‘नाम फाऊंडेशन’च्या माध्यमातून शेतकरी आणि ग्रामीण भागासाठी केलेले कार्यही सदैव स्मरणात राहील
पुणे : भारतीय चित्रपटसृष्टीतील ज्येष्ठ आणि प्रतिभावंत अभिनेते नाना पाटेकर यांच्या निधनाबद्दल केंद्रीय राज्यमंत्री मुरलीधर मोहोळ यांनी तीव्र दुःख व्यक्त केले. नाना पाटेकर यांच्या जाण्याने भारतीय चित्रपटसृष्टीने एक महान कलावंत आणि जिव्हाळ्याचे व्यक्तिमत्त्व गमावले असल्याची भावना त्यांनी व्यक्त केली.
मोहोळ म्हणाले, पाच दशकांहून अधिक काळ नाना पाटेकर यांनी आपल्या विलक्षण अभिनय सामर्थ्याने मराठी आणि हिंदी चित्रपटसृष्टीवर अमिट ठसा उमटवला. प्रभावी संवादफेक, सहजसुंदर अभिनय आणि प्रत्येक भूमिकेला जिवंत करण्याची अनोखी हातोटी यामुळे त्यांनी साकारलेली असंख्य पात्रे रसिकांच्या मनात कायमची घर करून राहिली.
नाना पाटेकर यांचे मोठेपण केवळ अभिनयापुरते मर्यादित नव्हते, असे सांगत मोहोळ यांनी त्यांच्या सामाजिक कार्याचाही विशेष उल्लेख केला. पडद्यावर जितके प्रभावी, तितकेच प्रत्यक्ष आयुष्यात संवेदनशील आणि सामाजिक बांधिलकी जपणारे त्यांचे व्यक्तिमत्त्व होते, असे ते म्हणाले.
‘नाम फाऊंडेशन’च्या माध्यमातून जलसंधारण, पाणी व्यवस्थापन आणि ग्रामीण भागातील विविध उपक्रमांसाठी नाना पाटेकर यांनी दिलेले योगदान अत्यंत मोलाचे आहे. विशेषतः आत्महत्याग्रस्त शेतकरी कुटुंबांच्या पाठीशी खंबीरपणे उभे राहत त्यांनी अनेकांच्या आयुष्यात आशेचा किरण निर्माण केला, असे मोहोळ यांनी नमूद केले.
“एक उत्तुंग अभिनेता, स्पष्टवक्ता माणूस आणि समाजभान जपणारे संवेदनशील व्यक्तिमत्त्व म्हणून नाना कायम स्मरणात राहतील. त्यांचे निधन ही कला, समाज आणि व्यक्तिगत पातळीवरही कधीही भरून न निघणारी हानी आहे,” अशा शब्दांत मोहोळ यांनी श्रद्धांजली अर्पण केली.
नाना पाटेकर यांच्या आत्म्यास सद्गती लाभो आणि त्यांच्या कुटुंबीयांना या दुःखातून सावरण्याचे बळ मिळो, अशी प्रार्थनाही त्यांनी केली.
