पुणे : दि इन्स्टिट्यूट ऑफ चार्टर्ड अकाउंटंट्स ऑफ इंडियाच्या (आयसीएआय) ७० व्या वर्धापन दिनानिमित्त विविध कार्यक्रमांचे आयोजन करण्यात आले आहे. ‘गुड्स अँड सर्व्हिस टॅक्स’ (जीएसटी) कायद्याला एक वर्ष पूर्ण होत असल्याबद्दल विद्यार्थीनींसाठी ‘जीएसटी’वर पाच दिवसांच्या मोफत कार्यशाळेचे आणि भव्य रक्तदान शिबिराचे आयोजन केले आहे. जीएसटी कार्यशाळेच्या उद्घाटनप्रसंगी राष्ट्रपती रामनाथ कोविंद मार्गदर्शन करणार असून ही कार्यशाळा महिला सक्षमीकरणा अंतर्गत घेण्यात येत आहे.
आयसीएआयच्या करिअर कौन्सलिंग ग्रुप, आयसीएआय पुणे विभाग, सावित्रीबाई फुले पुणे विद्यापीठाच्या व्यवस्थापन विभागातर्फे (पुम्बा), एमआटी- डब्लूपीयु, एसएनडीटी महाविद्यालय, महर्षी कर्वे स्त्री शिक्षण संस्था (एमकेएसएसएस’एस) यांच्या सहकार्याने ही कार्यशाळा दि. १ जुलै ला सुरु होऊन जुलै महिन्यातील दर शनिवारी (७,१४,२१,२८ जुलै) विविध महाविद्यालयात होणार आहे. वाणिज्य विषय शिकणाऱ्या पदवी आणि पदव्युत्तर विद्यार्थीनींसाठी ही कार्यशाळा आहे. ‘बेटी पढाओ’ योजनेत सहभाग घेऊन विद्यार्थीनींना मुलभूत व विस्तारित माहिती देण्याचे कार्य केले जाणार आहे. देशभरात आयसीएआय विविध विद्यापीठांच्या, संस्थांच्या सहकार्याने अशा कार्यशाळा घेत आहे. आतापर्यंत या ग्रुपने २००० पेक्षा जास्त करिअर कौन्सिलिंगचे कार्यक्रम आयोजिले आहेत. एकूण २० तासांचे हे प्रशिक्षण असणार आहे. ७० वर्षानिमित्त ७० ठिकाणी ७० विविध कार्यशाळा घेतल्या जाणार आहेत.या पैकी सर्वाधिक आठ कार्यशाळा या आयसीएआय च्या पुणे विभागा तर्फे घेण्यात येत आहे.
दरवर्षी एक जुलैला आयसीएआयचा वर्धापनदिन ‘सीए दिवस’ म्हणून साजरा केला जातो. त्यानिमित्ताने देशभर विविध कार्यक्रम घेतले जातात. त्यामध्ये वृक्षारोपण, रक्तदान शिबीर, नेत्रशिबिर, पुस्तक वाटप आदींचा समावेश असतो. दोन दिवसीय रक्तदान शिबिर ३० जून आणि १ जुलै या दोन दिवशी आयसीएआय पुणे शाखा, वेस्टर्न इंडिया चार्टर्ड अकाउंटंट्स स्टुडंट्स असोसिएशनच्या (डब्ल्यूआयसीएएसए) आणि चार्टर्ड अकाउंटंट्स फम यांच्या सहकार्याने होत आहे. बिबवेवाडीतील आयसीएआय भवन, सदाशिव पेठेतील फडके संकुल, पु. ल. देशपांडे उद्यानासमोर राठी राठी अँड कंपनी, खराडी येथील एसआरपीए अँड असोसिएट्स, विधी महाविद्यालय रस्त्यावरील पुणे डेक्कन सीपीई स्टडी सर्कल, बाणेर-पाषाण लिंक रोडवरील एसकेपी ग्रुप, मित्र मंडळ चौकातील एसपीसीएम आणि बाणेर येथील बिझसोलइंडिया सर्व्हिसेस येथे हे रक्तदान शिबीर होणार आहे, अशी माहिती ‘आयसीएआय’च्या पुणे विभागाचे चेअरमन सीए आनंद र. जाखोटिया यांनी दिली.
