- भाजपचा ४१ वा वर्धापनदिन साजरा.
पुणे – या पुढील काळात राजकीय आणि वैचारीक लढा भाजप विरोधात अन्य पक्ष असा होणार आहे. त्यासाठी संघटनात्मक वाढीबरोबर कार्यकर्त्यांमध्ये वैचारीक स्पष्टता निर्माण करायची आहे. केवळ निवडणुका जिंकणे हा भाजपचा उद्देश नसून देशाला वैभवापर्यंत नेऊन जगातील सुपर पॉवर बनविण्याचे ध्येय असल्याचे विचार प्रदेशाध्यक्ष चंद्रकांत पाटील यांनी व्यक्त केले.
भाजपच्या ४१ व्या वर्धापनदिनानिमित्त शहर कार्यालयात आयोजित केलेल्या ध्वजारोहन कार्यक‘मानंतर आयोजित केलेल्या व्हर्च्युअल रॅलीत श्री. पाटील बोलत होते. शहराध्यक्ष जगदीश मुळीक, खासदार गिरीश बापट, महापौर मुरलीधर मोहोळ, सरचिटणीस राजेश पांडे, गणेश घोष, राजेश येनपुरे, दीपक नागपुरे, दीपक पोटे आणि पदाधिकारी उपस्थित होते.
शहराध्यक्ष मुळीक म्हणाले, ‘भाजप ही देशासाठी काम करणारा पक्ष आहे. गोरगरीबांची दुःख दूर करणारी संघटना अशी पक्षाची ओळख आहे. सर्वसामान्य कार्यकर्ते पक्षाला पुढे नेत आहेत. अन्याया विरोधातील संघर्षाचा वारसा पुढे सुरू आहे. कोरोनावर मात करण्यासाठी शहर भाजपच्या वतीने संघटना स्तरावर लसीकरणाची मोहीम व्यापक करण्याची मोहीम आजपासून सुरू केली आहे. यासाठी नोंदणी, जनजागृती आणि मार्गदर्शन या तीन स्तरावर स्थानिक पातळीवर काम करण्यात येणार आहे. ज्येष्ठ नागरिक, अपंगांना लसीकरणासाठी मदत केली जाणार आहे.’
खासदार बापट म्हणाले,‘भाजप जगातील एक नंबरचा पक्ष आहे. या पक्षाला वैचारीक बांधिलकी आहे. देश, धर्म, समाज आणि समाजातील सामान्य माणसाचा विचार करून पक्ष कार्य करीत आहे. लोकशाहीत राजकीय जीवनात कसे काम करावे याचा आदर्श या पक्षाने घालून दिला. कार्यकर्ता हा पक्षाचा प्राण आहे. वैचारीक बैठक पक्की असल्याने पक्ष कधी थांबला नाही. देशापेक्षा कोणी मोठा नाही हा आदर्श घालून दिला. आजचा दिवस संकटावर मात करणारी उर्जा देणारा आणि कर्तव्याची जाणीव करून देणारा आहे.’
महापौर मोहोळ म्हणाले, ‘भाजपचा कार्यकर्ता असल्याचा अभिमान आहे. देशाच्या प्रगती आणि राष्ट्रवादाचा प्रवास म्हणजेच भाजपचा प्रवास आहे. लोकांचा विश्वास संपादन करण्यात भाजप यशस्वी ठरला आहे. अविरतपणे जनतेची सेवा करीत आहोत. या पक्षाची उभारणी वंशपरंपरेवर झालेली नसून विचार आणि तत्त्वावर आधारित आहे.’