पुणे: नवीन वीजजोडणीसाठी सर्व प्रक्रिया पूर्ण केल्यानंतरही विलंब होत असल्याच्या तक्रारी निकाली काढण्याची प्रक्रिया थेट परिमंडलस्तरावरून सुरु झालेली आहे. यात 5 जणांकडे नवीन वीजजोडणी कार्यान्वित झाली आहे.
ज्या ग्राहकांनी महावितरणच्या घरगुती, वाणिज्यिक व औद्योगिक नवीन वीजजोडणीसाठी आवश्यक कागदपत्रांची पुर्तता केली आहे. फर्म कोटेशनची रक्कम भरली आहे, अशा ग्राहकांना वीजजोडणी देण्यास विलंब होत असल्यास त्याची थेट परिमंडलस्तरावर दखल घेऊन कार्यवाही करण्यात येत आहे. पुणे परिमंडल कार्यक्षेत्रातील ग्राहकांना कार्यालयीन कामकाजाच्या दिवशी व वेळेत 7875767123, 7875767058 या मोबाईल क्रमांकावर वीजजोडणीच्या विलंबाबाबत माहिती देता येईल. प्राप्त झालेल्या माहितीनुसार त्वरीत वीजजोडणी देण्याबाबत थेट परिमंडलस्तरावरून कार्यवाही करण्यात येणार आहे तसेच संबंधीत ग्राहकांना त्याबाबत कळविण्यात येणार आहे.
यात गेल्या महिन्याभरात सुमारे 175 कॉल्स प्राप्त झाले. त्यातील 14 तक्रारींमध्ये कोटेशनची रक्कम भरल्यानंतर वीजजोडणी देण्यास विलंब झाल्याचे नमूद होते. यात सिंगल फेज व तीन फेजच्या प्रत्येकी 7 तक्रारींचा समावेश आहे. सिंगल फेजच्या 7 पैकी 5 तक्रारींचे निवारण झाले असून उर्वरित दोन तक्रारींनुसार वीजजोडणी देण्याची कार्यवाही सुरु आहे. तर तीन फेजच्या 7 वीजजोडण्या कृषीपंपाच्या असून त्या प्रतीक्षायादीनुसार देण्यात येणार आहेत. उर्वरित कॉल्स हे विविध माहिती विचारण्यासाठी होते.
नवीन वीजजोडणीसाठी सर्व कागदपत्रांची पुर्तता व कोटेशनची रक्कम भरल्यानंतरही वीजजोडणीस विलंब होत असल्यास त्याची माहिती देण्यासाठी 7875767123, 7875767058 या मोबाईल क्रमांकावर संपर्क साधावा, असे आवाहन करण्यात आले आहे.