दुबई : ‘मसालाकिंग’ डॉ. धनंजय दातार यांच्या कुशल नेतृत्वाखाली प्रगती करणाऱ्या ‘अल अदील ग्रुप’ने दुबईत नुकतीच आणखी दोन सुपर स्टोअर्स उघडली आहेत. या समूहाची आता एकूण ३८ सुपर स्टोअर्सची साखळी आखाती प्रदेशात यशस्वी कार्यरत झाली आहे. ‘अल अदील ट्रेडिंग कंपनी’चे ३७ वे स्टोअर दुबईतील अल क्यूसिस या मध्यवर्ती वसाहतीत बैरुत स्ट्रीटवर सुरु झाले असून त्याचे उद्घाटन अभिनेत्री दिया मिर्झाच्या हस्ते झाले, तर ३८ वे स्टोअर अल बरशा भागात उघडले असून त्याचे उद्घाटन अभिनेत्री विद्या बालनच्या हस्ते झाले. या दोन्ही शानदार समारंभांना डॉ. धनंजय दातार, त्यांचे कुटूंबीय आणि मोठ्या संख्येने दुबईतील भारतीय समाजाची उपस्थिती होती.
यासंदर्भात माहिती देताना ‘अल अदील ग्रुप’च्या वित्त संचालक सौ. वंदना दातार म्हणाल्या, “दिया मिर्झा आणि विद्या बालन या केवळ रुपवान अभिनेत्रीच नसून आपल्या व्यक्तीमत्त्वातून भारतीय स्त्रीची अभिव्यक्ती दाखवून देतात. वैविध्यपूर्ण आणि मनावर ठसणाऱ्या भूमिका मेहनतीने साकारुन त्यांनी लाखो प्रेक्षकांच्या मनात स्वतःचे दृढ स्थान निर्माण केले आहे. नेमके हेच गुणवैशिष्ट्य आमच्या ‘अल अदील’ ब्रँडचेही असल्याने दुबईतील नव्या स्टोअर्सचे उद्घाटन त्यांच्या हस्ते करणे आम्हाला यथोचित वाटले. ही नवी स्टोअर्स दिवाळीच्या सणाचे औचित्य साधून उघडण्यात आली आहेत. सणासुदीच्या खरेदीचा आनंद वाढवण्यासाठी आम्ही आमच्या सर्व स्टोअर्समध्ये निवडक उत्पादनांवर अगदी ५० टक्क्यांपर्यंत सवलत देऊ केली आहे.”
वर्ष १९८४ मध्ये वडिलांनी दुबईत सुरु केलेल्या लहानशा दुकानातून सुरवात करुन त्याचे रुपांतर सुपरमार्केट, मसाल्यांचे कारखाने, पीठ गिरण्या व आयात-निर्यात कंपनी असलेल्या जागतिक समूहात करण्यात ‘अल अदील ग्रुप’चे अध्यक्ष व व्यवस्थापकीय संचालक डॉ. धनंजय दातार यांचा महत्त्वाचा वाटा आहे. प्रगतीच्या या टप्प्यावर पोचल्याचा आनंद व्यक्त करताना ते म्हणाले, “अल अदील हा ब्रँड सुरवातीपासूनच उत्पादनांची अस्सलता, दर्जा व सुरक्षितता यासाठी ओळखला जातो. आखाती देशांमधील भारतीयांप्रमाणेच बहुसांस्कृतिक समाजांच्या मनात त्याने दृढ विश्वास संपादन केला आहे. या प्रवासात आम्ही कधीही आमच्या मध्यवर्ती मूल्यांशी तडजोड केली नाही. म्हणूनच जगभर मंदीचे वातावरण असतानाही आमच्या कंपनीने भरघोस प्रगतीची घोडदौड कायम ठेवली. यामध्ये आमचे ग्राहक, हितचिंतक आणि कर्मचाऱ्यांचे योगदान अनमोल आहे.”
ते पुढे म्हणाले, “कोणताही उद्योग यशस्वी व्हायचा असेल तर प्रामाणिकपणा, कष्ट आणि संयम ही त्रिसूत्री अत्यंत महत्त्वाची ठरते. मराठी माणसाला व्यवसाय जमत नाही, असा उपरोध मला अनेकदा ऐकून घ्यावा लागला, परंतु मी वरील त्रिसूत्रीवर दृढ श्रद्धा ठेवली. कामकाजात पारदर्शकता राखली. त्याचाच परिणाम म्हणजे एका मराठी माणसाच्या छोटेखानी व्यवसायाचे रुपांतर जागतिक समूहात झाले आहे. वाटचालीत साथ व सदिच्छा देणाऱ्या, तसेच मार्गदर्शन करणाऱ्या सर्वांचा मी ऋणी आहे.”
‘अल अदील ट्रेडिंग’चे संचालक हृषिकेश दातार म्हणाले, “आमचा समूह विस्ताराच्या महत्त्वाच्या टप्प्यात असून बदलत्या काळाचा वेध घेऊन अधिकाधिक ग्राहकांपर्यंत पोचण्यासाठी आम्ही डिजीटल माध्यमांतही मोठी गुंतवणूक करत आहोत. आम्ही नुकतेच अल अदील ऑनलाईन स्टोअर सुरु केले असून त्याला ग्राहकांचा भरघोस प्रतिसाद मिळाला आहे. त्यामुळेच आम्ही आमचे ऑनलाईन रीटेल व्यवसाय प्रारुप बाजारपेठेत आघाडीवर राहण्याच्या दिशेने बदलले आहे. उल्लेखनीय बाब म्हणजे ‘अल अदील’च्या ऑनलाईन व स्टोअर्सद्वारे अशा दोन्ही विक्रींमध्ये सातत्याने वाढ होत आहे. आमचा ग्राहकवर्ग वाढत असल्याचेच ते द्योतक आहे. वर्ष २०२० पर्यंत ऑनलाईन विक्री, स्टोअर्सची संख्या व ग्राहकांची संख्या या तीन्हीमध्ये लक्षणीय वाढ दिसून येण्याची आम्हाला खात्री आहे.”
डॉ. धनंजय दातार यांच्या चैतन्यशील नेतृत्वाखाली प्रगती करणाऱ्या ‘अल अदील ट्रेडिंग’ने ९००० भारतीय उत्पादने संयुक्त अरब अमिरातीत (युएई) उपलब्ध करुन देण्यात महत्त्वाची भूमिका बजावली आहे. आजघडीला ‘अल अदील ग्रुप’ची आखाती देशांत ३८ सुपरमार्केट्स, दुबई, अबूधाबी, शारजा व अजमान भागांत २ पीठाच्या गिरण्या, २ मसाला उत्पादन कारखाने असे नेटवर्क विस्तारले आहे आणि ‘मसाला किंग एक्स्पोर्ट्स (इंडिया) प्रायव्हेट लिमिटेड’ या नावाने मुंबई निर्यात विभागही कार्यरत आहे. अल अदील समूह सक्रिय विस्तार साधत असून त्याने नुकतेच ओमान व बहारीनमध्ये नवी आऊटलेट्स उघडली आहेत. कंपनीने अमेरिका, कॅनडा, टांझानिया, केनया, स्वीत्झर्लंड, इटली व एरित्रिया त्याचप्रमाणे कुवेत, ओमान व युएई या देशांत व्यापारी मार्ग निर्माण करुन विशेष वर्गातील आस्थापनांद्वारे आयात व निर्यात क्षेत्रांतही विस्तार केला आहे.
‘अल अदील’ने आपल्या ‘पिकॉक’ या लोकप्रिय ब्रँडअंतर्गत ७०० हून अधिक खाद्यउत्पादने उपलब्ध करुन दिली असून आगामी काळात त्यांत आणखी भर पडेल. ‘पिकॉक’ हा मसाल्याचे पदार्थ व तयार मसाल्यांच्या सर्वाधिक मोठ्या ब्रँडपैकी असून त्याच्या संग्रहात सध्या मसाल्यांबरोबरच डाळी, पीठे, लोणची, मुखवास, पापड आणि सुकामेव्याचाही समावेश आहे.