मोर्चा रोखल्यानंतर पोलिसांना चकवा देत दोघे आवारात; EC म्हणते—भेटीसाठी औपचारिक विनंतीच आलेली नाही
नवी दिल्ली : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी काढण्यात आलेला विरोधकांचा मोर्चा पोलिसांनी रोखल्यानंतर आंदोलनाने नवे वळण घेतले आहे. राहुल गांधी आणि प्रियांका गांधी वाड्रा यांनी ताब्यात घेण्यासाठी उभ्या केलेल्या बसमधून खाली उतरून आकाशवाणी भवनाच्या आवारात प्रवेश केला आणि तेथे ठिय्या आंदोलन सुरू ठेवले. संध्याकाळपर्यंत दोघेही आंदोलनस्थळी कायम होते.
आकाशवाणी भवनापासून निवडणूक आयोगाचे मुख्यालय अतिशय जवळ असल्याने परिसरात मोठा पोलीस आणि रॅपिड अॅक्शन फोर्सचा बंदोबस्त ठेवण्यात आला आहे. पोलिसांनी आंदोलन संपवण्याचे आवाहन केले, मात्र काँग्रेस नेत्यांनी ते मान्य केले नाही.
राहुल गांधी यांनी, “मुख्य निवडणूक आयुक्तांनी आमची भेट घेतल्याशिवाय आम्ही इथून जाणार नाही. आम्ही जनतेचे प्रतिनिधी आहोत; आमचे म्हणणे ऐकले गेले पाहिजे,” अशी भूमिका मांडली. त्यांनी सुमारे 300 विरोधी खासदार आपल्यासोबत असल्याचा दावा करत निवडणूक आयोगाच्या भूमिकेवर प्रश्न उपस्थित केले.
दरम्यान, निवडणूक आयोगाच्या सूत्रांनी वेगळी भूमिका मांडली आहे. राहुल गांधी किंवा अन्य विरोधी पक्षांकडून मुख्य निवडणूक आयुक्तांना भेटण्यासाठी कोणतीही औपचारिक विनंती किंवा पूर्वनियोजित वेळ मागण्यात आलेली नसल्याचा दावा आयोगाच्या सूत्रांनी केला आहे.
आंदोलनादरम्यान प्रियांका गांधी तिरंग्यासमोर उभ्या राहिल्या असताना काही पोलीस अधिकारी त्यांच्याशी बोलण्यासाठी पुढे आले. त्या वेळी राहुल गांधी यांनी पोलिसांना त्यांना हात न लावण्यास सांगितल्याचे दृश्यही समोर आले. यामुळे आंदोलनातील तणाव आणखी वाढला.
दिल्लीतील या आंदोलनाच्या पार्श्वभूमीवर पोलिसांनी मोठा बंदोबस्त ठेवला आहे. गेल्या काही दिवसांतील विविध आंदोलनांशी संबंधित नऊहून अधिक FIR दाखल करण्यात आल्याचे वृत्त आहे
