📍नवी दिल्ली
पुणे शहरातील पाणीपुरवठा अधिक सक्षम करण्यासाठी खडकवासला येथे प्रस्तावित २०० एमएलडी क्षमतेच्या जलशुद्धीकरण प्रकल्पासाठी केंद्रीय जल व विद्युत संशोधन केंद्राच्या (CWPRS) मालकीची सुमारे ४ हेक्टर जागा पुणे महानगरपालिकेकडे हस्तांतरित करण्यास मंजुरी द्यावी, अशी मागणी केंद्रीय जलशक्ती मंत्री सी.आर. पाटील यांची भेट घेऊन केंद्रीय राज्यमंत्री मुरलीधर मोहोळ यांनी केली.
मोहोळ या संदर्भात म्हणाले,’ पुणे शहराची वाढती लोकसंख्या आणि नव्याने समाविष्ट झालेल्या १२ गावांची पिण्याच्या पाण्याची गरज लक्षात घेता, पुणे महानगरपालिकेने या महत्त्वाकांक्षी प्रकल्पाचे नियोजन केले आहे. सुमारे ८९० कोटी रुपयांच्या या प्रकल्पाच्या सविस्तर प्रकल्प अहवालास (DPR) केंद्र सरकारच्या गृहनिर्माण व शहरी व्यवहार मंत्रालयाच्या सचिवांच्या अध्यक्षतेखालील शिखर समितीने ११ मे २०२६ रोजी मंजुरी दिली आहे.
नव्याने समाविष्ट झालेल्या गावांमध्ये अलीकडे गुइलेन-बॅरे सिंड्रोम (GBS) चा प्रादुर्भाव झाल्याच्या पार्श्वभूमीवर सुरक्षित पिण्याच्या पाण्याचा प्रश्न अधिक महत्त्वाचा बनला आहे. जलजन्य आजारांना प्रतिबंध घालण्यासाठी आणि नागरिकांना शुद्ध, सुरक्षित व नियमित पाणीपुरवठा सुनिश्चित करण्यासाठी या प्रकल्पाची तातडीने अंमलबजावणी होणे आवश्यक आहे.
प्रकल्पासाठी खडकवासला येथील CWPRS ची जागा तांत्रिकदृष्ट्या सर्वाधिक योग्य असून, जागेच्या हस्तांतरणासाठी जलशक्ती मंत्रालयाची मंजुरी आवश्यक आहे. त्यामुळे या प्रस्तावाला प्राधान्याने मंजुरी देऊन प्रकल्पाच्या अंमलबजावणीचा मार्ग मोकळा करावा, अशी विनंती सी. आर. पाटील यांना केली.असे सांगून मोहोळ पुढे म्हणाले,’पुणेकरांचे आरोग्य, सुरक्षित पिण्याचे पाणी आणि शहराच्या भविष्यातील पाणीपुरवठ्याच्या दृष्टीने अत्यंत महत्त्वाचा असलेला हा प्रकल्प लवकरात लवकर मार्गी लागावा, हाच यामागचा उद्देश आहे.

