पुणे, दि. १६- : १३६ इन्फंट्री बटालियन (टीए) इको महारमध्ये सशस्त्र दलातील भूतपूर्व सैनिक तसेच केंद्रीय व राज्य वन विभागातील पात्र भूतपूर्व महिला कर्मचाऱ्यांसाठी भरती मेळाव्याचे आयोजन करण्यात आले आहे. भरती प्रक्रिया १८ ते २१ ऑक्टोबर २०२६ या कालावधीत भगत पॅव्हेलियन, बॉम्बे इंजिनिअर ग्रुप अँड सेंटर, खडकी, पुणे येथे, तर २४ ते २७ ऑक्टोबर २०२६ या कालावधीत सैनिक स्कूल, सातारा येथे सकाळी ५ वाजल्यापासून होणार आहे.
या भरतीमध्ये सैनिक (जनरल ड्युटी) पदाच्या १२९ जागा आणि ट्रेडसमनच्या १० जागा उपलब्ध आहेत. ट्रेडसमनमध्ये सैनिक क्लार्क (जनरल ड्युटी) ७, हाऊसकीपर १, शेफ कम्युनिटी १ आणि धोबी १ अशा पदांचा समावेश आहे. या पदांसाठी संपूर्ण भारतातील पात्र उमेदवार अर्ज करू शकतात.
पात्रता व अटी : उमेदवार सशस्त्र दलातील निवृत्तिवेतनधारक भूतपूर्व सैनिक किंवा वने व हवामान बदल मंत्रालय (MoEF&CC) तसेच राज्य वन विभागात किमान २० वर्षे सेवा केलेले भूतपूर्व महिला कर्मचारी असणे आवश्यक आहे. संबंधित उमेदवारांची सेवानिवृत्ती किंवा सेवामुक्तीच्या तारखेपासून भरतीच्या तारखेपर्यंत पाच वर्षांच्या आत नोंदणी होणे आवश्यक आहे. वैद्यकीय श्रेणी शेप-१ असणे, चारित्र्य अनुकरणीय किंवा अतिशय चांगले असणे आणि कोणत्याही दिवाणी अथवा फौजदारी प्रकरणात सहभाग नसणे आवश्यक आहे. निवड झालेल्या उमेदवारांची वैद्यकीय तपासणी करण्यात येईल.
आवश्यक कागदपत्रे : मूळ निवृत्तिवेतन आदेश (पीपीओ), मूळ डिस्चार्ज बुक व त्याची स्वयं-साक्षांकित प्रत, अधिवास प्रमाणपत्र, भूतपूर्व सैनिक ओळखपत्र, आधार कार्ड व त्याची स्वयं-साक्षांकित प्रत, अलीकडील रंगीत पासपोर्ट आकाराची १० छायाचित्रे आणि शैक्षणिक प्रमाणपत्रे सोबत आणावीत.
भरती मेळाव्याच्या ठिकाणी मोबाईल फोनला परवानगी नसल्याचेही स्पष्ट करण्यात आले आहे. अधिक माहितीसाठी ९१६८१६८१३६ या क्रमांकावर संपर्क साधावा, असे आवाहन जिल्हा सैनिक कल्याण अधिकारी, पुणे यांनी केले आहे.
00000
