नागपूर -राष्ट्रवादी काँग्रेसचे प्रदेशाध्यक्ष जयंत पाटील यांचं निलंबन करण्यात आल्यानंतर महाविकास आघाडी आक्रमक झाली आहे. विधानसभा अध्यक्षांना उद्देशून अपशब्द वापरल्यामुळे जयंत पाटील यांच्यावर कारवाई करण्यात आली आहे. हिवाळी अधिवेशन संपेपर्यंत जयंत पाटील यांचं निलंबन असणार आहे. यानंतर जयंत पाटील यांनी ट्वीट केलं असून ‘असा निर्लज्जपणा करू नका’ असे शिंदे फडणवीस सरकारला उद्देशून म्हणालो मात्र विरोधकांचा आवाज दाबण्याच्या व वचक बसवण्याच्या उद्देशाने सरकारने मी असे विधानसभा अध्यक्षांना उद्देशून बोलल्याचा बनाव केला व मला हे हिवाळी अधिवेशन संपेपर्यंत निलंबित केले आहे, असे म्हटले आहे.
या शिवाय जयंत पाटील यांनी केलेय आणखी एका ट्वीट मध्ये सरकारवर ताशेरे ओढले आहेत.जयंत पाटील यांनी ट्वीट केलं असून या निर्लज्ज सरकारविरोधात लढत राहणार असं म्हटलं आहे. “या निर्लज्ज सरकारविरोधात लढत राहणार. बहुजन प्रतिपालक छत्रपती शिवाजी महाराज की जय,” असं ट्वीट जयंत पाटील यांनी केलं आहे.