पुणे : पुणे जिल्ह्याचा 2017-18 या वर्षाचा बँक ऑफ महाराष्ट्रच्या जिल्हा अग्रणी बँक आणि अन्य बँकांच्या पुढाकारातून तयार करण्यात आलेल्या 48 हजार 807 कोटी रुपयांच्या वार्षिक पतपुरवठा आराखड्याचे प्रकाशन अपर जिल्हाधिकारी रमेश काळे यांच्या हस्ते आज करण्यात आले.
जिल्हाधिकारी सौरभ राव यांच्या मार्गदर्शनानुसार हा पत पुरवठा आराखडा तयार करण्यात आला आहे. पतपुरवठा आराखडा प्रकाशन कार्यक्रमप्रसंगी बँक ऑफ महाराष्ट्रच्या पूर्व परिमंडळ विभागाचे परिमंडळ व्यवस्थापक दत्ता डोके, नाबार्डचे जिल्हा विकास अधिकारी विक्रम पठारे, जिल्हा ग्रामिण विकास यंत्रणेचे प्रकल्प संचालक दिनेश डोके, जिल्हा उद्योग केंद्र सरव्यवस्थापक काशिनाथ डेकाटे, पुणे जिल्हा मध्यवर्ती सहकारी बँक उप सरव्यवस्थापक डी. एस. थोरात पाटील, पुणे ग्रामीणचे जिल्हा उपनिबंधक सहकारी संस्था आनंद कटके, जिल्हा अग्रणी बँक व्यवस्थापक डी. बी. देशमुख आदी मान्यवर यावेळी उपस्थित होते.
पत आराखड्याची वैशिष्ट्ये सांगताना अपर जिल्हाधिकारी रमेश काळे म्हणाले की हा पत आराखडा मागील वर्षापेक्षा 16 टक्यांनी अधिक आहे. प्राथमिकता क्षेत्रासाठी 30 हजार 500 कोटी रुपयांची तरतूद करण्यात आली असून ती एकून पतपुरवठ्याच्या 60 टक्के आहे. कृषी कर्जासाठी 6 हजार 895 कोटी रुपयांची तरतूद करण्यात आली असून त्याचे प्रमाण प्राथमिकता कर्जापैकी 23 टक्के एवढे आहे.
कृषी कर्जामध्ये प्रामुख्याने सेंद्रिय शेती, फुले व फळबाग लागवड, हरितगृह, कृषी निर्यात योजना, कृषी यांत्रिकीकरण, राष्ट्रीय फलोत्पादन अभियान तसेच शेतीपुरक व दुय्यम योजनांचा समावेश करण्यात आला आहे. या पतपुरवठा आराखड्यामध्ये व्यापारी बँका, पुणे जिल्हा मध्यवर्ती सहकारी बँक तसेच महाराष्ट्र ग्रामिण बँकेसह 41 बँकांच्या 1 हजार 617 शाखांचा सहभाग आहे.
पतपुरवठा आराखड्यात लघुउद्योजकांसाठी 11 हजार 420 कोटी रुपयांची तरतूद करण्यात आली आहे. स्वयंरोजगार योजनांसाठी, शैक्षणिक कर्जासाठी, गृहकर्जासाठी, छोट्या व्यवसायासाठी 12 हजार 185 कोटी रुपयांची तरतूद करण्यात आली आहे. गत वर्षाच्या पत पुरवठा आराखड्यापेक्षा या 2017-18 आराखड्या मध्ये लघु उद्योजकांकरिता 37 टक्के, इतर प्राथमिक क्षेत्राकरिता 40 टक्के, एकूण प्राथमिकता क्षेत्राकरिता 38 टक्के, अप्राथमिकता क्षेत्राकरिता 15 टक्के, एकूण पत पुरवठा आराखड्याच्या 16 टक्के वाढ करण्यात आली आहे.
कार्यक्रमाचे सूत्रसंचालन जिल्हा अग्रणी बँक व्यवस्थापक देशमुख यांनी केले