बेळगाव- केंद्र आणि कर्नाटकाच्या निषेधार्थ 1 नोव्हेंबर काळ्यादिनाची सायकल फेरी बेळगावात मराठी भाषिकांकडून काढण्यात आली. मराठी नगसेसवकांनी महापालिकेत सीमाप्रश्नाचा ठराव न मांडल्याचे पडसादही फेरीत उमटले. महापौर महेश नाईक यांच्या निवासस्थानावर ठिय्या आंदोलन करण्यात आले तर, नगरसेवक राजेंद्र बिर्जे यांच्या घरावर किरकोळ दगडफेक झाली.
मराठी बेळगावसह सीमाभागाचा समावेश कर्नाटकात केल्याच्या निषेधार्थ दरवर्षी बेळगावात काळादिन पाळला जातो. आज काढण्यात आलेल्या सायकल फेरीत म. ए. समितीच्या नेतृत्वाखाली हजारो मराठी भाषिक एकत्र आले होते. काळा शर्ट, दंडास काळ्या फिती बांधून केंद्र सरकार व कर्नाटक शासनाचा निषेध नोंदविण्यात आला. बेळगावच्या नामांतराविरोधातही या वेळी रोष व्यक्त झाला.
महापौर नाईक यांनी सीमाप्रश्नाचा ठराव मांडला नसल्याने तसेच काळ्यादिन फेरीपासून दूर राहिल्याने मराठी भाषिकांना त्याचाही निषेध नोंदविण्यात आला. काळ्यादिनाच्या फेरीत मराठी भाषिक सहभागी होउ नयेत यासाठी सकाळपासूनच परिवहन मंडळाने बससेवा बंद ठेवली होती, तरीही हजारो लोक फेरीत सहभागी झाले होते. म. ए. समितीच्या आवाहनास प्रतिसाद देत शहरासह उपनगर परिसरात कडकडीत हरताळ पाळण्यात आला.