पुरुषोत्तम जगतापांचे प्रत्युत्तर — “अजितदादा आमच्या हृदयात आहेत; नाव वापरणारच”
पुणे : बारामती तालुक्यातील प्रतिष्ठेच्या श्री सोमेश्वर सहकारी साखर कारखान्याच्या निवडणुकीत राष्ट्रवादी काँग्रेसमधील अंतर्गत बंडखोरीमुळे राजकीय वातावरण तापले आहे. राष्ट्रवादीतून बंडाचा झेंडा उभारलेल्या पुरुषोत्तम जगताप यांनी भाजपच्या पाठिंब्याने ‘लोकनेते अजितदादा सोमेश्वर विकास पॅनल’ रिंगणात उतरवले आहे. या पार्श्वभूमीवर उपमुख्यमंत्री सुनेत्रा पवार यांनी बंडखोरांना उद्देशून, “अजितदादांचे नाव न वापरता स्वतःच्या कर्तृत्वावर निवडणूक लढवा” असे थेट आव्हान दिले.
सुनेत्रा पवार म्हणाल्या की, अजित पवार यांच्या नेतृत्वाचा आणि नावाचा आधार घेऊन त्यांच्या कुटुंबाविरोधात निवडणूक लढवणे योग्य नाही. “स्वतःच्या कर्तृत्वावर विश्वास असेल तर अजितदादांचे नाव वापरू नका. नाव दादांचे आणि नाराजी कुटुंबावर, हे कसलं समीकरण?” असा सवाल त्यांनी केला.
या आव्हानाला पुरुषोत्तम जगताप यांनीही प्रत्युत्तर दिले. “कारखान्याच्या विकासासाठी आणि सभासदांच्या हितासाठी आम्ही स्वतंत्र भूमिका घेतली आहे. अजितदादा आमच्या हृदयात आहेत. त्यांना सभासदांच्या मनातून कसे काढणार?” असा सवाल त्यांनी उपस्थित केला. त्यांनी अजित पवारांचे नाव वापरण्याची भूमिका कायम ठेवली असल्याचे स्पष्ट केले.
दरम्यान, सोमेश्वर कारखान्याच्या निवडणूक निर्णय अधिकाऱ्यांनी पुरुषोत्तम जगताप यांच्या पॅनेलला दिवंगत अजित पवार यांचे नाव आणि छायाचित्र वापरण्यास मनाई केल्याचेही समोर आले आहे. त्यामुळे या निवडणुकीतील ‘अजितदादा’ नावाभोवतीचे राजकारण आणखी तीव्र झाले आहे.
अजित पवारांचा फ्लेक्स हटवला
पक्षाच्या स्थानिक नेतृत्वाने अजित पवार यांच्या नावाचा किंवा छायाचित्राचा वापर करण्यापूर्वी कुटुंबीयांची परवानगी घ्यावी, असे आवाहन केल्यानंतर पुरुषोत्तम जगताप यांनी वानेवाडी येथील प्रचार मेळाव्यातील अजित पवारांचा फ्लेक्स काढून टाकला. मात्र “फोटो लावला किंवा नाही, अजितदादा आमच्या मनात आहेत,” अशी भूमिका त्यांनी घेतली.
83 उमेदवारांमध्ये तिरंगी लढत
सोमेश्वर सहकारी साखर कारखान्याच्या निवडणुकीत एकूण 601 अर्ज दाखल झाले होते. छाननीनंतर 514 अर्ज पात्र ठरले, त्यापैकी 431 उमेदवारांनी माघार घेतल्याने आता 83 उमेदवार प्रत्यक्ष रिंगणात आहेत.
या निवडणुकीत सुनेत्रा पवार यांच्या नेतृत्वाखालील राष्ट्रवादी काँग्रेसचे पॅनेल, युगेंद्र पवार यांच्या नेतृत्वाखालील राष्ट्रवादी काँग्रेस (शरदचंद्र पवार) समर्थित पॅनेल आणि भाजपच्या पाठिंब्याने पुरुषोत्तम जगताप यांचे पॅनेल अशी तिरंगी लढत रंगणार आहे.
अजित पवारांच्या नावावरून रंगलेली ही नवी राजकीय लढाई आता सोमेश्वर कारखान्याच्या निवडणुकीतील सर्वात मोठा मुद्दा बनली आहे. एका बाजूला सुनेत्रा पवार यांनी “स्वकर्तृत्वावर लढा” असे आव्हान दिले आहे, तर दुसऱ्या बाजूला जगतापांनी “अजितदादा आमच्या हृदयात आहेत” असे प्रत्युत्तर दिल्याने प्रचार आणखी चुरशीचा झाला आहे.
