आमदार हेमंत रासने यांच्या संकल्पनेतून कसब्यात अनोखा उपक्रम; २ हजार कुटुंबांचा सहभाग
पुणे (दि १ ): दिवाळीच्या निमित्ताने घराघरांत होणाऱ्या स्वच्छतेतून निर्माण होणाऱ्या जुन्या आणि अनावश्यक वस्तूंची योग्य विल्हेवाट लावण्याबरोबरच त्यांचा पुनर्वापर व्हावा, या उद्देशाने कसबा विधानसभा मतदारसंघात राबविण्यात आलेल्या विशेष संकलन उपक्रमाला नागरिकांचा उत्स्फूर्त प्रतिसाद मिळाला. तब्बल २ हजार कुटुंबांनी सहभाग नोंदवित सुमारे २० टन घरगुती वस्तू जमा केल्या. आमदार हेमंत रासने यांच्या संकल्पनेतून हे अभियान राबवण्यात आले.
दिवाळीच्या स्वच्छतेनंतर अनेक घरांमध्ये जुने साहित्य अनावश्यक ठरते. या वस्तू कचऱ्यात किंवा रस्त्यावर फेकण्याऐवजी त्यांचा पुनर्वापर व्हावा, तसेच गरजू व्यक्तींना त्याचा लाभ मिळावा, या विचारातून नऊ संकलन केंद्रांवर वस्तूंचे संकलन करण्यात आले. नागरिकांनी जुने टीव्ही, कूलर, सायकली, संगणक, लॅपटॉप, मोबाईल, कपडे, चादरी, भांडी, पादत्राणे, पुस्तके, खेळणी आणि फर्निचर अशा विविध वस्तू जमा केल्या.
यावेळी आमदार हेमंत रासने म्हणाले “दिवाळीच्या स्वच्छतेला पर्यावरण संवर्धनाची जोड देणारा आजचा उपक्रम हे स्वच्छ सुंदर विकसित कसबासाठी महत्वाचे पाऊल आहे. वापरण्यायोग्य वस्तूंचा पुनर्वापर, कचऱ्याचे प्रमाण कमी करणे आणि गरजूंपर्यंत वस्तू पोहोचविणे, या तिन्ही उद्देशांची सांगड या उपक्रमातून घालण्यात आली. नागरिकांच्या सहभागातून स्वच्छतेची जबाबदारी सामूहिक असल्याचा संदेश या माध्यमातून दिल्यात आला”.
जुना टीव्ही, सायकल तसेच कपडे घरामध्ये पडून होते. मात्र त्या फेकून देण्याऐवजी त्यांचा पुनर्वापर होऊ शकतो. या उपक्रमामुळे जुन्या वस्तू गरजूंपर्यंत पोहोचण्यास मदत होणार आहे. – दिपक खेवलेकर, नवी पेठ
दिवाळीच्या स्वच्छतेमध्ये घरातील जुने कपडे, भांडी, चादरी, खेळणी आणि इतर वापरण्यायोग्य वस्तू जमा केल्या. या वस्तू दुसऱ्या कोणाच्या तरी उपयोगी पडतील, याचा आनंद आहे. – शकुंतला तावरे, कसबा पेठ
