पुणे रनिंग कमिटीचा पुढाकार; ६ हजार पुणेकरांचा सहभाग
पुणे:- सोफोश या सेवाभावी संस्थेच्या मदतीसाठी तब्बल ६ हजार पुणेकर ‘पुणे रनिंग’ या स्पर्धेच्या माध्यमातून रस्त्यावर धावले. पुणे रनिंग कमिटी आणि दरोडे जोग प्रॉपर्टीज यांच्या संयुक्त विद्यमाने हा विशेष उपक्रम पार पडला. या स्पर्धेत अनेक मुले, ज्येष्ठ, परदेशी तरुणांनी यांनी मोठ्या संख्येने भाग घेतला.
‘पुणे रनिंग’ या मैरथोन स्पर्धेला रविवारी सकाळी ५:३० ला बीएमसीसी च्या मैदानावरून सुरुवात झाली. विविध वयोगटानुसार ही स्पर्धा घेण्यात आली. यात २१ किलोमीटरच्या खुल्या गटातून शिल्पा फडके आणि अमित कुमार यांना प्रथम पारितोषिक , प्रमाणपत्र आणि टू व्हीलर देऊन सन्मानित करण्यात आले. तर संजय ढाका आणि इलिझी अल्फाईन यांनी १० किलोमीटर अंतराच्या महिला व पुरूष गटात प्रथम क्रमांक पटकावला.
या स्पर्धेतील प्रमुख आकर्षण ठरला तो तिसरा गट. यात २१, १०, ५, ३ किलोमीटर मध्ये अपंग व्यक्तींनी सहभाग घेतला होता. या स्पर्धेसाठी पुणे रनिंग कमिटी च्या वतीने ३०० स्वयंसेवकांनी मदत केली. यात कमिटीच्या समीर शेख, निखिल शाह, अमोल अहिरे यांचा मोलाचा वाटा होता.
या स्पर्धेच्या माध्यमातून सोसायटी ऑफ फ्रेंड्स ऑफ ससून हॉस्पिटल (सोफोश) या स्वयंसेवी संस्थेच्या मदतीसाठी पुणेकरांनी पुढाकार घेतला. पुणे ‘रनिंग’ या उपक्रमामध्ये सर्वच वयोगटातील व्यक्तींनी हिरीरीने सहभाग घेऊन या संस्थेला आर्थिक सहाय्य करण्याचा प्रयत्न केला. या स्पर्धेत प्रवेश घेण्यासाठी पुणे रनिंग कमिटीच्या वतीने स्पर्धकास विशिष्ट शुल्क आकारण्यात आले होते व जमा झालेली रक्कम सोफोश या संस्थेला देण्यात आली. स्पर्धेच्या माध्यमातून जमलेले तब्बल पाच लाख रुपये सोफोश संस्थेचे सचिव डॉ. अरविंद हेर्लेकर यांना प्रदान करण्यात आले.
यावेळी सुप्रसिद्ध क्रिकेटपटू चंद्रकांत बोर्डे यांनी धावपटूंना मार्गदर्शन केले. यावेळी स्पर्धकांशी संवाद साधताना ते म्हणाले की, समाजाप्रती असणारे आपले कर्तव्य आपण सर्वांनी पार पाडणे आवश्यक आहे. या स्पर्धेच्या माध्यमातून आपण सर्वांनी समाजात जागरूकता निर्माण करण्यासाठी पुढाकार घेतला आहे. ही कौतुकास्पद बाब आहे.
यावेळी दरोडे- जोग प्रॉपर्टीचे संचालक सुधीर दरोडे व आनंद जोग म्हणाले, पुणे रनिंग हा उपक्रमामार्फत आम्हांला सामाजिक कार्यात सहभागी होता आले. यामुळे गोरगरिबांना आरोग्य सेवा मिळण्यास मदत होईल. आम्हाला खात्री आहे की, आम्ही उचलेल्या खारीच्या वाट्यामुळे लोकांच्या चेहऱ्यावर नक्कीच आनंद झळकेल.
आगामी काळात येणारा ‘प्यार वाली लव स्टोरी ‘ या चित्रपटातील सुप्रसिद्ध सिनेकलाकार स्वप्नील जोशी, सई ताम्हणकर, उर्मिला कानेटकर, उपेंद्र लिमये यांनीही यावेळी विशेष उपस्थिती दर्शविली.
