पुणे:- वाहनांच्या योग्यता प्रमाणपत्र तपासणीचे काम करण्याबाबत परिवहन आयुक्त कार्यालयाने सर्व अधिनस्त कार्यालये व अधिका-यांना स्पष्ट सूचना दिलेल्या आहेत. यात कोणत्याही प्रकारचे बदल करण्यात आलेले नसून योग्यता प्रमाणपत्राच्या कारवाईचे व्हीडीओ चित्रीकरण करण्याचे आदेश कायम आहेत, अशी माहिती राज्याचे परिवहन आयुक्त डॉ. प्रवीण गेडाम यांनी प्रसिध्दी पत्रकाद्वारे दिली आहे.
परिवहन आयुक्त कार्यालयाने सीसीटिव्ही शिवाय वाहनांची योग्यता प्रमाणपत्र देण्याचे आदेशित केल्याच्या प्रसिध्द झालेली बातमी चुकीची आहे. मुंबई उच्च् न्यायालयाने जनहित याचिका क्रमांक 28/2013 श्री. श्रीकांत माधव कर्वे विरुध्द राज्य शासन व इतर याप्रकरणात दिनांक 18 फेब्रुवारी 2016 रोजी व त्यानंतर वेळोवळी दिलेल्या आदेशानुसार वाहनांच्या योग्यता प्रमाणपत्र तपासणीचे काम करण्याबाबत परिवहन आयुक्त कार्यालयाने सर्व अधिनस्त कार्यालये व अधिका-यांना स्पष्ट सूचना दिलेल्या आहेत. त्यात कोणत्याही प्रकारचे बदल करण्याचा प्रश्न उद्भवत नाही. त्यानुसार सर्व योग्यता प्रमाणपत्राच्या कारवाईचे व्हीडीओ चित्रीकरण करण्याचे आदेश कायम असल्याचे परिवहन आयुक्त डॉ. प्रवीण गेडाम यांनी स्पष्ट केले आहे