पुणे-माजी खासदार संजय काकडे यांच्यावर भाजपनं आता मोठी जबाबदारी सोपविली आहे. भारतीय जनता पार्टीच्या वतीने संजय काकडे यांची आता प्रदेश उपाध्यक्ष पदी नियुक्ती करण्यात आली आहे. त्याबाबतचं पत्र प्रदेशाध्यक्ष चंद्रकांत पाटील यांनी काकडे यांना दिलं आहे. आगामी पुणे महानगरपालिकेच्या निवडणुका डोळयासमोर ठेऊन माजी खा. काकडे यांनी प्रदेश उपाध्यक्षपदी नियुक्ती केल्याचं बोललं जात आहे. गेल्या महापालिका निवडणुकीत पुण्यात भाजपची सत्ता आणण्यामध्ये काकडे यांनी महत्वाची भूमिका बजावली होती. मात्र, राज्यात भाजपचे सरकार गेल्यानंतर ते राजकीय घडामोडीपासून दूर गेले होते.
राज्यसभेत जनतेचे प्रश्न सोडविण्यासाठी माजी खासदार काकडे यांनी केलेले कार्य तसेच संसदेत काकडे यांचे कार्य उल्लेखनीय आणि अभिनंदनीय असल्याचं भाजपनं म्हंटलं आहे.
2014 साली पंतप्रधान नरेंद्र मोदी सत्तेत आल्यानंतर संजय काकडे भाजपसोबत गेले होते. त्यामुळे त्यांना भाजपचे सहयोगी खासदार म्हणून ओळखले जाते. मात्र दुसऱ्यांदा भाजपकडून काकडे यांना राज्यसभेची खासदारकी मिळाली नाही. त्यावेळी काकडे यांची उघडउघड नाराजी लपून राहिली नव्हती. पण आता प्रदेश उपाध्यक्षपदाची माळ गळ्यात टाकून काकडे यांची काही प्रमाणात नाराजी दूर करण्याचा प्रयत्न भाजपने केला असल्याची चर्चा राजकीय वर्तुळात आहे.