पुणे : पोलीस दलात चालक म्हणून ३८ वर्ष सेवा केल्यानंतर सेवानिवृत्त झालेल्या मनोहर शेटे, अत्यंत कष्टाने आणि जिद्दीने पोलीस उपनिरीक्षक पदाच्या परिक्षेत यश प्राप्त करणाऱ्या ज्ञानेश्वर धनगर या सेवकांचा त्यांच्या शासकीय सेवा निष्ठेबद्दल पालकमंत्री गिरीश बापट यांनी काल सन्मान केला.घोले रोडवरील महात्मा फुले वस्तुसंग्रहालयात झालेल्या या सत्कार सोहळ्याला पोलीस आयुक्त रश्मी शुक्ला तसेच गुन्हे शाखेचे पोलीस उपायुक्त प्रदीप देशपांडे उपस्थित होते.
यावेळी बोलताना पालकमंत्री गिरीश बापट म्हणाले, पोलीस दलात चालक म्हणून गेल्या ३८ वर्षापासून कार्यरत असणारे मोतीलाल शेटे उर्फ नाना आज सेवानिवृत्त होत आहेत. गेल्या काही महिन्यांपासून ते माझ्याकडे चालक म्हणून काम करत होते. अत्यंत मनमिळावू असलेल्या नानांनी त्यांची सेवा अत्यंत चांगल्या रितीने बजावली आहे. माझ्यासोबत असणारे पोलीस दलातील दुसरे चालक ज्ञानेश्वर धनगर यांनीही अत्यंत जिद्दीने आणि कष्टाने पोलीस उपनिरीक्षक पदाच्या परीक्षेत यश मिळवले. त्याचप्रमाणे पोलीस कॉन्स्टेबल अमोल मुंडे यांनीही घरच्या हालाखीच्या आर्थिक परिस्थितीवर मात करत पोलीस दलात नोकरी मिळवून घराचा भार उचलला आहे. गेले काही दिवस माझ्यासोबत काम करत असताना या सर्वांसोबत पारिवारिक संबंध जोडले गेले आहेत.अशा कर्तव्यनिष्ठ व्यक्तींकडून तरुणांनाही आदर्श घेण्याची गरज आहे.
पोलीस आयुक्त रश्मी शुक्ला म्हणाल्या, आजच्या युगात पोलिसांबद्दल विचार कोणी करत नाही. पालकमंत्र्यांनी हा कार्यक्रम आयोजित करून आपल्यातल्या माणुसकीचे दर्शन घडवले आहे. माझ्या २९ वर्षांच्या सेवेत ही माणूसकी कोणाकडे पहिली नाही. प्रत्येक नागरिकांनी पोलिसांना हा सन्मान दिल्यास आम्हाला काम करण्यास निश्चितच आणखी हुरूप येईल.
सत्काराला उत्तर देताना मनोहर शेटे म्हणाले, पालकमंत्र्यांनी आम्हाला कनिष्ट असल्याची जाणीव होऊ दिली नाही. हल्ली अनेकजण पोलिसांचा सत्कार नव्हे तर त्यांच्याशी नीट बोलतसुद्धा नाहीत त्यामुळे बापट साहेबांनी केलेल्या सत्काराने कृतकृत्य झाल्याचे मत ज्ञानेश्वर धनगर यांनी व्यक्त केले तर अमोल मुंडे यांनीही पालकमंत्र्यांचे आभार मानले.
