पुणे : पुणे महानगर परिवहन मंडळातील कर्मचाऱ्यांना सातवा वेतन आयोग मिळावा या मागणीसाठी राष्ट्रवादी काँग्रेस पी.एम.पी.एल कामगार युनियनच्या वतीने पुणे महानगरपालिकेस घेराव घालून व आंदोलन करण्यात आले होते .आंदोलनानंतर येत्या महानगरपालिका निवडणुकीत भाजपच्या विरोधात मोठा रोष निर्माण होऊ शकतो असे दिसताच सत्ताधाऱ्यांनी सातवा वेतन आयोग लागू करण्याचा निर्णय स्थायी समितीच्या बैठकीत घेतला. यासाठीचा ठराव नगरसेवक प्रदीप गायकवाड यांनी दिला होता तर त्यास अनुमोदन नगरसेविका नंदा लोणकर यांनी दिले होते. राष्ट्रवादी काँग्रेस पार्टीच्या आंदोलनाला आज यश आले आहे. स्थायी समितीच्या वतीने पीएमपीएल कर्मचाऱ्यांच्या सातव्या वेतन आयोगासाठी ६ कोटी रुपये देण्यात आले आहेत.
याबाबत माहिती देताना विरोधी पक्षनेत्या दिपाली धुमाळ म्हणाल्या, पुणे महानगरपालिका कर्मचारी यांच्या प्रमाणे पीएमपीएल कर्मचाऱ्यांना सातवा वेतन आयोग मिळावा, ही ठाम भूमिका राष्ट्रवादी काँग्रेस पार्टीचे होती. आज राष्ट्रवादी काँग्रेसच्या समितीमधील सदस्यांनी ठराव दिला. त्यानुसार स्थायी समितीने कामगारांना सातवा वेतन आयोग देण्यासाठी ६ कोटी रुपये दिले आहेत.