पुणे ः जे प्रश्न सोडवायला पाहिजेत ते कोणी सोडवत नाही असे चित्रपट कलावंत, तंत्रज्ञ, बॅकस्टेज आर्टिस्ट यांचे अनेक प्रश्न प्रलंबित आहेत. ते सोडविण्यासाठी राष्ट्रवादीमध्ये प्रवेश केला आहे. ज्येष्ठ कलाकारांचे मानधन वाढविणे, राज्य सरकारच्या जाहिरातींमध्ये मराठी कलाकारांना प्राधान्य मिळवून देणे, टिव्ही मालिकांमधील कलाकारांचे मानधन 90 वरून 30 दिवसांवर आणणे, कर्मचाऱयांच्या शिफ्ट 8 तासांच्या करणे, याला माझे प्राधान्य असेल, असे चित्रपट निर्मात्या आणि अभिनेत्री प्रिया बेर्डे यांनी मंगळवारी राष्ट्रवादी कॉंग्रेसमध्ये प्रवेश करताना सांगितले.
बेर्डे यांच्यासमवेत अभिनेते सिद्धेश्वर झाडबुके, लावणी कलावंत शकुंतला नगरकर, अभिनेत्री सुहासिनी देशपांडे, अभिनेते विनोद खेडेकर, लेखक-दिग्दर्शक डॉ. सुधीर निकम, निर्माते संतोष साखरे यांनी या प्रसंगी राष्ट्रवादी कॉंग्रेसमध्ये प्रवेश केला.