पुणे-शिवसेनेचे माजी नगरसेवक प्रमोदनाना भानगिरे यांनी प्रभाग क्रमांक २६ महंमदवाडी – कौसरबाग व नवीन प्रभाग क्रमांक ४६ महंमदवाडी -उरुळी देवाची मधील विविध विकास कामांसाठी सुमारे १६ कोटी ५० लाख रुपयांच्या निधीची मागणी नगरविकास मंत्री एकनाथ शिंदे यांच्याकडे केली आहे.ठाणे येथे मंत्री एकनाथ शिंदे यांची त्यांच्या निवासस्थानी भेट घेत माजी नगरसेवक नाना भानगिरे यांनी निधीची मागणी निवेदनाद्वारे केली आहे.
माजी नगरसेवक नाना भानगिरे म्हणाले की केवळ निधी उपलब्ध होत नसल्याने अनेक लोकोपयोगी विकास कामे रखडलेली आहेत. या रखडलेल्या विकास कामांना गती मिळावी यासाठी निधी उपलब्ध व्हावा यासाठी हे निवेदन देण्यात आले आहे. सर्वे नंबर ५५ मधील हिंदुहृदयसम्राट बाळासाहेब ठाकरे फुटबॉल मैदान, स्वर्गीय गोपीनाथ मुंडे उद्यान, सर्वे नंबर ७३ मधील महात्मा ज्योतीराव फुले जलतरण तलाव ,डॉ. दादा गुजर शाळेजवळील पाझर तलाव येथील उर्वरित कामे पूर्ण करण्यासाठी तसेच प्रभाग २६ मधील रस्ते आणि नवीन प्रभाग क्रमांक ४६ मधील हांडेवाडी, होळकरवाडी,औताडेवाडी ,शेवाळेवाडी ,
पिसोळी,वडाचीवाडी, उरुळी देवाची येथील विविध प्रकारच्या विकास कामांसाठी या निधींची मागणी केली असून मंत्री एकनाथ शिंदे यांनी यास सकारात्मक प्रतिसाद देत प्रधान सचिव यांना प्रस्ताव सादर करण्याबाबत सूचना दिल्या आहेत.
“महंमदवाडी येथील न्याती गार्डनच्या शेजारील अमेनिटी स्पेसवर महानगरपालिकेने हॉस्पिटल चे आरक्षण टाकले होते सदर आरक्षण रद्द करून त्याठिकाणी गार्डनचे आरक्षण टाकून गार्डन व्हावे तसेच ससाणेनगर वरून हांडेवाडीकडे जाताना बंद असलेले रेल्वे गेट क्रमांक ७ व भुयारी मार्ग करत असताना जागा मालक,शेतकरी,घर मालक,दुकान मालक यांना त्यांचा योग्य तो मोबदला मिळाला नाही. तो योग्य मिळावा यासाठीही मंत्री महोदयांना निवेदन देण्यात आले आहे. या सर्व मागण्यांसाठी त्यांनी सकारात्मक प्रतिसाद दिला आहे.”
– प्रमोदनाना भानगिरे (माजी नगरसेवक, शिवसेना)