इंद्रायणी महाविद्यालयात ‘आयसीटी इन एज्युकेशन’ वर 16 व 17 फेब्रुवारी रोजी राज्यस्तरीय चर्चासत्राचे आयोजन
पिंपरी :
तळेगाव दाभाडे येथील इंद्रायणी विद्यामंदिर संस्थेच्या इंद्रायणी महाविद्यालयात येत्या 16 व 17 फेब्रुवारी रोजी ‘आयसीटी इन एज्युकेशन’ या विषयावर दोन दिवसीय राज्यस्तरीय चर्चासत्राचे आयोजन करण्यात आले आहे. या चर्चासत्राचे उद्घाटन लोकप्रिय लेखक आणि मराठी माहितीतंत्रज्ञ अतुल कहाते यांच्या हस्ते होणार आहे. विविध महाविद्यालयांमधील प्राध्यापक, संशोधक आणि विद्यार्थ्यांनी तसेच मावळ परिसरातील नागरीकांनी या चर्चासत्रास उपस्थित राहण्याचे आवाहन प्राचार्य डॉ. डी.डी. बाळसराफ यांनी केले आहे. हे चर्चासत्र इंद्रायणी महाविद्यालयाच्या बीबीए व बीसीए विभागातर्फे आयोजित करण्यात आले आहे. हे चर्चासत्र प्राध्यापक व विद्यार्थी यांना एक प्रकारची बौद्धिक मेजवानी आहे. यामुळे विद्यार्थ्यांच्या ज्ञानात भर पडणार आहे, असा विश्वास उपप्राचार्य डॉ. एस.के. मलघे यांनी व्यक्त केला.
या चर्चासत्राच्या अध्यक्षस्थानी संस्थेचे विद्यमान अध्यक्ष व माजी आमदार कृष्णराव भेगडे असणार आहेत. सावित्रीबाई फुले पुणे विद्यापीठाच्या व्यवस्थापनशास्त्र विभागाचे प्रमुख डॉ. प्रफुल्ल पवार हे प्रमुख पाहुणे असतील. या चर्चासत्रात अमोल धोंडसे, आनंद पिकले, डॉ. रंजीत पाटील, डॉ. एम.एस. गायकवाड, डॉ. जे.डी. टाकळकर, डॉ. यशोधन मिठारे, डॉ. विलास वाणी, डॉ. दिपाली सवाई, डॉ. प्रसन्न देशमुख, निरुपमा कानेटकर आदी वक्ते विद्यार्थ्यांशी संवाद साधणार आहेत. समारोपप्रसंगी संस्थेचे कार्यवाह रामदास काकडे उपस्थित असणार आहेत.
या दोन दिवसीय चर्चासत्रात आयसीटी’चे सर्व क्षेत्रातील महत्त्व, शिकवण्याच्या प्रक्रियेत आयसीटीचा प्रभावी वापर आणि नॅक मूल्यांकनासाठी आयसीटीचे अनिवार्य असणे अशा विविध विषयांवर चर्चा करणे हा प्रमुख उद्देश आहे, असे चर्चासत्राच्या संयोजिका प्रा. विद्या भेगडे यांनी दिली.