पुणे- : कात्रज येथील पेशवे तलावात एका युवकाचा बुडून मृत्यू झाल्याची दुर्घटना रविवारी सकाळच्या सुमारास घडली. तलावाच्या मध्यभागी असणाऱ्या छत्रपती शिवाजी महाराजांच्या पुतळ्याची पूजा करण्यासाठी काही तरुण निघाले होते. त्यावेळी काहीजण बोटीने पुतळ्याच्या ठिकाणी पोहोचले. मात्र, ज्ञानेश्वर पांचाळ (वय २३, रा. कात्रज) या तरूणाने पोहत जाण्याचा निर्णय घेतला आणि तो कडेपर्यंत पोहोचू न शकल्याने पाण्यात बूडून त्याचा मृत्यू झाला.कात्रज अग्निशामक दलाच्या ५ जवानांनी मिळून दोन तासांच्या प्रयत्नानंतर पाण्यातून या तरुणाचा मृतदेह बाहेर काढला. पेशवे तलावात पूजेसाठी पाण्यातून पोहून जाताना तलावाच्या मध्यात बूडून तरुणाचा मृत्यू झाला. सोबतच्या सहकाऱ्यांनी बोटीने येण्याचा आग्रह करुनदेखिल तलावात पोहण्याचा हट्ट युवकाला महागात पडल्याचे भारती विद्यापीठ पोलिसांनी सांगितले आहे. तत्पूर्वी, भारती विद्यापीठ पोलिसांनी मृतदेह उत्तरीय तपासणीसाठी ससून रुग्णालयात दाखल केला आहे.