मुंबई-राष्ट्रवादीच्या हल्लाबोल यात्रेतून आणि नंतर पंकजा मुंडे यांच्या एका भाषणातून छगन भुजबळ यांच्या सुटकेचे संकेत गेल्या महिन्यात मिळाले होते त्यांनतर आज बेहिशोबी मालमत्तेप्रकरणी तुरुंगात असलेले छगन भुजबळ यांना मुंबई हायकोर्टाने जामीन मंजूर केल्याने त्यांचा कारागृहातील मुक्काम संपला असला तरी त्यांचा रुग्णालयातील मुक्काम मात्र संपलेला नाही . स्वादूपिंडाचा त्रास असल्यामुळे भुजबळांवर उपचार सुरु आहेत. सध्या केईएम रुग्णालयात त्यांच्यावर उपचार सुरु असून, त्यांना रुग्णालयातून घरी जाण्याची परवानगी देण्यात आलेली नाही.
महाराष्ट्र सदन, इंडिया बुल्स आदी प्रकरणांत काळा पैसा प्रतिबंधक कायद्यान्वये दाखल असलेल्या तीन गुन्ह्याप्रकरणी राज्याचे माजी सार्वजनिक बांधकाम मंत्री छगन भुजबळ यांना सक्तवसुली महासंचालनालयाकडून (ईडी) १४ मार्च २०१६ रोजी अटक करण्यात आली होती. भुजबळ यांची मुंबईतील ईडीच्या मुख्यालयात चौकशी सुरू होती. छगन भुजबळ यांनी आपण चौकशीत सर्वतोपरी सहकार्य करणार असल्याचे सांगितले होते मात्र, सरकारकडून सुडाचे राजकारण होत असल्याचा आरोप त्यांनी यावेळी केला होता.
भुजबळांसह १७ जणांवर आरोपपत्र
महाराष्ट्र सदन, इंडिया बुल्स या व्यवहारातून भुजबळ कुटुंबीयांना मिळालेल्या ८७० कोटी रुपयांबाबत महासंचालनालयाकडून चौकशी सुरू आहे. छगन भुजबळांसह त्यांचा मुलगा पंकज आणि समीर यांच्यासह १४ जणांवर आरोपपत्र दाखल करण्यात आले होते.
जामीन मिळणं हा त्यांचा अधिकार आहे तो त्यांना मिळाला आहे अशी प्रतिक्रिया राष्ट्रवादीचे नेते नवाब मलिक यांनी दिली आहे. आमचे नेते भुजबळ यांच्या संपर्कात होते असे ते म्हणाले. सरकारनं त्यांना जामीन मिळू नये असा खूप प्रयत्न केल्याचे सांगताना अखेर कायद्यानुसार त्यांना जामीन मिळाल्याचं त्यांनी म्हटलं आहे.