पुणे-
कोरोना महामारीच्या वाढत्या प्रादुर्भावामुळे पुणे महानगरपालिकेची रुग्णालये अद्ययावत करण्यासाठी कोथरुडचे आमदार चंद्रकांतदादा पाटील यांनी आपल्या आमदार निधीतून ५० लाख निधी उपलब्ध करुन दिला आहे. यासंदर्भात श्री पाटील यांनी आज पुण्याचे महापौर आणि आयुक्तांना पत्र लिहून कळवले आहे.
पुण्यात कोरोनाग्रस्तांची संख्या लक्षात घेता, महापालिकेच्या रुग्णालयांमध्ये अद्ययावत साधन समुग्रीची कमतरता भासत आहे. याची दखल घेऊन श्री. पाटील यांनी आपल्या आमदार निधीतून ५० लाख रुपये उपलब्ध करून दिले आहेत. तसेच, कोरोनाग्रस्तांवर उपचारासाठी अजून निधीची गरज असल्यास निधीची उभारणी करु, असे देखील श्री. पाटील यांनी कळवले आहे.
दरम्यान, मंगळवारी श्री. पाटील यांनी संवेदना फाऊंडेशन या स्वयंसेवी संस्थांच्या वतीने २० हजार मास्क तयार करुन घेऊन पुण्याचे महापौर मुरलीधर आण्णा मोहोळ यांच्याकडे सुपूर्द केले. या मास्कचे महापालिकेचे स्वच्छता कर्मचारी, पोलीस कर्मचारी, पत्रकारांना आणि विविध रुग्णालयांमध्ये वैद्यकीय सेवा पुरवणारे डॉक्टर, परिचारिका यांना वाटप करण्यात येणार आहे.