नवी मुंबई – अखिल भारतीय मराठी नाट्य परिषद ऐरोली शाखेच्या वतीने शॉर्ट फिल्म फेस्टिवलचे आयोजन करण्यात आले होते, संपूर्ण महाराष्ट्रातून ६५ हुन अधिक शॉर्ट फिल्म यात सहभागी झाल्या होत्या, आज ऐरोली येथे त्याचा पुरस्कार वितरण सोहळा मोठया जल्लोषात संपन्न झाला, अध्यक्ष विजय चौगुले, अभिनेते कमलेश सावंत, दिग्दर्शक प्रविण कारळे, अदिती सारंगधर, अशोक समर्थ, लेखिका मनीषा कोरडे, दिग्दर्शक राजू मेश्राम, संजय क्षेममकल्याणी, संदीप जंगम, रमेश वाणी यांच्या हस्ते पुरस्कार सोहळ्याचा शुभारंभ करण्यात आला.
पुरुषोत्तम बेर्डे, अमित राय, विजू माने, कैमरामैन राजा फड़तरे परिक्षक असलेल्या या महोत्सवातील सर्वोत्कृष्ट १० शॉर्ट फिल्मचे स्क्रीनिंग करण्यात आले, आणि त्यातून आयडेंटिटी, सारथी आणि मुंबई एरर यांना अनुक्रमे प्रथम, द्वितीय, तृतीय पुरस्कार देवून सन्मानित करण्यात आले. तसेच याशिवाय अभिनेता अशोक समर्थ यांचा अभिनय प्रवास उलगडणारी प्रदीर्घ मुलाखत घेण्यात आली. फ़िल्म रायटर्स असोसिएशनच्या जॉइंट सेक्रेटरी आणि प्रसिद्ध लेखिका मनीषा कोरडे (मालामाल विकली, बिल्लू बार्बर इ.) यांनी उपस्थित फ़िल्म मेकर्ससोबत पटकथा आणि सवांद यावंर चर्चा केली, आणि त्यांच्या प्रश्नांना उत्तरे दिली. खैरलांजीच्या माथ्यावर चित्रपटाचे लेखक दिग्दर्शक राजू मेश्राम यांनी चित्रपट आणि सैंसोर यावर चर्चा केली, अधिकाधिक शाब्दिक वापर करून दृश्यपरिणाम साधता येवू शकतो असेही मेश्राम यांनी सांगितले.
नुक्कड़ मालिकेतून घराघरात पोहचलेले हिंदी चित्रपट अभिनेते पवन मल्होत्रा यांनी सांगितले की, शॉर्ट फिल्मचे प्रमाण भारतात सध्या वाढत असून नवोदितांना आपली प्रतिभा दर्शवण्याची संधी मिळते, त्यातून सिनेसृष्टीला नविन प्रतिभावंत लेखक, दिग्दर्शक, कलाकार मिळतील. अनेक आंतरराष्ट्रीय पुरस्कार विजेत्या रोड टू संगम चित्रपटाचे लेखक दिग्दर्शक अमित राय यांनी या शॉर्ट फ़िल्म फेस्टिवलचे परीक्षक म्हणून काम पाहिले होते,
नवी मुंबईचे महापौर सुधाकर सोनावणे यांची विशेष उपस्थिती या कार्यक्रमाला लाभली, नवोदितांना प्रेरणा देणारा हा शॉर्ट फ़िल्म फेस्टिवल असून नवी मुंबईत होतोय याचा मला अभिमान आहे…बोलताना त्यांनी आपला जीवनप्रवास देखील सांगतांना भरपूर हशा पिकवला.
अध्यक्ष विजय चौगुले यांनी सांगितले की, नवी मुंबईत सांस्कृतिक चळवळ सुरु व्हावी यासाठीच आम्ही शॉर्ट फ़िल्म फेस्टिवलचे आयोजन केले होते, ज्याला खुप मोठ्या प्रमाणात प्रतिसाद मिळाला.