पुणे-डॉ. वसंतराव देशपांडे प्रतिष्ठानच्या वतीने आयोजित करण्यात आलेल्या वसंतोत्सवाला आजपासून स्वारगेट येथील गणेश कला क्रिडा मंच येथे सुरुवात झाली. महोत्सवाचे हे सलग 14 वे वर्ष असून आज प्रसिद्ध अभिनेते नाना पाटेकर, सारस्वत बॅकेच्या व्यवस्थापकीय संचालिका संगीता संधाणे, रावेतकर गृपचे व्यवस्थापकीय संचालक अमोल रावेतकर, डाॅ. वसंतराव देशपांडे यांचे पुत्र बापू देशपांडे, प्रसिद्ध गायक राहुल देशपांडे यांची कन्या रेणूका देशपांडे यांच्या हस्ते दीपप्रज्वलन करीत महोत्सवाला सुरूवात करण्यात आली. शनिवार 20 फेब्रुवारी आणि रविवार 21 फेब्रुवारी रोजी सायं 4 ते 10 वाजेपर्यंत सदर महोत्सव गणेश कला क्रीडा मंच येथे पार पडणार आहे. धृपद गायन, शास्त्रीय गायन, तालवाद्य, दक्षिणात्य व हिंदुस्थानी संगीताचा मेळ असलेल्या वैविध्यपूर्ण संगीताची मेजवानी हे यंदाच्या महोत्सवाचे वैशिष्ट्य असेल. याबरोबरच यंदाचा महोत्सव डॉ. वसंतराव देशपांडे जन्मशताब्दी वर्षपूर्ती सोहळा म्हणून आयोजित करण्यात येणार असल्याची माहिती डॉ. वसंतराव देशपांडे यांचे नातू व प्रसिध्द शास्त्रीय गायक राहुल देशपांडे यांनी यावेळी दिली.