दिन-2024 हा दहावा आंतरराष्ट्रीय योग दिन आहे. यापूर्वीच्या वर्षांमध्ये झालेल्या कार्यक्रमांच्या आधारावर योग महोत्सव 2024 योगसाधनेच्या पुनरुत्थान सोहळ्याचे प्रतिनिधित्व करत असून या अंतर्गत उलट गणनेच्या अनेक कार्यक्रमांचा समावेश आहे.

योगविद्या गुरुकुल, नाशिक चे अध्यक्ष विश्वास मंडलिक यावेळी बोलताना म्हणाले, की योगसाधना ही भारताच्या समृद्ध वारशाची एक अद्भुत देणगी आहे जिने संपूर्ण जगाला निरोगी स्थान बनवण्यासाठी अनेक लाभ दिले आहेत. मुळामध्ये योग म्हणजे एक आध्यात्मिक शिस्तबद्धता आहे जी मन आणि शरीर यामध्ये सुसंवाद निर्माण करणाऱ्या सूक्ष्म विज्ञानावर आधारित आहे.

योगसाधनेचा अंगिकार करून व्यक्ती निरोगी, आनंदी आणि अधिक परिपूर्ण जीवन जगण्याच्या त्याच्या क्षमतेचा पुरेपूर वापर करून आत्म-सुधारणेच्या प्रवासाचा प्रारंभ करते.

आजच्या भव्य कार्यक्रमात सामाईक योग शिष्टाचाराला मोठ्या प्रमाणावर महत्त्व देण्यात आले. मान्यवरांच्या भाषणानंतर मोरारजी देसाई राष्ट्रीय योग संस्थेच्या योगतज्ञांकडून संस्थेच्या संचालकांच्या नेतृत्वाखाली योगसाधनेची प्रात्यक्षिके सादर करण्यात आली, ज्यामध्ये 5000 पेक्षा जास्त योग साधकांना सामाईक योग शिष्टाचाराचे सादरीकरण केले. या कार्यक्रमाचे आयुष मंत्रालय, एमडीएनआयवाय आणि इतर योग संस्थांच्या विविध समाज माध्यमांद्वारे थेट प्रसारण करण्यात आले. भारतीय योग संस्थेने त्यांच्या महाराष्ट्र शाखेसोबत आंतरराष्ट्रीय योग दिवस-2024 च्या 75व्या दिवसाला देखील पाठबळ दिले.

बारामती दि. ७ : लोकशाहीच्या सर्वात मोठ्या उत्सवात सहभागी होऊन निवडणूक सुरळीतपणे पाडणे ही सामुहिक जबाबदारी आहे; सर्व अधिकारी व कर्मचाऱ्यांनी एकमेकांशी संवाद साधत संघभावनेने, समन्वयाने काम करावे, असे प्रतिपादन जिल्हा निवडणूक अधिकारी तथा जिल्हाधिकारी डॉ.सुहास दिवसे यांनी केले.

बारामती विधानसभा मतदार संघातील मतदान केंद्रांवर नियुक्त केंद्राध्यक्ष, सहाय्यक केंद्राध्यक्ष व इतर सहायक कर्मचारी यांच्याकरीता माळेगाव येथील अभियांत्रिकी महाविद्यालयात आयोजित प्रशिक्षण सत्रात ते बोलत होते. यावेळी बारामती विधानसभा मतदारसंघाचे सहायक निवडणूक निर्णय अधिकारी वैभव नावडकर, अतिरिक्त सहायक निवडणूक निर्णय अधिकारी तथा तहसीलदार गणेश शिंदे, नायब तहसीलदार तुषार गुंजवटे आदी उपस्थित होते.

डॉ. दिवसे म्हणाले, जिल्ह्यात निवडणुकीसाठी चांगली तयारी करण्यात आली आहे. निवडणुक विषयक कामकाजासाठी नियुक्त अधिकारी व कर्मचारी, विशेषत: महिला कर्मचाऱ्यांची कोणतीही गैरसोय होणार नाही याबाबत दक्षता घ्यावी. महिला कर्मचाऱ्यांची सुरक्षा व्यवस्था तसेच अधिकारी व कर्मचाऱ्यांची वाहतूक व्यवस्था, अल्पोहार, भोजन, निवास व्यवस्था आदीबाबत काळजी घ्यावी. आरोग्यविषयक सुविधेकरीता २०० रुग्णालयासोबत करार करण्यात आले आहेत.

प्रत्येक निवडणूक प्रक्रियेत काही बदल होत असतात. त्यानुसार अधिकारी व कर्मचाऱ्यांनी नवीन बदल समजून घेऊन त्याप्रमाणे कार्यवाही करणे गरजेचे आहे. निवडणूक प्रक्रिया सुरळीत पार पाडण्यासाठी वेळेला फार महत्व आहे, त्यादृष्टीने कामकाजाचे सूक्ष्म नियोजन करावे. या प्रशिक्षणाचा लाभ येत्या निवडणुकीत होणार असल्याने प्रशिक्षण काळजीपूर्वक पूर्ण करावे. निवडणुक प्रक्रियेत सहकारी तसेच मतदारांसोबत चांगला संवाद ठेवा, अशा सूचना डॉ. दिवसे यांनी दिल्या.

दोन दिवसीय प्रशिक्षण सत्रात एकूण २ हजार ६०० अधिकारी व कर्मचाऱ्यांना प्रशिक्षण देण्यात आले. प्रशिक्षणामध्ये मतदान प्रक्रियेसंबंधी विविध पैलूंची श्री. नावडकर यांनी सादरीकरणाद्वारे माहिती दिली.

यावेळी ईव्हीएम, व्हीव्हीपॅट यंत्राची जोडणी, हाताळणी, यंत्र चालू व बंद करणे तसेच सील करणे याबाबतचे प्रत्यक्ष प्रात्यक्षिक सहायक निवडणूक अधिकारी तहसीलदार श्री. शिंदे यांच्या मार्गदर्शनाखाली देण्यात आले.