पुणे – व्यवस्थे विरुद्ध लिखान करणारा पत्रकार म्हणजे तो देशद्रोही अशा स्वरूपाच्या वर्गवार्‍या गेल्या काही वर्षांमध्ये पत्रकारीतेत तयार केल्या जाऊ लागल्या आहेत. पत्रकारीतेच्या अशा वर्गवार्‍या करणे हे लोकशाहीच्या दृष्टीने लांछनास्पद आहे. पत्रकारांनी सामान्य जनतेच्या प्रश्नांशी नाळ जोडली पाहिजे. जेव्हा पत्रकार सामान्यांच्या प्रश्नासाठी आवाज उठवतो, तेव्हा त्या पत्रकाराचा व्यवस्थेशी संघर्ष हा अटळ असतो. मात्र, पत्रकारांनी या संघर्षापासून पळ काढता कामा नये, असे परखड मत ज्येष्ठ पत्रकार अनंत बागाईतकर यांनी व्यक्त केले.
पत्रकार वरूणराज भिडे मित्र मंडळातर्पेâ अनंत बागाईतकर आणि डॉ. डी. वाय पाटील शिक्षण संस्थेचे कुलपती डॉ. पी. डी. पाटील यांच्या हस्ते पत्रकारीतेत उल्लेखनिय कार्य केल्याबद्दल समर खडस, शैलेश काळे, डी. के. वळसे-पाटील, अरूण म्हेत्रे यांना विशेष पुरस्कार देऊन गौरव केला. त्यावेळी बागाईतकर बोलत होते. यावेळी कॉग्रेसचे ज्येष्ठ नेते, आमदार उल्हासदादा पवार, राष्ट्रवादी (शरदचंद्र पवार पक्षाचे) प्रवक्ते अंकुश काकडे, निवड समितीचे सत्यजित जोशी, शैलेश गुजर, सुर्यकांत पाठक आदी यावेळी उपस्थित होते.
बागाईतकर म्हणाले, व्यवस्थेच्या बाजूने लिखान केल्यास तुम्ही पत्रकार, विरोधात लिखान केल्यास पत्रकारांवर विविध प्रकारचे शिक्के मारले जात आहेत. सध्याच्या घडीला वेगवेगळ्या माध्यमातून पत्रकारांवर दबाव टाकला जात आहे. कौतुक करणे हे पत्रकाराचे काम नाही हे लक्षात घेतले पाहिजे. समाजात घडणार्‍या गोष्टींचे बारकावे शोधून सत्यपरिस्थिती समाजापुढे मांडणे म्हणजे पत्रकारीता आहे. वस्तूनिष्ठ आणि अचूक असलेली बातमी कोणीही दाबू किंवा नाकारू शकत नाही. त्यामुळे बातमी लिहिताना ती वस्तूनिष्ठ आणि सोप्या शब्दांत असेल याची काळजी पत्रकारांनी घेतली पाहिजे. पत्रकार जेव्हा सामान्यांचे प्रश्न मांडतो तेव्हा त्याचा व्यावस्थेशी संघर्ष हा अटळ आहे. मात्र, पत्रकारांनी या संघर्षापासून पळ न काढता, दबावाला बळी न पडता सामान्यांचे प्रश्न मांडले पाहिजे. सध्याच्या घडीला तंत्रज्ञानाचे सर्वात मोठे आव्हान पत्रकारांपुढे उभे ठाकले आहे. मात्र, काही वेळा वस्तूनिष्ठता आणि अचूकपणाचा अभाव पत्रकारीतेत दिसतो. त्यामुळे तंत्रज्ञानाला वस्तूनिष्ठता आणि अचूकतेची जोड देण्यासाठी प्रयत्न झाला पाहिजे.
डॉ. पाटील म्हणाले, सध्या कृत्रिम बुद्धीमत्ता वाढत असून, त्यातून समाजात गैरसमज निर्माण केले जात आहेत. त्यामुळे पत्रकारीतेपुढे खर्‍या अर्थाने आव्हाने उभी ठाकली आहेत. पत्रकारांनी या आव्हानांचा सामना करताना संयम बाळगून वस्तूनिष्ठ गोष्टी सामान्य जनतेपर्यंत पोहचवल्या पाहिजे.
उल्हासदादा पवार म्हणाले, गेल्या काही वर्षांत पत्रकारांपुढील आव्हाने वाढत आहेत. तंत्रज्ञानाच्या काळात वस्तुनिष्ठ पत्रकारीता करताना पत्रकारांना अनेक अडचणींचा सामना करावा लागत आहे. मात्र, पत्रकार समर्थपणे ही आव्हाने पेलतील.
यावेळी समर खडस, शैलेश काळे, डी. के. वळसे-पाटील, अरूण म्हेत्रे यांनी मनोगत व्यक्त केले. अंकुश काकडे यांनी प्रास्ताविक केले. डॉ. शैलेश गुजर यांनी सूत्रसंचालन केले.

पुणे संघासाठी ४एस गटाची सर्वाधिक बोली

वाई एंटरप्रायझेस प्रायव्हेट लिमिटेडकडे नाशिक संघाची मालकी

कपिल सन्स ग्रुपने मिळवली रायगड फ्रॅंचाईजी

सोलापूर फ्रॅंचाईजीची मालकी रॉयल जिनियस स्पोर्ट्स प्रायव्हेट लिमिटेडकडे

पुणे – महाराष्ट्र क्रिकेट संघटनेच्या महिला प्रिमियर लीगसाठी चार संघांची मालकी घेण्यासाठी शनिवारी झालेल्या लिलाव प्रक्रियेत विक्रमी रुपयांची बोली लागली. चार संघांसाठी संघ मालकांनी तब्बल १५.९ कोटी रुपये खर्च केले.

सर्व राज्य संघटनांमध्ये महिला संघाच्या मालकीसाठी मिळालेला हा विक्रमी महसूल ठरला. महिलांसाठी स्वतंत्र ट्वेन्टी-२० लीग आयोजित करणारी महाराष्ट्र क्रिकेट संघटना ही एकमेव राज्य संघटना असून, लीगला २४ जूनपासून सुरुवात होणार आहे. स्पर्धेत एकूण १३ सामने खेळले जातील.

एमसीएचे अध्यक्ष रोहित पवार या कार्यक्रमाला उपस्थित राहू शकले नाहीत. पण, त्यांचा संदेश सचिव कलमेश पिसाळ यानी वाचून दाखवला. मला अभिमान आहे की एमसीए या नात्याने आम्हाला फ्रॅँचाईजी आधारीत महिला टी-२० लीगचे आयोजन करणारी पहिली संघटना म्हणून संधी मिळाली. गेल्या वर्षी एमपीएल खेळाडूंच्या लिलावात आम्ही महिला प्रिमियर लीगचे आयोजन करण्याचे वचन दिले होते. आम्ही आमचा शब्द पाळला आहे, असे रोहित पवार यांनी आपल्या संदेशात म्हटले आहे.

एमपीएलने आमच्या खेळाडूंना त्यांची प्रतिभा दाखविण्यासाठी व्यासपीठ उपलब्ध करून दिले. मला खात्री आहे की महिला प्रिमियर लीग देखील आमच्या महिला क्रिकेटपटूंसाठी असेच व्यासपीठ बनले. मला विश्वास आहे की महिला प्रिमियर लीगमधून भविष्यातील भारतीय खेळाडू उदयास येतील, असेही पवार यांनी आपल्या संदेशात नमूद केले.

एमपीएल आणि महिला प्रिमियर लीग चे अध्यक्ष सचिन मुळ्ये यांनी लिलावाचा तपशील आणि प्रक्रिया सर्व बोलीदारांपुढे सादर केली. एमपीएलमधील पुणेरी बाप्पा संघाचे मालक असलेल्या सुहाना सह्याद्री सुजनिल्स ४ एस समूहाने महिला प्रिमियर लीगमध्ये देखिल पुणे संघासाठी सर्वाधिक ५.१ कोटी रुपयाची बोली लावली. महिला संघ देखिल पुणेरी बाप्पा संघाने ओळखला जाईल. फ्रॅँचाईजीने भारताची उपकर्णधार स्मृती मानधनाची आपल्या संघाची आयकॉन खेळाडू म्हणून निवड केली.

वाई एंटरप्रायझेस प्रायव्हेट लिमिटेडने नाशिक संघासाठी ३.८ कोटी रुपयाची दुसरी सर्वोत्तम बोली लावली. त्यांनी भारताची आंतरराष्ट्रीय खेळाडू अनुजा पाटीलची आयकॉन खेळाडू म्हणून निवड केली.

सोलापूर रॉयल्सची मालकी असलेल्या कपिल सन्स समूहाने या वेळी रत्नागिरी संघासाठी ३.६ कोटी रुपयांची बोली लावली. कंपनीने पुढे आपल्या शहर आणि जिल्ह्यातील बदलाचा निर्णय घेत रायगड सोबत जाण्याचा निर्णय घेतला. या संघाचे नाव रायगड रॉयल्स असे असेल. या संघाने आक्रमक फलंदाज आंतरराष्ट्रीय खेळाडू किरण नवगिरे आपली आयकॉन खेळाडू म्हणून निवडले.

रॉयल जिनियस स्पोर्ट्स प्रायव्हेट लिमिटेडने ३.४ कोटी रुपयांत सोलापूर संघाची मालकी घेतली. त्यांनी देविका वैद्यला आयकॉन खेळाडू म्हणून निवडले.

लिलावापूर्वी एमसीएसच्या सर्वोच्च परिषदेचे सदस्य विनायक द्रविड, राजू काणे, रणजित खिरीड, सुशील शेवाळे, सुनील मुथा यांनी संघ मालकांचा सत्कार केला. कल्पना तापीकर यांनी आभार मानले आणि महिला प्रिमियर लीग महाराष्ट्रातील महिला क्रिकेटसाठी बदलाचे पाऊल ठरेल असे मत व्यक्त केले.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे आयोजन ; भारतीय वारकरी मंडळातर्फे वासंतिक उटीचे भजन

पुणे : सुवासिक फुलांनी सजलेले दगडूशेठ हलवाई गणपती मंदिर आणि लाडक्या गणरायाचे रुप डोळ्यांमध्ये साठविण्यासाठी मोगरा महोत्सवाच्या निमित्ताने पुणेकरांनी मोठया संख्येने गर्दी केली. मोग-याच्या ५० लाख फुलांसह झेंडू, जास्वंद, गुलाब, चाफा सारख्या फुलांनी गाभा-यासह सभामंडपात आकर्षक सजावट करण्यात आली. फुलांचे शुंडाभूषण, मुकुट, कान व पुष्पवस्त्र परिधान केलेले गणरायाचे रुप अधिकच मनोहारी दिसत होते.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे मंदिरात वासंतिक उटी, मोगरा महोत्सव आयोजित करण्यात आला. यावेळी ट्रस्टचे अध्यक्ष माणिक चव्हाण, उपाध्यक्ष सुनील रासने, कोषाध्यक्ष महेश सूर्यवंशी, उत्सव प्रमुख अक्षय गोडसे, सहचिटणीस अमोल केदारी आदी उपस्थित होते.

दोन दिवसांपासून पुष्पसजावटीची तयारी तब्बल २५० महिला व १०० पुरुष कारागिर करीत होते. यंदाच्या पुष्पसजावटीमध्ये ३५०० किलो गुलछडी, ८०० किलो झेंडू, १२० किलो कन्हेर फुले, १ लाख गुलाब, ७० हजार चाफा, १०० कमळे, १ लाख लिली, जाई-जुई, जास्वंद यांसह अनेक प्रकारची फुले वापरण्यात आली होती. गणरायाच्या मूर्तीला केलेली रंगीबेरंगी फुलांची सजावट प्रत्येक जण आपल्या मोबाईलमध्ये टिपत होता. गणरायाच्या चांदीच्या मूर्तीला उटीचे लेपन करण्यात आले. तसेच मोगरा महोत्सवासह वासंतिक उटीचे भजन भारतीय वारकरी मंडळातर्फे करण्यात आले.

करंजाडेचा पाणी प्रश्न सप्टेंबर पू्र्वी सुटणार – आमदार बालदी

सांगण्यासारखे एकही काम नसल्यामुळे विरोधकांकडून टीका – खासदार बारणे

उरण, दि. 28 एप्रिल – आशावाद ते विश्वास आणि आता विश्वास ते गॅरंटी अशी पंतप्रधान नरेंद्र मोदी यांची गेल्या दहा वर्षातील कारकीर्द आहे. त्यामुळे यावेळी देशात मोदींची लाट नाही तर त्सुनामी आहे. त्यापुढे विरोधकांची पुरती धूळधाण उडाली आहे, अशी टिप्पणी पनवेलचे आमदार प्रशांत ठाकूर यांनी काल (शनिवारी) रात्री केली.

मावळ लोकसभा मतदारसंघातील शिवसेना- भाजप-राष्ट्रवादी- मनसे- आरपीआय- रासप- मित्रपक्ष महायुतीचे उमेदवार खासदार श्रीरंग बारणे यांच्या प्रचारासाठी उरण तालुक्यातील करंजाडे येथे आयोजित करण्यात आलेल्या जाहीर सभेत ते बोलत होते. व्यासपीठावर खासदार बारणे, उरणचे आमदार महेश बालदी, दिवंगत जेष्ठ नेते दि. बा. पाटील यांचे पुत्र अतुल पाटील, भाजपचे जिल्हाध्यक्ष अविनाश कोळी, शिवसेनेचे उपजिल्हाप्रमुख अतुल भगत, शिवसेना तालुकाप्रमुख महेंद्र पाटील, भाजपाच उरण तालुका अध्यक्ष रवी भोईर, पनवेल तालुकाध्यक्ष अरुण भगत, करंजळेचे सरपंच मंगेश शेलार तसेच महायुतीच्या घटक पक्षांचे पदाधिकारी उपस्थित होते.

आमदार ठाकूर म्हणाले की, केंद्रातील मोदी सरकार व राज्यातील महायुती सरकार यांनी उरण पनवेल भागातील विकास कामांना खऱ्या अर्थाने गती दिली. विकासाचा हा वेग कायम ठेवण्यासाठी महायुतीचे उमेदवार श्रीरंग बारणे यांना विक्रमी मताधिक्याने निवडून द्यावे. बारणे यांना दिलेले मत हे पंतप्रधान मोदी, मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार यांना असणार आहे.

खासदार बारणे म्हणाले की, पंतप्रधान नरेंद्र मोदी यांनी जगात भारताची मान उंचावली. देशाच्या सीमा सुरक्षित केल्या. जातीय दंगली झाल्या नाहीत. राम मंदिर, जम्मू-काश्मीर सारखे किचकट प्रश्न रक्ताचा थेंबही न सांडवता सोडवले. स्वातंत्र्यानंतर 70 वर्षात झाली नसतील, तेवढी विकास कामे मागील दहा वर्षात झाली आहेत. त्यामुळे मोदींवर जनतेचा प्रचंड विश्वास असून मोदी हेच पुन्हा पंतप्रधान व्हावेत, अशी जनतेची भावना आहे. आठ पदरी जेएनपीटी रोड, अटल सेतू, नवीन आंतरराष्ट्रीय विमानतळ यासारख्या प्रकल्पांनी उरण परिसराचा कायापालट झाला आहे. विरोधी उमेदवाराकडे दाखवण्यासारखे एकही काम नसल्यामुळे ते फक्त टीका करीत आहेत, असा आरोपही बारणे यांनी केला.

आमदार बालदी यांनी मतदारसंघात झालेल्या विविध विकासकामांचा आढावा सादर केला. उद्धव ठाकरे मुख्यमंत्री असताना त्यांना कोणतेही प्रश्न सोडवण्यात रस नव्हता, अशी टीकाही त्यांनी केली. एकनाथ शिंदे मुख्यमंत्री झाल्यानंतर खऱ्या अर्थाने विकास कामांना गती मिळाली आहे. विकासाची ही गती कायम ठेवण्यासाठी मतदारांनी महायुतीला साथ द्यावी, असे आवाहन त्यांनी केले. करंजाडे येथील पाण्याचा प्रश्न सप्टेंबर महिन्यापर्यंत सुटलेला असेल अशी ग्वाही त्यांनी यावेळी दिली.

दिवंगत ज्येष्ठ नेते दि. बा. पाटील यांना मानणारे प्रत्येक मत खासदार बारणे यांनाच मिळेल, असा विश्वास अतुल पाटील यांनी व्यक्त केला.

अविनाश कोळी यांचेही यावेळी भाषण झाले. समीर केणी यांनी आभार मानले. नीतेश पंडित यांनी सूत्रसंचालन केले.

बहुजन संघर्ष प्रतिष्ठानच्या वतीने डॉ. बाबासाहेब आंबेडकर जयंती महोत्सव साजरा

पिंपरी पुणे (दि. २८ एप्रिल २०२४) – वाल्हेकरवाडी येथील बहुजन संघर्ष प्रतिष्ठानच्या वतीने भारतरत्न डॉ बाबासाहेब आंबेडकर यांच्या जयंतीनिमित्त विविध कार्यक्रम आयोजित शनिवार (२७ एप्रिल) करण्यात आले होते. यावेळी पिंपरी चिंचवड भारतीय जनता पक्षाचे शहराध्यक्ष शंकर जगताप यांना बहुजन मित्र पुरस्कार तर सुर्योदय ऊर्फ बाबू शेट्टी यांना विशेष पुरस्कार बहुजन संघर्ष प्रतिष्ठानचे संस्थापक अध्यक्ष मनोज तोरडमल यांच्या हस्ते देऊन गौरविण्यात आले.
यावेळी इंडियन आयडॉल सोनी टीव्ही, सुर नवा ध्यास नवा, कलर्स मराठी फेम गायक रॉकस्टार संतोष जोंधळे यांच्या भीम गीतांचा कार्यक्रम आयोजित केला होता. फॉरेनला धनी गेला ग बाय, तिथं जन्मले भिमराव सखे बाई गं, कभी झुकेगा नही साला, नको मला दाग दागिना, राजा राणीच्या जोडीला, भीम का बच्चा, भीम राज की बेटी या गाण्याला उपस्थितांना उस्फुर्त दाद दिली.
यावेळी माजी उपमहापौर सचिन चिंचवडे, शेखर चिंचवडे, आदेश नवले, पल्लवी वाल्हेकर, बिभीषण चौधरी, पल्लवी मरकड, सोमनाथ भोंडवे, नितीन गवळी, मधुकर बच्चे, राजू दुर्गे आदी उपस्थित होते. मनोज तोरडमल यांच्या मार्गदर्शनाखाली प्रतिष्ठानचे उपाध्यक्ष शेषराव लोमटे, सचिव बुद्धी सागर आठवले, खजिनदार दादा गणगे, कार्याध्यक्ष श्रीकांत वाघमारे, याचबरोबर उत्तरेश्वर पालके, अमोल डंबाळे, बालाजी पतंगे, अंकुश तेलंग, दीपक तोरडमल, राहुल जगताप, गौतम गायकवाड, अनंत मस्के, कचरू पालके, स्वप्नील बनसोडे, महावीर जगताप, युवराज जगताप, सुधाकर सरेकर, बालाजी कांबळे, कल्याण शिंदे, एकनाथ भोकरे, केशव कटारे, श्रीनिवास सोनवणे, लहू मस्के, अरुण शिंदे, पोपट चौरे, पिनू गिरमे, अमोल वाघमारे, जाहीर जगताप, सुरेश साठे, प्रशांत जगताप यांनी कार्यक्रमाचे संयोजन केले.

गांधी पेठ तालीम मित्र मंडळाच्या जिजाऊ व्याख्यानमालेचे चौथे पुष्प

पिंपरी, पुणे (दि. २८ एप्रिल २०२४) छत्रपती शिवाजी महाराज नऊ वर्षांचे असताना त्यांच्या हस्ते जिजाऊंनी पुण्यात सोन्याचा नांगर फिरवून रयतेमध्ये पुणे वसवण्यासाठी विश्वास निर्माण केला. ही घटना म्हणजे मोगलांच्या राजवटीतून रयतेला स्वातंत्र्य मिळवून देण्यासाठी रचलेला पाया आहे. छत्रपती शिवाजी महाराज हे स्वराष्ट्र निर्मितीचा ध्यास घेतलेले, प्रखर राष्ट्रवाद जोपासणारे, सृजनशील व्यक्तिमत्व होते असे हभप शिरीष महाराज मोरे म्हणाले.
चिंचवड गावातील गांधी पेठ तालीम मित्र मंडळाच्या वतीने आयोजित केलेल्या व्याख्यानमालेत चौथे पुष्प गुंफताना मोरे बोलत होते. जिजाऊ व्याख्यानमालेचे हे ३४ वे वर्ष आहे. यावेळी उद्योजक एस. बी. पाटील, श्रीकृष्ण कुलकर्णी, माजी नगरसेवक वसंत शेवडे, तसेच राम साखरे, राजू शिवतरे, संजय कलाटे, संतोष माचूत्रे, नवनाथ तरडे, संस्थेचे अध्यक्ष राजाभाऊ गोलांडे, व्याख्यानमालेचे समन्वयक सुहास पोफळे, गणेशोत्सव समिती अध्यक्ष विपुल नेवाळे, सदस्य महेश गावडे, धीरज गुत्ते, जगदीश घुले, प्रवीण भोकरे, संदीप जंगम आदी उपस्थित होते.
मोरे यांनी सांगितले की, छत्रपती शिवाजी महाराजांच्या कार्यकाला पूर्वी मुघलांचे आक्रमण सुरू होते. यावेळी समाज व समाजाचे नेतृत्व असुरक्षित होते. मंदिरांवर आक्रमणे होत होती. पंढरपूर, काशी, सोरटी सोमनाथ येथील मंदिरांवर आक्रमण करून मूर्तीची विटंबना केली जात होती. आया, बहिणींना पळवून नेऊन गुलाम केले जात होते. निरपराध नागरिकांची हत्या केली जात होती. ही लूट व अन्याय ५०० वर्ष सुरू होते. हे सर्व धर्मांतरासाठी केले जात होते. राजमाता जिजाऊंनी अत्याचार, अन्याय आणि अधर्माचा नाश करण्यासाठी धर्माची राजवट उभारण्याचे स्वप्न पाहिले. छत्रपती शिवाजी महाराजांनी देव, देश आणि धर्म तसेच रयतेच्या रक्षणासाठी स्वराज्याची स्थापना केली. त्यांनी प्रथमच अष्टप्रधान मंडळाची स्थापना केली. शेतकऱ्यांना व रयतेला सोबत घेऊन कृषी क्रांती, सैनिक क्रांती, आर्थिक क्रांती, धर्म आणि सांस्कृतिक क्रांती करीत शेतकरी व रयतेच्या हिताचे निर्णय घेऊन अंमलबजावणी केली. स्वराज्यात शेतकऱ्यांना बी बियाणे, यंत्र, अवजारे मोफत दिली जात होती. शून्य टक्के व्याजाने शेतकऱ्यांना कर्ज, शेतसारा मध्ये मध्ये सवलत देऊन दोन वेळचे भोजन देखील मोफत दिले जायचे. शेतकऱ्यांच्या हिताला प्राधान्य दिले. शेती उत्पन्न वाढीसाठी प्रोत्साहन दिले. कास्तकरी, बलुतेदारांना, अलुतेदारांना कृषीक्रांती नंतर अर्थक्रांतीसाठी मदत करून प्रोत्साहन दिले. कृषीक्रांती बरोबरच सैन्यक्रांती ही केली. नंतर अर्थक्रांती केली. रयतेच्या मनामध्ये प्रखर राष्ट्रवाद निर्माण करणारे छत्रपती शिवाजी महाराजांचे व्यक्तिमत्व होते. स्वभाषेचा त्यांनी पुरस्कार केला. राजमुद्रेवर, चलनी नाण्यांवर सर्वात प्रथम देवनागरी लिपी आणि संस्कृत भाषेचा वापर केला. रघुनाथ पंतांना सांगून संस्कृत भाषेतील पहिला शब्दकोश तयार केला असेही हभप शिरीष महाराज मोरे यांनी सांगितले.
स्वागत महेश गावडे आणि आभार सुहास पोफळे यांनी मानले.