नाशिक- शहरातील उपनगर पोलिस ठाण्यात कार्यरत असलेल्या पोलिस कर्मचाऱ्याने आपल्या सावत्र मुलांवर गोळीबार केल्याची धक्कादायक घटना येथील अशवमेध नगरमध्ये आज दुपारी 4 वाजेच्या सुमारास घडली. गोळीबारात दोन्ही मुलांचा मृत्यू झाला आहे. सोनू नंदकिशोर चिखलकर(वय25) आणि शुभम नंदकिशोर चिखलकर(वय22)अशी मृत मुलांची नावे आहेत. घरगुती कारणातून हा गोळीबार झाल्याची प्राथमिक माहिती मिळत आहे.
दुपारी चार वाजेच्या सुमारास घटना घडली आहे. नाशिकच्या उपनगर पोलिस स्टेशनमध्ये कार्यरत असलेले संजय भोये कॉन्सटेबल पदावर कार्यरत आहेत. त्यांनी आपल्या सावत्र मुलांवर गोळीबार केला. यामागचे कारण अद्याप स्पष्ट झालेले नाही, पण घरगुती कारणावरून गोळीबार केला असल्याचा प्राथमिक अंदाज वर्तवण्यात येत आहे.
दरम्यान, आपल्या मुलांवर गोळ्या झाडल्यानंतर आरोपी कॉन्सटेबल संजय भोये हे स्वतःहून पोलिसांना शरण गेले आणि घडलेला सगळा प्रकार सांगितला. पोलिस सध्या घटनास्थळी दाखल झाले असून पुढील तपास सुरू आहे. या घटनेने परिसरात एकच गोंधळ उडाला आहे.