‘वेध :भारतीय लोकशाहीचा ‘ व्याख्यान सत्राला प्रतिसाद-हिंदू- मुस्लीम संबंधांची वीण कायम राहील : अशोक वानखेडे

पुणे :
पुणे सिव्हिल सोसायटी ‘ आयोजित ‘वेध :भारतीय लोकशाहीचा ‘ व्याख्यान सत्राला शनिवारी सायंकाळी चांगला  प्रतिसाद मिळाला.ज्येष्ठ पत्रकार अशोक वानखेडे यांचे प्रमुख भाषण झाले. युवक क्रांती दलाचे संस्थापक  डॉ.कुमार सप्तर्षी अध्यक्ष स्थानी होते.   कोंढव्यातील नागरिक मोठया प्रमाणावर उपस्थित होते.
सिटी लॉन्स(कोंढवा) येथे  झालेल्या या व्याख्यान सत्राचे आयोजन अली इनामदार, निवृत्त सहायक पोलिस आयुक्त  मिलिंद गायकवाड, अनीस अहमद, युनूस तांबटकर , जांबुवंत मनोहर यांनी केले. २७ एप्रिल रोजी सायंकाळी  हे व्याख्यान सत्र झाले. मिलिंद गायकवाड यांनी प्रास्ताविक केले. अनीस अहमद यांनी संविधानाच्या उद्देशिकेचे वाचन केले. जांबुवंत मनोहर यांनी सूत्र संचालन केले.
माजी आमदार महादेव बाबर,राष्ट्रवादी कॉंग्रेस (शरदचंद्र पवार ) पक्षाचे शहराध्यक्ष प्रशांत जगताप,डॉ.प्रवीण सप्तर्षी,उमेश चव्हाण, संजय आल्हाट, दत्ता पाकिरे,सुदर्शन चखाले आदी उपस्थित होते.
अशोक वानखेडे म्हणाले, ‘हिंदू मुस्लिम समुदायामध्ये सातत्याने भांडणे, दंगली घडवून आणण्याचे प्रयत्न केले गेले. या कट कारस्थानांना कोणी बळी पडत नाही, हे देशाचे भाग्य आहे.हिंदू- मुस्लीम संबंधांची वीण घटट् असून ती बिघडविण्याचे संबंध यशस्वी होणार नाहीत.

 ‘संविधान सर्वोच्च आहे आणि तेच सातत्याने पुढे आणले पाहिजे. या निवडणुकीत हुकूमशाही ला बाजूला केलें पाहिजे, अन्यथा संविधान जाईल,मनुस्मृती येईल. गुलामगिरी आणि वर्ण व्यवस्था पुन्हा येवू घातली आहे.नरेंद्र मोदी यांच्या काळात पंतप्रधान पदाची प्रतिष्ठा कमी झाली. कॉंग्रेसचा जाहीरनामा इंग्रजीत असल्याने पंतप्रधानांना समजत नसावा, असा टोलाही वानखेडे यांनी लावला.
देशाला रसातळाला नेण्याचे काम मोदी यांच्या कार्यकाळात झाल्याने या निवडणुकीत परिवर्तन करून दाखवावे, असे आवाहन वानखेडे यांनी केले.
अध्यक्षस्थानावरुन बोलताना डॉ. कुमार सप्तर्षी म्हणाले, ‘देशात जनताच सर्वोच्च आहे. लोकप्रतिनिधी सर्वोच्च नाहीत. त्यामुळे या निवडणुकीत राजकीय शहाणपणाचा निर्णय जनतेने घेतला पाहिजे. संघ परिवाराला नरेंद्र मोदी हवे असले तरी जनतेला नको आहेत. व्यापारी व्यक्ती सत्तेवर आल्यावर प्रजा भिकारी होते.   मोदी यांनी प्रत्येक निर्णयात , परदेश दौऱ्यात अदानींचे भले केले. मग ,हे पंतप्रधान आहेत की सेल्समन ? असा सवाल डॉ. सप्तर्षी यांनी विचारला.
 पुण्यात ज्या पक्षाचा खासदार असतो, त्या पक्षाची सत्ता देशात येते. हे पुणेकरांनी लक्षात घेऊन भाजप विरोधी   मतदान केले पाहिजे. अन्यथा आपले सर्वांचे भवितव्य धोक्यात येईल. माणसाला माणसाशी जोडतो तो धर्म असतो. पण, राजकारणात धर्म आणून भाजपाने वाट लावली आहे. खरा हिंदू धर्म सहिष्णू आहे, सत्याला मानणारा आहे. ही प्रतिमा आपण बिघडू देता कामा नये, असे आवाहन डॉ. सप्तर्षी यांनी केले.

पुणे : “समाजात चांगल्या अर्थाने बदल घडण्यासाठी समिती कार्यरत आहे. गरजू, होतकरू विद्यार्थ्यांच्या जडणघडणीतून आम्ही समाजात ऑक्सिजन पेरतो. समितीच्या मदतीने घडलेले विद्यार्थी, समितीशी जोडलेले कार्यकर्ते याच विचारातून काम करतात. रोश कंपनीने सीएसआरमध्ये समितीला दिलेली ही देणगी महत्त्वपूर्ण आहे. सामाजिक विचारातून विद्यार्थ्यांच्या जडणघडणीसाठी त्यांनी लावलेला हातभार आनंददायी आहे. देणगीच्या माध्यमातून रोश कंपनी समितीशी जोडली गेली असून, आपल्यातील हे नाते दीर्घकाळ राहील,” असे उद्गार विद्यार्थी साहाय्यक समितीचे अध्यक्ष प्रतापराव पवार यांनी काढले.
सामाजिक उत्तरदायित्व योजनेखाली (सीएसआर) रोश कंपनीने विद्यार्थी साहाय्यक समितीला २४ लाख ६० हजारांची देणगी दिली. त्याचा धनादेश शनिवारी झालेल्या कार्यकर्ता मंडळाच्या बैठकीत सुपूर्द करण्यात आला. यावेळी प्रतापराव पवार बोलत होते. कंपनीचे इंडिया हेड श्री. राजा, सीएसआर प्रतिनिधी कृष्णपाल सिंग, ज्ञानेश्वर घुगे आणि त्यांचे इतर सहकारी उपस्थित होते. 
देणगीमागची भावना व्यक्त करताना श्री. राजा म्हणाले, “केवळ पैसे देणे एवढाच आमचा यामागचा उद्देश नाही, तर त्यातून समाजात परिवर्तन झाले पाहिजे, असा आमचा उद्देश असतो. समितीचे काम खूप चांगले आहे. विद्यार्थ्यांना घडवताना त्यांना उद्योजकतेचे धडे देण्याचे आपले प्रयत्न बदलत्या काळाशी सुसंगत आहेत. या कामाला आर्थिक मदत तर करूच, पण  थेट या कामातही मदत करायला आम्हाला आवडेल.” कृष्णपाल सिंग यांनीही मनोगत व्यक्त केले.

पुणे, दि. २८: पिंपरी-चिंचवड महानगरपालिकेच्या सर्व क्षेत्रीय कार्यालयांमध्ये मतदारांच्या सोयीसाठी १ ते १३ मे या कालावधीत ‘नो युवर पोलिंग स्टेशन’ (मतदान केंद्राविषयी जाणून घ्या) कक्ष सुविधेद्वारे मतदारांना मतदानाच्या अनुषंगाने मतदान केंद्राची माहिती देण्यात येणार आहे; या सुविधेचा शहरातील अधिकाधिक मतदारांनी लाभ घ्यावा, असे आवाहन महानगरपालिकेच्यावतीने करण्यात आले आहे.

या कक्षासाठी क्षेत्रीय कार्यालयनिहाय क्षेत्रीय अधिकाऱ्यांची नियंत्रण अधिकारी म्हणून नियुक्ती करण्यात आहे. सुचेता पानसरे यांची ‘अ’ क्षेत्रीय कार्यालय, निगडी प्राधिकरण, अमर पंडीत ‘ब’ क्षेत्रीय कार्यालय, चिंचवड, अण्णा बोदडे, ‘क’ क्षेत्रीय कार्यालय, भोसरी, अंकुश जाधव, ‘ड’ क्षेत्रीय कार्यालय, रहाटणी, राजेश आगळे, ‘ई’ क्षेत्रीय कार्यालय, भोसरी, सिताराम बहुरे, ‘फ’ क्षेत्रीय कार्यालय, निगडी, अजिंक्य येळे, ‘ग’ क्षेत्रीय कार्यालय, थेरगाव आणि उमेश ढाकणे, ‘ह’ क्षेत्रीय कार्यालय, कासारवाडी याप्रमाणे नियुक्त्या करण्यात आल्या आहेत.

येत्या १३ मे रोजी होणाऱ्या मतदानाचा टक्का वाढविण्याच्याअनुषंगाने या कक्षाची १ मे पासून स्थापना करण्यात येणार आहे. सुट्टीच्या दिवशीही कक्ष सुरु राहणार असून या कक्षाद्वारे लोकसभा सार्वत्रिक निवडणुकीच्या अनुषंगाने नागरिकांच्या समस्यांचे निराकरण करण्यात येणार आहे. या संधीचा मतदारांनी लाभ घ्यावा व येत्या मतदानाच्यावेळी अधिकाधिक मतदारांनी मतदान करावे, असे आवाहन पिंपरी-चिंचवड महानगरपालिकेचे आयुक्त शेखर सिंह यांनी केले आहे.

महाराष्ट्रातील विविध जिल्ह्यांतील २५ पुरुष संघ व २० महिला संघांचा सहभाग

पिंपरी, पुणे (दि. २८ एप्रिल २०२४) – महाराष्ट्र अँमॅच्युअर नेटबॉल संघटनेच्या मान्यतेने, पिंपरी चिंचवड अभियांत्रिकी महाविद्यालय, निगडी, पुणे जिल्हा नेटबॉल संघटना व विठ्ठलशेठ सोमाजी काळभोर चॅरिटेबल फाउंडेशन यांच्या संयुक्त विद्यमाने २७ ते २९ एप्रिल या कालावधीत १७ वी वरीष्ठ गट (पुरुष व महिला) राज्यस्तरीय नेटबॉल स्पर्धेचे आयोजन पीसीसीओई मैदानावर करण्यात आले आहे. सदर स्पर्धेमध्ये महाराष्ट्रातील विविध जिल्ह्यांतील २५ पुरुष संघ व २० महिला संघानी सहभाग नोंदविला आहे.
स्पर्धेच्या उद्घाटन प्रसंगी महाराष्ट्र अँमॅच्युअर नेटबॉल संघटनेचे सचिव डॉ. ललित जीवानी, पुणे जिल्हा नेटबॉल संघटनेचे सचिव मानसिंग वाबळे, विठ्ठलशेठ सोमाजी काळभोर चॅरिटेबल फाउंडेशनचे अध्यक्ष हरिश्चंद्र काळभोर, सचिव गोरख भालेकर, कोषाध्यक्ष चेतन काळभोर, साहिर सिकीलकर आदी उपस्थित होते.
प्रथमच पीसीसीओईला राज्यस्तरीय स्पर्धा आयोजनाचा मान मिळाला आहे. स्पर्धा साखळी व बाद पद्धतीत होणार आहेत. पहिल्या दिवशीच्या साखळी सामन्यात पुणे, गोंदिया, शाहूनगर, भंडारा पुरुष संघानी पाहिले सामने जिंकून पुढे आगेकूच केली.
पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पीसीसीओईचे संचालक डॉ. गोविंद कुलकर्णी यांनी राज्यस्तरीय नेटबॉल स्पर्धेसाठी आयोजकांना आणि खेळाडूंना शुभेच्छा दिल्या. सूत्रसंचालन व स्पर्धेचे आयोजन पीसीसीओईचे शारीरिक शिक्षण संचालक प्रा. संतोष पाचारणे यांनी केले.

पिंपरी (दि. २८ एप्रिल २०२४) पीसीसीओईचा माजी विद्यार्थी शुभम भगवान थिटे याने यूपीएससी परीक्षेत मिळविलेले उल्लेखनीय यश कौतुकास्पद आहे. त्याचा पीसीईटी व्यवस्थापनाच्या वतीने सत्कार करताना आम्हाला अभिमान वाटतो असे पीसीईटीचे सचिव विठ्ठल काळभोर यांनी सांगितले.
पीसीसीओईचा २०१८ च्या मेकॅनिकल विभागाचा माजी विद्यार्थी शुभम थिटे याने नुकत्याच जाहीर झालेल्या यूपीएससी परीक्षेत उल्लेखनीय यश मिळवले. त्याचा सत्कार काळभोर यांच्या हस्ते ट्रस्ट कार्यालयात शुक्रवारी करण्यात आला. यावेळी पीसीईटीचे अध्यक्ष ज्ञानेश्वर लांडगे, उपाध्यक्ष पद्माताई भोसले, खजिनदार शांताराम गराडे, विश्वस्त तथा पीसीयूचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पीसीसीओई चे उपसंचालक डॉ. निळकंठ चोपडे, मेकॅनिकल विभाग प्रमुख डॉ. पद्माकर देशमुख आदी उपस्थित होते.
यावेळी काळभोर यांनी सांगितले की, ३३ वर्षापूर्वी स्वर्गीय शंकरराव बाजीराव पाटील यांनी स्थापन केलेल्या पिंपरी चिंचवड एज्युकेशन ट्रस्टच्या आकुर्डी येथील कॅम्पस मध्ये अभियांत्रिकी, आर्किटेक्चर, व्यवस्थापन अशा विविध शाखांमध्ये पदविका, पदवी, पदव्युत्तर उच्च व आधुनिक शिक्षण देण्याची व्यवस्था आहे. तसेच रावेत यथील कॅम्पस मध्ये केजी टू पीएचडी पर्यंत शिक्षण घेण्याची सुविधा उपलब्ध करून देण्यात आली आहे. तळेगाव येथील एनएमआयटी या अभियांत्रिकी महाविद्यालयाचे व्यवस्थापन देखील पीसीईटी करीत आहे. पुणे मुंबई महामार्ग लगत वडगाव मावळ जवळील साते येथे पिंपरी चिंचवड विद्यापीठ संकुलात मागीलवर्षी पासून सुरू झालेल्या अभियांत्रिकी, व्यवस्थापन सह विविध शाखांमधून सुमारे बाराशे विद्यार्थ्यांनी पदवी व पदव्युत्तर उच्च शिक्षणासाठी प्रवेश घेतला आहे. पीसीईटी च्या सर्वच कॅम्पस मध्ये आधुनिक तंत्रज्ञान युक्त उच्च दर्जाच्या प्रयोगशाळांसह उच्च विद्या विभूषित प्रशिक्षित प्राध्यापक वर्ग विद्यार्थ्यांना मार्गदर्शन करण्यास कार्य तत्पर आहेत. नेहमीच्या शैक्षणिक अभ्यासाबरोबर स्पर्धा परीक्षा व तसेच इतर उच्च शिक्षणा साठीच्या परीक्षा तयारी देखील येथे करवून घेतली जाते. या साठी स्टडी सर्कल नावाने स्वतंत्र क्लब देखील बनविन्यात आला आहे. महाविद्यालयातून आत्तापर्यंत ३ माजी विद्यर्थ्यांनी यूपीएससी परीक्षा उत्तीर्ण केली असून बऱ्याच माजी विद्यार्थ्यांनी एमपीएससी मध्ये यश मिळवले आहे. शिक्षणाबरोबरच विद्यार्थ्यांचा सर्वांगीण विकास व्हावा यासाठी व्यवस्थापन नेहमीच प्रोत्साहन देत असते.

‘बस अँड कार ऑपरेटर्स’च्या वतीने बस चालक-मालकांचा वार्षिक स्नेहमेळावा

पुणे : “देशातील सर्वाधिक प्रवासी वाहतूक सार्वजनिक वाहतुकीच्या साधनांद्वारे होते. पायाभूत सुविधा, चांगले रस्ते, तंत्रज्ञानाचा अंतर्भाव, वाहतूक जनजागृती, कायद्याची कठोर अंमलबजावणी यातून सार्वजनिक वाहतूक व्यवस्था अधिक सक्षम व सुरक्षित करण्यावर भर दिला जात आहे. या प्रयत्नाला ‘प्रवास ४.०’सारखे कार्यक्रम पूरक आहेत,” असे प्रतिपादन सहपरिवहन आयुक्त जितेंद्र पाटील यांनी केले.बस अँड कार ओनर्स कॉन्फेडरेशन ऑफ इंडिया (बीओसीआय), पुणे बस अँड कार ओनर्स असोसिएशन आणि पिंपरी-चिंचवड बस अँड कार ओनर्स असोसिएशन यांच्या संयुक्त विद्यमाने आयोजित भारतातील सर्वात मोठे वाहतूक प्रदर्शन असलेल्या ‘प्रवास ४.०’च्या माहिती पुस्तिकेचे अनावरण, तसेच वाहतूक सुरक्षा जनजागृतीपर ध्वनिचित्रफितीचे लोकार्पण करण्यात आले. ‘प्रवास ४.०’ हे महाप्रदर्शन यंदा २९ ते ३१ ऑगस्ट २०२४ या कालावधीत बंगळुरू येथे होणार आहे.

बालेवाडी येथील हॉटेल ऑर्चिड येथे झालेल्या या कार्यक्रमात बीव्हीजी ग्रुपचे संस्थापक हनुमंतराव गायकवाड, अभिनेता देवदत्त नागे, सहायक परिवहन अधिकारी सुरेश आव्हाड, पुणे प्रादेशिक परिवहन अधिकारी संजीव भोर, पिंपरी चिंचवड उपप्रादेशिक परिवहन अधिकारी अतुल आदे, ‘बीओसीआय’चे अध्यक्ष प्रसन्न पटवर्धन, चेअरमन जगदेव सिंह खालसा, महासचिव अल्लाह बक्ष अफजल, खजिनदार हर्ष कोटक, पुणे बस अँड कार ओनर्स असोसिएशनचे अध्यक्ष राजन जुनवणे, पिंपरी-चिंचवडचे अध्यक्ष दत्तात्रय भेगडे, संयोजक किरण देसाई, तुषार जगताप, बालकलाकार हर्षित देसाई यांच्यासह पदाधिकारी व सभासद मोठ्या संख्येने उपस्थित होते. यावेळी पुणे बस अँड कार ओनर्स असोसिएशनची वार्षिक सर्वसाधारण सभा पार पडली.

जितेंद्र पाटील म्हणाले की, महामार्ग मोठ्या प्रमाणात वाढले आहेत. परिणामी वाहनांचा वेगही वाढला आहे. त्यातून होणाऱ्या अपघातांना रोखण्याचे आव्हान आहे. खासगी वाहनांची संख्या वाढत असताना सार्वजनिक वाहतुकीवर अधिक भर दिला, तर वाहतूक कोंडी, प्रदूषण यावरही नियंत्रण आणता येईल. त्यादृष्टीने धोरणात्मक निर्णय घेऊन येत्या काळात सार्वजनिक वाहतुकीला सक्षम करण्यासाठी पावले उचलण्यात येत आहेत. स्मार्ट पोलिसिंग, आयटीएमएस प्रणाली अमलात आणली जात आहे.”

प्रसन्न पटवर्धन म्हणाले, “देशातील सर्वाधिक ८० टक्के प्रवासी वाहतूक सेवा देणारे आपले क्षेत्र आहे. जगभर बदल होताहेत, तंत्रज्ञान अंतर्भूत होत आहे. त्यामुळे येत्या काळात सार्वजनिक वाहतुकीला चांगले दिवस येतील असा विश्वास वाटतो. सार्वजनिक वाहतुकीला प्रोत्साहन, कर सवलत, चांगल्या पायाभूत सुविधा व दर्जा देण्याची आवश्यकता आहे. खासगी बस वाहतूक सेवेकडून लोकांना अनेक अपेक्षा आहेत. त्या पूर्ण करण्यासाठी आपण सुरक्षेच्या बाबतीत तडजोड न करता उत्तम सेवा द्यावी.”

हनुमंतराव गायकवाड म्हणाले, “कोणत्याही क्षेत्रात चांगली व सुरक्षित सेवा दिली, तर ग्राहक नेहमीच समाधानी असतो. सुरक्षित प्रवासाला लोकांचे प्राधान्य असते. त्यामुळे सार्वजनिक वाहतूक जितकी सुरक्षित व आरामदायी होईल, तितका चांगला प्रतिसाद प्रवासी देतील. वाहतूकदारानी नावीन्यतेचा, तंत्रज्ञानाचा अंतर्भाव करून चांगली सेवा देण्यावर भर दिला पाहिजे.”

देवदत्त नागे म्हणाले, “रस्ते सुरक्षेचा मुद्दा अतिशय महत्वाचा असून, त्याबाबत जनजागृती करणारी ध्वनिफीत आहे. सर्वसामान्य प्रवाशांपर्यंत रस्ते सुरक्षेची माहिती पोहोचवायला हवी. प्रवासादरम्यान सुरक्षेच्या आवश्यक त्या सर्व बाबी आपण पाळल्या पाहिजेत.” हर्षित देसाई याने यावेळी आपल्या अभिनयाची झलक दाखवली. तसेच वाहतुकीचे नियम पाळण्याचे आवाहन केले.

जगदीश सिंह खालसा यांनीही विचार मांडले. राजन जुनवणे यांनी स्वागत-प्रास्ताविक केले. मेघना एरंडे यांनी सूत्रसंचालन केले. किरण देसाई यांनी आभार मानले.

– नेत्यांपेक्षा संविधान वाचवणे महत्वाचे–– टेक्सास गायकवाड यांचे मत

पुणे

वंचितमुळे मागील निवडणुकीत भाजपला ताकत मिळाली, हे आंबेडकरी जनतेला समजले आहे. त्यामुळे आंबेडकरी जनता व अनुयायी वंचितच्या सभांना गर्दी करतील. मात्र, देशाचे संविधान आणि लोकशाही वाचवण्यासाठी आंबेडकरी जनता महाविकास आघाडीच्या पाठीमागे उभी राहिल आणि आघाडीच्याच उमेदवारांना मतदान करतील, असा विश्वास आंबेडकरी चळवळीतील संघर्षशील नेतृत्व, प्रबुद्ध साहित्यिक, भीमपुत्र, भारतीय रक्षक आघाडी प्रमुख टेक्सास गायकवाड यांनी व्यक्त केला.

पुणे लोकसभा मतदार संघातील महाविकास आघाडी व इंडिया आघाडीचे काँग्रेस पक्षाचे उमेदवार रवींद्र धंगेकर यांच्या प्रचारार्थ शनिवारी काँग्रेस भवन येथे आयोजित केलेल्या पत्रकार परिषदेत टेक्सास गायकवाड बोलत होते. यावेळी काँग्रेस शहराध्यक्ष अरविंद शिंदे, प्रदेश उपाध्यक्ष व लोकसभा निवडणूक प्रचारप्रमुख मोहन जोशी, सरचिटणीस अजित दरेकर, सरचिटणीस वीरेंद्र किराड,संजय बालगुडे,राज्य प्रवक्ते गोपाळ तिवारी, प्रशांत सुरसे, राज अंबिके आदि उपस्थित होते.

गायकवाड म्हणाले, आज देश आणि देशाचे संविधान धोक्यात आहे, अशा वेळी कट्टर आंबेडकरवादी शांत बसत नाही. त्यामुळे मी भारतीय रक्षक आघाडीचा महाविकास आघाडीला पाठिंबा देण्यासाठी आलोय. मोदी यांच्या हाती देण्याची सत्ता गेली, आता हा माणूसदेशाचे वाटोळे करणार, हे मी ओळखले होते, त्यामुळे मी मोदींचीसत्ता आल्यावर 2014 मध्येच काळा दिवस साजरा केला. भारताचे हिटलर मोदी आहेत, तर अमित शहा गोबेल्स आहेत. या दोघांनी कोट्यावधी रुपये खर्च करून राहुल गांधींना पप्पू पप्पू म्हणून बदनाम केले. मोदी यांच्या कारभारामुळे देश अडचणीत आहे. त्यामुळे मोदी शहांना या निवडणुकीत मतदारांनी घडा शिकवला पाहिजे. आजचा काळ पक्ष वाचवण्याचा नाही तर संविधान वाचवण्याचा आहे. दहा वर्षानंतर भाजपने राहुल गांधी यांचे महत्व ओळखले. आज ते म्हणत आहेत, ही लढाई गावकी भावकीची नाही तर मोदी विरुद्ध राहुल गांधी अशी आहे.

आंबेडकरी जनतेने केंद्रीय राज्यमंत्री रामदास आठवले, अ‍ॅड प्रकाश आंबेडकर, बेहेन  मायावती यांचा बहुमान राखावा. मात्र त्यासोबतच संविधानाचाही विचार करावा. नेत्यांच्या मनापेक्षा संविधान व बाबासाहेबांचा मान महत्वाचा आहे. मागील लोकसभा निवडणुकीमध्ये वंचितमुळे भाजपला मदत झाली. हे आंबेडकरी जनतेला कळाले आहे. रामदास आठवले हे जातीयवादी व मनुवादी पक्षासोबत असल्याचेही आंबेडकरी जनतेला पटत नाही. त्यामुळे आंबेडकरी जनता प्रकाश आंबेडकर आणि आठवलेंच्या सभांना जातील. मात्र, पक्षाचा अभिनिवेष बाजूला ठेवून संविधान वाचवण्यासाठी महाविकास आघाडीला मतदान करेल.

आंबेडकरी विचाराच्या पक्षांनी आपला पक्ष ग्रामपंचायत, पंचायत समिती इथपासून वाढवण्यास सुरूवात करावी. मात्र, लोकसभेला जातीयवादी व संविधान संपवणार्‍या शक्तीला रोखण्यासाठी आता महाविकास आघाडीला साथ द्यावी. राहुल गांधींना आंबेडकरी जनतेने समजून घेतले पाहिजे, असेही टेक्सास गायकवाड म्हणाले.

प्रारंभी राज्य प्रवक्ते गोपाळ तिवारी यांनी प्रास्ताविक केले.