मुंबई – माहिती आयुक्त दीपक देशपांडे यांच्या मुंबई आणि औरंगाबादमधील घरांवर छापा टाकण्यात आला आहे. या कारवाईत देशपांडे यांच्या घरातून कोट्यावधींचा ऐवज हाती लागला आहे. महाराष्ट्र सदन घोटाळाप्रकरणी लाचलुचपत प्रतिबंधक विभागाने (एसीबी) अधिकाऱ्यांची झाडाझडती सुरू केली आहे . शनिवारी सायंकाळी ही कारवाई सुरू करण्यात आली.
महाराष्ट्र सदन घोटाळ्याप्रकरणी राज्याचे माजी सार्वजनिक मंत्री छगन भुजबळ यांच्यावर गुन्हा दाखल झाल्यानंतर एसीबीने आपली कारवाई एसीबीचे अतिरिक्त आयुक्त किशोर जाधव यांच्या नेतृत्वाखील ही कारवाई तीव्र केली आहे. दीपक देशपांडे हे तत्कालीन बांधकाम सचिव होते आणि त्यांचे नावही या घोटाळ्याशी जोडले गेले होते. त्यामुळेच एसीबीने त्यांच्या घरांवर छापा टाकला आहे.पोलिसांनी मुंबई आणि औरंगाबादमधील घरांची झडती घेतली असता त्यात दीड किलो सोने, २७ किलो चांदी, २.५ कोटी रुपयांचे फिक्स डिपॉजिट आणि बॉन्ड्स, अनेक गुंतवणूक कंपन्यांचे ६ हजार शेअर्स असा ऐवज देशपांडेंकडे असल्याचे उघड झाले.
देशपांडे यांच्या घरातून सापडलेल्या ऐवजाशिवाय त्यांची मुंबई, ठाणे, पुणे आणि औरंगाबादमध्ये आणखीही मालमत्ता आहे. दोन दुकाने, पुणे आणि औरंगाबादमध्ये पाच एकर जमीन त्यांच्या नावावर आहे, अशी माहिती प्राथमिक तपासात समोर आल्याचे एसीबीतील सूत्रांनी सांगितले.महाराष्ट्रातील कित्येक मोठे प्रकल्प जसे पुणे सातारा रस्त्यावरील खंबाटकी टोल, मुंबई पुणे एक्सप्रेस हायवे, मुंबई अहमदाबाद गोल्डन कबॉड्रंगल चारपदरी रस्त्याचे काम, वरळी बांद्रा सिलिंकचे प्रशासन अशी कामं त्यांनी केली आहेत. देशपांडे त्यांची १५ ऑक्टोबर, २०१० पासून राज्य माहिती आयुक्त या पदावर नियुक्ती झाली असून ते औरंगाबाद विभागाचा कार्यभार सांभाळत आहेत.
दरम्यान, देशपांडे यांच्यावरील कारवाईने भुजबळ यांच्या अडचणी आणखी वाढल्या असल्याचे मानले जाते देशपांडे यांच्या घरात महाराष्ट्र सदन घोटाळ्याशी संबंधित महत्वाचे धागेदोरे पोलिसांच्या हाती लागण्याची शक्यता आहे.