“MPSC अध्यक्षांसह मंत्री अतुल सावेंचाही राजीनामा घ्या”; परीक्षा व्यवस्थेवर गंभीर सवाल
पुणे : पुण्यात सुरू असलेल्या MPSC विद्यार्थ्यांच्या सत्याग्रह आंदोलनाचा आज सातवा दिवस असून, आंबेगाव बुद्रुक येथील महाज्योतीच्या स्कॉलरशिप परीक्षेत झालेल्या गोंधळावरून आमदार रोहित पवार यांनी राज्य सरकारवर जोरदार टीका केली. परीक्षा केंद्रावर संगणक उपलब्ध नसल्याने विद्यार्थिनींना परीक्षा देता आली नाही आणि अखेर परीक्षा रद्द करावी लागल्याच्या घटनेनंतर पवार यांनी MPSC अध्यक्ष विवेक भीमनवार यांच्यासह मंत्री अतुल सावे यांच्या राजीनाम्याची मागणी केली.
आंबेगाव बुद्रुक येथील परीक्षा केंद्रावर सकाळी ९ ते ११ या वेळेत परीक्षा नियोजित होती. मात्र, विद्यार्थिनींच्या म्हणण्यानुसार, परीक्षा घेण्यासाठी आवश्यक संगणक उपलब्ध नसल्याने परीक्षा सुरूच होऊ शकली नाही. सुमारे दोन तास प्रतीक्षा केल्यानंतर अखेर परीक्षा रद्द करण्यात आल्याने विद्यार्थिनी आणि पालकांमध्ये संतापाचे वातावरण निर्माण झाले.
“MPSCनंतर आता महाज्योतीच्या परीक्षेतही घोळ”
या घटनेवर प्रतिक्रिया देताना रोहित पवार यांनी परीक्षा व्यवस्थेवर प्रश्न उपस्थित केले. MPSCच्या कारभाराविरोधात विद्यार्थी सात दिवसांपासून आंदोलन करत असतानाच महाज्योतीच्या परीक्षेतही गोंधळ झाल्याचे त्यांनी म्हटले.
“विद्यार्थ्यांना अभ्यास करायचा आहे. मात्र परीक्षा व्यवस्थेत वारंवार घोटाळे, गोंधळ आणि तांत्रिक अडचणी होत असतील तर त्यांनी अभ्यास कसा करायचा?” असा सवाल त्यांनी उपस्थित केला.
भीमनवारांसोबत अतुल सावेंच्या राजीनाम्याची मागणी
महाज्योतीच्या परीक्षेतील गोंधळाचा संदर्भ देत रोहित पवार यांनी MPSC अध्यक्ष विवेक भीमनवार यांच्यासह मंत्री अतुल सावे यांच्या राजीनाम्याची मागणी केली.
“विद्यार्थ्यांच्या भविष्याशी खेळ सुरू आहे. MPSC अध्यक्षांना घरी पाठवा, विद्यार्थ्यांच्या मागण्या मान्य करा आणि जबाबदार मंत्र्यांनीही जबाबदारी स्वीकारली पाहिजे,” अशी भूमिका त्यांनी मांडली.
उच्च न्यायालयातील सुनावणीकडेही लक्ष
दरम्यान, पुण्यातील MPSC विद्यार्थ्यांच्या आंदोलनासंदर्भात उच्च न्यायालयातही सुनावणी झाली आहे. आंदोलनस्थळी कायदा-सुव्यवस्था, वाहतूक आणि विद्यार्थ्यांच्या आंदोलनाचा प्रश्न यावर न्यायालयात चर्चा झाल्याची माहिती समोर आली आहे.
रोहित पवार यांनी मात्र विद्यार्थ्यांचे प्रश्न सुटेपर्यंत त्यांना वाऱ्यावर सोडणार नसल्याचे स्पष्ट केले. परीक्षा प्रक्रियेत पारदर्शकता आणणे, विद्यार्थ्यांच्या मागण्यांवर निर्णय घेणे आणि MPSC अध्यक्षांविरोधातील कारवाई या मागण्यांवर ते ठाम असल्याचे त्यांनी सांगितले.
महाज्योतीची परीक्षा पुन्हा कधी?
आंबेगाव बुद्रुक येथील परीक्षा केंद्रावर परीक्षा रद्द झाल्यानंतर आता विद्यार्थ्यांना पुन्हा परीक्षा देण्याची संधी कधी मिळणार, याकडे लक्ष लागले आहे. दुसरीकडे MPSC आंदोलनाच्या सातव्या दिवशीही विद्यार्थ्यांचा आक्रोश कायम असून सरकारकडून पुढील निर्णयाची प्रतीक्षा आहे.
