३२ व्या पुणे नवरात्रौ महोत्सवात ‘लता युग’ची सुरेल मैफल; लतादीदींच्या अजरामर गीतांनी रसिक मंत्रमुग्ध, ‘ए मेरे वतन के लोगो’ने वातावरण भावूक
पुणे | माय मराठी प्रतिनिधी
भारतरत्न, स्वरसम्राज्ञी लता मंगेशकर यांच्या अजरामर गीतांचा सुरेल प्रवास, संगीतकारांच्या अविस्मरणीय रचना आणि रसिकांचा उत्स्फूर्त प्रतिसाद अशा वातावरणात ३२ व्या पुणे नवरात्रौ महोत्सवातील ‘लता युग’ हा विशेष सांगीतिक कार्यक्रम रंगला. श्री गणेश कला क्रीडा रंगमंदिरात झालेल्या या कार्यक्रमात लतादीदींच्या गीतांनी रसिकांना मंत्रमुग्ध केले. प्रत्येक गीताला टाळ्यांचा कडकडाट आणि काही गीतांना ‘वन्स मोअर’ची दाद मिळाली.
महोत्सवाच्या नवव्या दिवशी निर्माता, दिग्दर्शक आणि निवेदक संदीप पंचवाटकर यांनी ‘लता युग’ हा कार्यक्रम सादर केला. विविध संगीतकारांनी स्वरबद्ध केलेल्या आणि लतादीदींच्या स्वरांनी अजरामर झालेल्या गीतांचा या कार्यक्रमातून सुरेल आढावा घेण्यात आला.
अजरामर गीतांनी उजळल्या आठवणी
शंकर-जयकिशन, लक्ष्मीकांत-प्यारेलाल, आर. डी. बर्मन, जतीन-ललित, रोशन, पं. हृदयनाथ मंगेशकर यांच्यासह विविध संगीतकारांच्या रचना कार्यक्रमात सादर झाल्या. गुलजार, हसरत जयपुरी, शैलेंद्र, आनंद बक्षी, इंदीवर, कवी प्रदीप, सुरेश भट आणि अन्य गीतकारांच्या शब्दांना लाभलेल्या लतादीदींच्या स्वरांची जादू पुन्हा एकदा अनुभवायला मिळाली.
‘नाम गुम जायेगा’, ‘आजा आई बहार’, ‘मेघा रे मेघा’, ‘फूल तुम्हें भेजा है’, ‘तुझसे नाराज नहीं जिंदगी’, ‘तुझे देखा तो ये जाना सनम’, ‘बाहों में चले आओ’, ‘मेंदीच्या पानावर’, ‘लग जा गले’, ‘सलाम-ए-इश्क’, ‘दिल दीवाना’, ‘मन क्यूं बहका’, ‘इस मोड से जाते हैं’ आणि ‘होठों पे ऐसी बात’ यांसारख्या लोकप्रिय गीतांनी रसिकांना जुन्या आठवणींमध्ये रमवले.
आबा बागुल यांच्या गायनालाही ‘वन्स मोअर’
कार्यक्रमादरम्यान ‘सलाम-ए-इश्क’ या गीतातील दोन कडवी पुणे नवरात्रौ महोत्सवाचे आयोजक अध्यक्ष आबा बागुल यांनी स्वतः सादर केली. त्यांच्या गायनालाही रसिकांनी ‘वन्स मोअर’ची दाद दिली.
प्रत्येक गीताची पार्श्वभूमी आणि त्यामागील संगीतविश्व उलगडून सांगणारे संदीप पंचवाटकर यांचे अभ्यासपूर्ण आणि रसाळ निवेदन हे कार्यक्रमाचे विशेष आकर्षण ठरले.
‘ए मेरे वतन के लोगो’ने सारे सभागृह उभे राहिले
कार्यक्रमाच्या अखेरीस लता मंगेशकर यांनी अजरामर केलेले कवी प्रदीप यांचे ‘ए मेरे वतन के लोगो’ हे देशभक्तिपर गीत सादर झाले. या गीतावेळी सभागृहातील रसिक आदराने उभे राहिले. देशभक्तीच्या भावनेने भारावलेल्या वातावरणात या सुरेल मैफलीची सांगता झाली.
कलाकारांच्या सादरीकरणाला उत्स्फूर्त दाद
कार्यक्रमात गायिका रेशमी मुखर्जी, भाग्यश्री डुंभरे, अनुश्री घोरपडे आणि सहगायक गफार मोमीन यांनी गीतांचे सादरीकरण केले. तबल्यावर गोविंद कुडाळकर, ढोलकवर नागेश भोसेकर, ऑक्टोपॅडवर संजय खाडे, कीबोर्डवर संतोष खंडागळे आणि संगीत संयोजन व कीबोर्डवर सईद खान यांनी साथसंगत केली. सर्व कलाकारांचे रसिकांनी भरभरून कौतुक केले.
कार्यक्रमाच्या प्रारंभी आबा बागुल, पुणे नवरात्रौ महिला महोत्सवाच्या अध्यक्षा जयश्री बागुल, अपर पोलीस आयुक्त संजय पाटील, प्रतिभा पाटील आणि उद्योगपती चांडक यांच्या हस्ते कलाकारांचा सत्कार करण्यात आला.
या वेळी नंदकुमार बानगुडे, रमेश भंडारी, नंदकुमार कोंढाळकर, अमित बागुल, हेमंत बागुल, सागर आरोळे यांच्यासह अनेक मान्यवर उपस्थित होते. घनश्याम सावंत यांनी आभार मानले.
‘लता युगात जन्मलो, हेच आपले भाग्य’
कार्यक्रमाचा समारोप करताना आबा बागुल यांनी लता मंगेशकर यांच्या स्वरांचे भारतीय संगीतविश्वातील योगदान अधोरेखित केले.
‘आपण सारे लता युगात जन्मलो, हे आपले भाग्य आहे,’ अशा शब्दांत त्यांनी लतादीदींविषयी कृतज्ञता व्यक्त केली.
लतादीदींच्या स्वरांची जादू, कलाकारांचे प्रभावी सादरीकरण आणि रसिकांची उत्स्फूर्त दाद यामुळे ‘लता युग’ ही मैफल पुणे नवरात्रौ महोत्सवातील संस्मरणीय सांगीतिक अनुभव ठरली.
