विद्यार्थ्यांची नावे, पत्ते, आधारकार्ड, टेनंट व्हेरिफिकेशनसह माहिती २४ तासांत मागवली; MPSC आंदोलनाच्या पार्श्वभूमीवर नोटिशीवरून वाद
पुणे : महाराष्ट्र लोकसेवा आयोगाच्या (MPSC) कारभाराविरोधात पुण्यात सुरू असलेल्या विद्यार्थ्यांच्या आंदोलनाच्या पार्श्वभूमीवर विश्रामबाग पोलीस ठाण्याकडून काही हॉस्टेल, पीजी आणि वसतिगृहांना विद्यार्थ्यांची सविस्तर माहिती सादर करण्याची नोटीस देण्यात आल्याने नव्या वादाला तोंड फुटले आहे. या नोटिशीचा फोटो आमदार रोहित पवार यांनी सोशल मीडियावर शेअर करत पुणे पोलिसांवर तीव्र टीका केली आहे.
विश्रामबाग पोलीस ठाण्याचे वरिष्ठ पोलीस निरीक्षक नवनाथ जगताप यांच्या सहीने जारी करण्यात आलेल्या नोटिशीत सुरक्षेच्या कारणास्तव हॉस्टेल आणि पीजीमध्ये राहणाऱ्या व्यक्ती व विद्यार्थ्यांची माहिती मागवण्यात आली आहे. नोटिशीत पूर्वी झालेल्या बॉम्बस्फोट आणि दहशतवादी हल्ल्यांचा उल्लेख करत दहशतवादी, गुन्हेगार किंवा माहिती पुरवणाऱ्या व्यक्ती स्थानिक निवासव्यवस्थेत राहण्याची शक्यता नाकारता येत नसल्याचे म्हटले आहे.
नोटिशीनुसार संबंधित हॉस्टेल किंवा पीजीचे पूर्ण नाव, पत्ता आणि संपर्क क्रमांक, व्यवसायासाठी आवश्यक परवानग्यांच्या प्रती, जागामालक आणि भाडेकरू यांच्यातील करार, विद्यार्थ्यांचे ऑनलाइन टेनंट व्हेरिफिकेशन, आधारकार्ड तसेच ते ज्या लायब्ररी किंवा अकॅडमीमध्ये जातात त्या संस्थेचे ओळखपत्र मागवण्यात आले आहे. सर्व विद्यार्थ्यांची नावे, पत्ते आणि संपर्क क्रमांकांची यादीही पोलिसांकडे जमा करण्याचे निर्देश देण्यात आले आहेत.
याशिवाय पीजी अथवा हॉस्टेल चालत असलेल्या सोसायटीचे ना-हरकत प्रमाणपत्र, संबंधित व्यक्तींची ओळख व चारित्र्य पडताळणी, चालू मोबाईल क्रमांक, नोंदवही ठेवणे, सीसीटीव्ही बसवून किमान ६० दिवसांचा बॅकअप राखणे आणि विद्यार्थ्यांकडून मिळणारे भाडे शक्यतो ऑनलाइन स्वरूपात स्वीकारणे, अशा सूचनाही करण्यात आल्या आहेत.
ही सर्व माहिती नोटीस मिळाल्यापासून २४ तासांच्या आत विश्रामबाग पोलीस ठाण्यात प्रत्यक्ष हजर राहून सादर करण्यास सांगण्यात आले आहे. माहिती न दिल्यास भारतीय न्याय संहिता २०२३ मधील कलम २२३ अंतर्गत कारवाईचा इशारा देण्यात आला आहे.
दरम्यान, ही नोटीस समोर आल्यानंतर रोहित पवार यांनी तिच्यावर तीव्र आक्षेप घेतला. “पुणे CP साहेबांचं डोकं ठिकाणावर आहे का?” असा सवाल करत त्यांनी गरीब, शेतकरी आणि कष्टकरी कुटुंबांतील विद्यार्थ्यांना दहशतवादी किंवा गुप्तहेरांच्या संदर्भात पाहिले जात असल्याचा आरोप केला. “इतक्याही लाजा विकू नका,” असे म्हणत त्यांनी मुख्यमंत्री देवेंद्र फडणवीस यांच्याकडेही संबंधित अधिकाऱ्यांना समज देण्याची मागणी केली.
मात्र, पोलिसांच्या नोटिशीत MPSC आंदोलनातील विद्यार्थ्यांना थेट ‘दहशतवादी’ म्हटलेले नाही. नोटिशीत सुरक्षेचा सर्वसाधारण संदर्भ देत हॉस्टेल-पीजीतील रहिवाशांची पडताळणी करण्याचे कारण नमूद करण्यात आले आहे. रोहित पवार यांनी या शब्दरचनेचा संबंध आंदोलनाच्या परिसरातील विद्यार्थ्यांशी जोडत आक्षेप घेतला आहे.
पुण्यातील MPSC आंदोलन सुरू असतानाच विद्यार्थ्यांवर गुन्हे दाखल करणे, आंदोलनस्थळी निर्बंध आणणे आणि आता हॉस्टेल-पीजीमधील विद्यार्थ्यांची माहिती मागवण्याच्या या नोटिशीमुळे प्रशासन आणि आंदोलकांमधील संघर्ष अधिक तीव्र झाला आहे. विश्रामबाग पोलिसांनी आंदोलनासंदर्भात १५ जणांविरुद्ध गुन्हा दाखल केला असून विनापरवाना ड्रोन वापरल्याप्रकरणी आणखी एक गुन्हा नोंदवण्यात आला आहे.
