पुणे-
कष्टकरी जनता आघाडी आणि महाराष्ट्र रिक्षा पंचायत वतीने ‘मी समतेचा वारकरी, सेवा हीच माझी पंढरी’ हा उपक्रम राबविण्यात येणार आहे. संघटनेचे अध्यक्ष कष्टकऱ्यांचे नेते बाबा कांबळे यांच्या नेतृत्वाखाली हा उपक्रम राबविण्यात येणार आहे. या मध्ये वारकऱ्यांना सुमारे १८ वेगवेगळ्या पद्धतीच्या सेवा देण्याचा निर्धार संघटनेचा आहे. या मध्ये आरोग्य, मोफत रिक्षा, चप्पल, बूट दुरुस्ती आदींसह विविध सेवांचा समावेश आहे. निगडी ते पंढरपूर या मार्गापर्यंत संघटनेचे पदाधिकारी ही सेवा देणार आहेत. २१ जुनपासून ही सेवा निगडी पासून सुरु करणार असल्याची माहिती, बाबा कांबळे यांनी प्रसिद्धीपत्रकाद्वारे दिली.
बाबा कांबळे यांनी दिलेल्या प्रसिद्धीपत्रकात नमूद केले आहे की, आषाढी वारीमध्ये राज्यभरासह देशभरातून अनेक वारकरी पंढरीकडे विठुरायाच्या दर्शनासाठी जात असतात. त्यावेळी त्यांची होणारी गैरसोय टाळण्यासाठी अनेक सेवाभावी संस्था काम करतात. अनेक कष्टकऱ्यांना थेट पंढरपूरपर्यंत जाऊन विठुरायाचे दर्शन घेता येत नाही. त्यामुळे आपले काम आणि वारकऱ्यांची सेवा करण्यातच विठ्ठलाचे दर्शन होते, अशी भावना कष्टकऱ्यांची असते. त्यामुळे येणाऱ्या आषाढी वारीमध्ये ‘मी समतेचा वारकरी, सेवा हीच माझी पंढरी’ हा उपक्रम बाबा कांबळे यांच्या नेतृत्वाखाली कष्टकरी जनता आघाडी आणि महाराष्ट्र रिक्षा पंचायतीच्या वतीने राबविण्यात येणार आहे. त्यामध्ये वारकऱ्यांना वेगवेगळ्या पद्धतीच्या १८ सुविधा देण्याचा संघटनेचा मानस आहे.
२१ जुन सायंकाळी ४ वाजता या उपक्रमाला सुरुवात होणार आहे. निगडी लोकमान्य टिळक चौक रिक्षा स्टँड समोरून मोफत रिक्षा सेवा देण्यात येणार आहे. या मध्ये अपंग, वयोवृद्ध,आजारी, दिंडीत वारकरी भक्तांसाठी ही मोफत रिक्षा सेवा देण्यात येणार आहे. छत्री, बॅग दुरुस्ती करून देण्यात येणार आहे. बूट, चप्पलची सेवा देण्यात येणार आहे. या बरोबरच अन्नधान्य, फळवाटप, दिंडी चालक मालकांसाठी फळे व भाजी पुरवठा करण्यात येणार आहे. 22 जून रोजी सकाळी ६ वाजता महात्मा फुले ग्रंथालय, भक्ती कॉम्प्लेक्स, खराळवाडी येथे मोबाईल चार्जिंग स्टेशन, तज्ञ डॉक्टरांच्या टीम सोबत प्राथमिक आरोग्य उपचार केंद्राची केशकर्तनालयाची, मालिशची सेवा सुविधा देण्यात येणार आहे. खडकीत भावगीत, कीर्तनाचा कार्यक्रम होणार आहे. 23 रोजी देवाजी बाबा मंदिर पुणे येथे, 24 जून रोजी हडपसर गाडीतळ पासून पंढपूरपर्यंत सेवा देणार असल्याचे बाबा कांबळे यांनी प्रसिद्धीपत्रकाद्वारे सांगितले.
