‘जैन फिल्म प्रॉडक्शन’ प्रस्तुत ‘तू आणि मी, मी आणि तू’ चित्रपटाच्या पोस्टरचे महाराष्ट्र राज्य महिला आयोगाच्या अध्यक्षा रुपाली चाकणकर यांच्या हस्ते अनावरण सोहळा संपन्न
पुणे- सिनेसृष्टी जरी झगमगती ,रंगीबेरंगी आकर्षक असली तरी या सृष्टीत पडद्याआडच्या बऱ्याच गोष्टी चिंताजनक आहेत .अशा सृष्टीत पदार्पण करताना केवळ चांगला अभिनेता च होऊन चालणार नाही तर त्या सोबत मला चांगला माणूस म्हणून हि जीवन व्यतीत करायचे आहे असे मत आज आपल्या वाढदिवशी होणाऱ्या पहिल्याच चित्रपटाच्या पोस्टर च्या अनावरण प्रसंगी सोहम चाकणकर याने व्यक्त केले. राष्ट्रवादीच्या नेत्या , महिला आयोगाच्या अध्यक्षा रुपाली चाकणकर यांचा मुलगा सोहम … त्याचा पहिलाच चित्रपट विना अॅटम सॉंग असलेला आणि आई -मुलाच्या नात्यावर प्रकाश टाकू पाहणारा चित्रपट असला तरी त्याकडे लव स्टोरी म्हणूनही पाहिलं जाणार आहे. त्याची नायिका शिल्पा ठाकरे आणि चित्रपटाचे निर्माते दिग्दर्शक, संपूर्ण टीम तसेच प्रसिद्ध व्याख्याते दत्ता कोहिनकर,भाऊसाहेब भोईर आणि स्वतः रुपाली चाकणकर ,काका चव्हाण आणि अनेक मान्यवर यावेळी उपस्थित होते .
‘जैन फिल्म प्रॉडक्शन’ प्रस्तुत ‘तू आणि मी, मी आणि तू’ या मराठी चित्रपटाच्या पोस्टरचे अनावरण यावेळी महाराष्ट्र राज्य महिला आयोगाच्या अध्यक्षा रुपाली चाकणकर यांच्या हस्ते करण्यात आले. सोहमच्या वाढदिवशी आई मुलाची गाथा सांगणाऱ्या या चित्रपटाच्या पोस्टरचे त्याच्या आईच्या म्हणजेच रुपाली चाकणकरांच्या हस्ते अनावरण करण्यात आले.
प्रत्येक नाण्याला जशा दोन बाजू असतात तशाच प्रेमालाही आहेत. प्रेम करणं ते टिकवणं आणि निभावणं या गोष्टी वाटतात तितक्या सोप्या नाहीत याची जाणीव या चित्रपटातून अभिनेत्री शिल्पा ठाकरे आणि अभिनेता सोहम चाकणकर यांच्या फ्रेशजोडीने करून दिली. शिल्पाने आजवर बऱ्याच मराठी चित्रपटात मुख्य भूमिका साकारल्या असून सोहम या चित्रपटातून सिनेइंडस्ट्रीत पाऊल टाकत आहे. ‘जैन फिल्म प्रॉडक्शन’ प्रस्तुत निर्माते सागर जैन, ऋषभ कोठारी, राजू तोडसाम निर्मित आणि दिग्दर्शक कपिल जोंधळे दिग्दर्शित ‘तू आणि मी, मी आणि तू’ या चित्रपटाची कथा लेखक नितीन सूर्यवंशी लिखित आहे. तर चित्रपटाचे संगीताची बाजू संगीतकार प्रशांत सातोसे यांनी सांभाळली आहे,
प्रेमाची आगळीवेगळी कथा घेऊन येत शिल्पा आणि सोहमची जोडी रसिक प्रेक्षकांवर राज्य करण्यास ‘तू आणि मी, मी आणि तू’ या चित्रपटातून सज्ज झाली आहे.
आजच्या या कार्यक्रमादरम्यान रुपाली चाकणकर असे म्हणाल्या की,”सर्वप्रथम सोहमला वाढदिवसाच्या हार्दिक शुभेच्छा, या चित्रपटाचे निर्माते, दिग्दर्शक आणि टीम यांचे मनापासून आभार की माझ्या मुलाला या क्षेत्रात पदार्पण करण्याची संधी त्यांनी दिली. राजकारणात मला कोणताही वारसा नसताना मी जशी या क्षेत्रात उतरले तसेच माझ्या मुलाने सोहमने चाकणकर कुटुंबातील कोणीही या क्षेत्रात नसताना अभिनयक्षेत्रात स्वकर्तृत्वावर करिअर करण्याचा निर्णय घेतला. माझे बॅकग्राऊंड राजकीय असल्याने, शूटिंग दरम्यान सोहमने मला एक विनंती केली की, तू चुकूनही सेटवर येऊ नको कारण तू जर सेटवर आलीस तर संपूर्ण टीमला राजकीय दबावाच दडपण येईल आपण ही क्षेत्र वेगवेगळी ठेवू असे त्याने मला सांगितले.”