पुणे- – आंबेगाव बुद्रुकमधील न-हे येथील सिताराम कॉम्प्लेक्स ही सहा मजली इमारत आज (शुक्रवारी) पहाटे तीनच्या सुमारास कोसळली. इमारतीच्या ढिगा-याखाली एक व्यक्ती अडकल्याची भिती आहे. अग्निशमन दलाचे जवान घटनास्थळी दाखल झाले असून बचावकार्य युध्दपातळीवर सुरु आहे.
मिळालेल्या प्राथमिक माहितीनुसार, न-हेतील भुमकर मळा येथे असलेल्या या सिताराम कॉम्प्लेक्समध्ये २० सदनिका आहेत. त्यात आठ कुटुंबामधील सुमारे ३५ जण वास्तव्यास होते. वर्षभरापूर्वीच ही इमारत उभारण्यात आली होती. पहाटे तीनच्या सुमारास या इमारतीला तडे जावू लागले. त्याचा कर्णकर्कश असा आवाजही आला.
साखरझोपेत असलेले रहिवाश्यांना भुकंप झाल्याचा भास झाला. घाबरुन रहिवाश्यांनी इमारतीतून खाली धाव घेतली. काही रहिवाश्यांनी इतरांना झोपेतून उठवून खाली आणले. त्यानंतरच्या दहा मिनिटांनीच इमारत टप्प्या-टप्प्याने खाली कोसळली. येथील रहिवाश्यांचे नशिब बलवत्तर म्हणायला हवे.
दरम्यान, अग्निशमन दल, एनडीआरएफचे जवान घटनास्थळी दाखल झाले. पहाटेच्या सुमारास असलेल्या अंधारामुळे बचाव कार्यात अडथळे येत होते. क्रेनच्या सहाय्याने मातीचा ढिगारा उपसून पाच ते सहाजणांना बाहेर काढण्यात यश आले. परिसरातील नागरिकही मदतीसाठी धावून आले आहेत. एका महिलेसह तिघेजण ढिगा-याखाली अडकल्याची भिती व्यक्त केली जात आहे.
या इमारतीचे बांधकाम अपूर्णावस्थेत तसेच निकृष्ट दर्जाचे होते असा आरोप परिसरातील नागरिकांनी केला आहे. या इमारतीला तीन मजल्यांची परवानगी असताना बेकायदेशीरपणे पाच मजले उभारण्यात आल्याचे समोर आले आहेत. न-हे आंबेगावचा हा परिसर बेकायदा बांधकामांसाठी कुप्रसिध्द आहे. दरम्यान, पोलिसांनी बिल्डरला चौकशीसाठी ताब्यात घेतले आहे. धनकवडी तळजाई पठार येथील इमारत कोसळण्याच्या प्रकारानंतर नगर रस्त्यावर एक इमारत कोसळली होती इमारती कोसळण्याचा सिलसिला पुण्यात सुरूच असून अशा इमारती बांधणाऱ्या बिल्डरांवर मात्र कोणतीही जरब बसेल अशी कारवाई होताना दिसली नाही आणि त्यामुळे दिसेल ती जागा बळकावा आणि जमेल तशी बांधकामे करा आणि करोडो कमवा हा धंदा येथे जोरात सुरु आहे राजकारणी गुंड आणि तलाठी यांच्या संगनमताने होणार्या या कारभारास महापालिका प्रशासनाची चांगलीच साथ मिळाली असल्याचे येथे झालेल्या बांधकामांवरून स्पष्ट होते आहे
Tags :