‘कोण होणार करोडपती’मध्ये गौतमी पाटील आणि शिव ठाकरे यांची विशेष उपस्थिती; माधुरीच्या फर्माइशीवर रंगणार नृत्याची मैफल
मुंबई | माय मराठी वृत्तसेवा
मराठी मनोरंजनविश्वातील लोकप्रिय नृत्यांगना गौतमी पाटील आता अभिनेत्री माधुरी दीक्षितसमोर आपल्या नृत्याची झलक दाखवणार आहे. सोनी मराठीवरील ‘कोण होणार करोडपती’ या कार्यक्रमाच्या आगामी भागात गौतमी पाटील आणि शिव ठाकरे हॉटसीटवर विराजमान होणार असून, माधुरीच्या खास फर्माइशीवर गौतमी ‘पाटलांचा बैलगाडा’ या गाण्याची हुकस्टेप सादर करणार आहे.
“आपल्याला खेळ आता कातिल करायचा आहे!” असे म्हणत माधुरी गौतमी आणि शिवसोबतच्या गप्पांना रंगत आणणार आहे. कार्यक्रमादरम्यान गौतमीच्या निळ्या रंगाच्या नऊवारी साडीतील मराठमोळ्या लूकचेही माधुरी कौतुक करणार आहे.
या भागातील विशेष आकर्षण ठरणार आहे ते गौतमीचे नृत्य. गप्पांच्या ओघात माधुरी तिला ‘पाटलांचा बैलगाडा’ गाण्याची हुकस्टेप करून दाखवण्याची विनंती करणार आहे. गौतमीही हॉटसीटवर बसल्या-बसल्याच आपल्या खास शैलीत ठेका धरणार आहे. तिच्या या उत्स्फूर्त नृत्याला माधुरी टाळ्या वाजवून दाद देणार आहे.
यापूर्वी ‘कोण होणार करोडपती’मध्ये रेणुका शहाणे,सचिन पिळगावकर, मधुराणी गोखले, प्रिया बेर्डे आणि ‘महाराष्ट्राची हास्यजत्रा’मधील कलाकारांसोबत माधुरीच्या रंगतदार गप्पा पाहायला मिळाल्या आहेत. आता गौतमी पाटील आणि शिव ठाकरे यांच्या उपस्थितीमुळे कार्यक्रमात आणखी रंगत येणार आहे.
गौतमीच्या नृत्याची झलक सोशल मीडियावरही लक्ष वेधून घेत आहे. मात्र, प्रश्नोत्तरांच्या खेळात गौतमी आणि शिव ठाकरे कशी कामगिरी करणार, याची उत्सुकता प्रेक्षकांना लागली आहे.
‘कोण होणार करोडपती’ — सोमवार ते शनिवार, रात्री ९ वाजता, सोनी मराठी आणि Sony LIV वर.
