अव्याहत साधनेची ७१ वर्षे पूर्ण
पुणे: दरवर्षी गुरुपौर्णिमेला स्वरचित नृत्यरचना गुरुदक्षिणा म्हणून शिष्यांनी गुरूला द्यावी, अशी संकल्पना गुरू पं. रोहिणी भाटे यांनी रुजविली. नृत्यभारती डान्स अकॅडमीतर्फे आजही हे कार्य अव्याहतपणे सुरू आहे. यंदा यास ७१ वर्षे पूर्ण होत असून यानिमित्त ‘वेध साधनेचा’ या कथक संध्येचे आयोजन करण्यात आले आहे. येत्या शुक्रवारी (ता.२०) यशवंतराव चव्हाण नाट्यगृह येथे सायंकाळी ७ ते १० यावेळेत ही मैफल पार पडेल.
पखवाजी बाजाचा परंतु, लास्यांगाने जाणारा ताल धमार, वादनातील बंदीशींनी नटलेला चौताल, मानसिक आजार व समाज यांवर विचार मांडणारी ‘चैतन्य’ रचना, अभिसारिका नायिका, गुरू रोहिणीताईंवर रचलेली कविता आणि रोहिणीताईंचे नृत्यदिग्दर्शन लाभलेली ‘ऋतुगान’ ही नृत्यसंरचना अशा अभिजात कथक नृत्याचे विविध पैलू उलगडणाऱ्या नृत्यरचना एकाच व्यासपीठावर अनुभविण्याची संधी यानिमित्ताने रसिक पुणेकरांना लाभणार आहे.
गुरू पं. रोहिणी भाटे यांच्या ज्येष्ठ शिष्या शरदिनी गोळे यादेखील मैफलीत सहभागी होणार आहेत. पं. अरविंदकुमार आजाद(तबला), अजय पराड (संवादिनी), अर्पिता वैशंपायन (गायन), गोविंद भिलारे (पखवाज), सुनील अवचट (बासरी) आदी कलाकार मैफलीत साथसंगत करणार आहेत. तरी, या मैफलीचा अधिकाधिक रसिकांनी लाभ घ्यावा, असे आवाहन संस्थेच्या वतीने करण्यात आले आहे.