– पहा काही छायाचित्रे
मुंबई : ज्येष्ठ अभिनेते शशी कपूर यांना माहिती आणि प्रसारण मंत्री अरुण जेटली यांच्या हस्ते आज (रविवार) प्रतिष्ठेचा ‘दादासाहेब फाळके‘ पुरस्कार प्रदान करण्यात आला. चित्रपटसृष्टीतील दिग्गज कलाकारांच्या उपस्थितीत हा सोहळा पृथ्वी थिएटरमध्ये झाला.
गेल्या आठवड्यात राष्ट्रपती प्रणव मुखर्जी यांच्या हस्ते दिल्लीमध्ये पुरस्कारांचे वितरण झाले होते. मात्र, प्रकृतीअस्वास्थ्यामुळे शशी कपूर दिल्लीस जाऊ शकले नाहीत. त्यामुळे हा सोहळा मुंबईत आयोजित करण्यात आला होता. यावेळी अमिताभ बच्चन, रेखा, हेमामालिनी, झीनत अमान, वहीदा रेहमान, आशा पारेख, राज बब्बर, सैफ अली खान, जावेद अख्तर, आशा भोसले असे दिग्गज उपस्थित होते. याशिवाय, कपूर कुटुंबीयांमधील कुणाल कपूर, संजना कपूर, रणधीर कपूर, ऋषि कपूर, राजीव कपूर, करिष्मा कपूर, करीना कपूर, नीतूसिंह, रणबीर कपूर उपस्थित होते.
चित्रपटसृष्टीतील योगदानासाठी दिला जाणारा ‘दादासाहेब फाळके‘ पुरस्कार मिळण्याची ही कपूर कुटुंबाची तिसरी वेळ आहे. यापूर्वी पृथ्वीराज कपूर आणि राज कपूर या दोघांना ‘दादासाहेब फाळके‘ पुरस्काराने गौरविण्यात आले होते.