पुणे-भारतीय सर्कसमध्ये आता प्राणी नसले तरी सर्कसला अजूनही लोकप्रियता तेवढीच आहे. त्याचे सारे श्रेय मी सर्कस कलावंतांना देतो. आता बदलत्या युगात सर्कस कलावंतांनी परदेशी सर्कसचा अभ्यास करावा व त्यांचे कलाप्रकार आत्मसात करावे. त्याशिवाय आधुनिक तंत्रज्ञान, लाईट इफेक्टस्, म्युझीक यांचा कल्पकतेने वापर करावा. त्यामुळे भारतीय सर्कस देशात अधिक लोकप्रिय होईलच शिवाय परदेशातही भारतीय सर्कशींना मागणी राहील हीच भारतीय सर्कसचे जनक विष्णुपंत छत्रे यांना श्रद्धांजली ठरेल असे मत रॅम्बो सर्कसचे मालक पी.टी. दिलीप यांनी व्यक्त केले. भारतीय सर्कसचे शिल्पकार विष्णुपंत छत्रे यांनी 26 नोव्हेंबर 1882 मध्ये मुंबईत बोरीबंदर येथे आपल्या सर्कसचा पहिला शो केला. त्यास 136 वर्ष पूर्ण झाली. तसेच जागतिक सर्कसचे ही यंदाचे 250वे वर्ष आहे. या पार्श्वभूमीवर मगरपट्टा सिटीजवळील मुंढवा रेल्वे ओव्हरब्रीज जवळ चालू असणार्‍या रॅम्बो सर्कसमध्ये भारतीय सर्कसचा वर्धापन दिन उत्साहात साजरा करण्यात आला, त्यावेळी ते बोलत होते.
याप्रसंगी प्रथम विष्णुपंत छत्रे यांच्या तैलचित्रास पुष्पहार अर्पण करून दीपप्रज्वलन करण्यात आले. विष्णुपंत छत्रे यांचे वारस अजय व सौ. कल्पना छत्रे, आंतरराष्ट्रीय सर्कसपटू दामू धोत्रे यांचे पणतू आनंद धोत्रे, ‘सर्कसविश्व’ व ‘वर्ल्ड ऑफ सर्कसचे’ लेखक प्रवीण प्र. वाळिंबे यांचा सर्कसमधील विदूषकांच्या हस्ते शाल व पुष्पगुच्छ देऊन सत्कार करण्यात आला. तसेच रॅम्बो सर्कसचे चालक पी.टी. दिलीप व त्यांचे सुपुत्र सुजीत दिलीप यांच्या रॅम्बो सर्कसला 25 वर्ष होऊन गेल्याबद्दल त्यांचा पुणेरी पगडी, शाल व पुष्पगुच्छ देऊन सर्कसमधील विदुषकांनी सत्कार केला. यावेळी सर्कस तंबूमध्ये सर्व सर्कस कलावंत तसेच फ्रेंडस् ऑफ सर्कसचे प्रवीण तरवडे, अ‍ॅड. प्रदीप अगरवाल, बाळासाहेब शिंदे, अब्राल, मुन्नाभाई, सिद्धार्थ जांभूळकर, वाजिद आदी उपस्थित होते.
याप्रसंगी सुजीत दिलीप म्हणाले की, सर्कस हेच आमचे कुटुंब असून देशभर सर्कस घेऊन फिरताना सर्कसबद्दलचे जनतेतील प्रेम दिसून येते. केंद्र व राज्य सरकारची मदत मिळणे आवश्यक असून प्रत्येक पर्यटनस्थळी सर्कसला जागा द्यावी, परदेशी सर्कस भारतात आणून भारतीय सर्कसबरोबर एकत्रीत सर्कस शो करण्यास प्रोत्साहन द्यावे. त्यातून सर्कस कलावंतांना चांगले दिवस येतील व भारतीय सर्कसचा वारसा देखील जोपासला जाईल.
सत्काराला उत्तर देताना विष्णुपंत छत्रे यांच्या नातसून कल्पना छत्रे म्हणाल्या, विष्णुपंत छत्रे यांनी भारतीय सर्कसची मुहुर्तमेढ रोवून नवा इतिहास रचला. आता प्राण्याविना सर्कस असणार हे गृहीत धरून आधुनिक तंत्रज्ञानाचा वापर करून नव्या कलाप्रकारांसह सर्कस अधिक जोमाने चालवली पाहिजे.
आंतरराष्ट्रीय सर्कसपटू दामू धोत्रे यांचे पणतू आनंद धोत्रे यांनी सर्वच सर्कस कलावंतांना शुभेच्छा देऊन भारतीय सर्कस कलावंतांचा दर्जा कोठेही कमी नाही असे सांगितले.
यावेळी प्रवीण प्र. वाळिंबे यांनी सर्कसला अडचणीतून मार्ग काढण्यासाठी पुण्यासह मोठ्या शहरात मध्यवर्ती भागात कमी भाड्याने सर्कस ग्राउंड मिळाले पाहिजे व त्यासाठी जिल्हाधिकारी व महापौर यांनी पुढाकार घ्यावा, तसेच सर्कस, अ‍ॅम्युजमेंट पार्क, जत्रा, हॅन्डलूम एक्झिबिशन अशांसाठी शहरातील मध्यभागात कमी दरात कायम स्वरूपी मैदान उपलब्ध होण्यासाठी सर्व लोकप्रतिनिधी व राजकीय पक्षांनी एकत्रित प्रयत्न करावेत असे आवाहन त्यांनी केले.
प्रारंभी 26 नोव्हेंबरच्या मुंबई वरील अतिरेक्यांच्या हल्ल्यात मृत्युमुखी पडलेल्यांना श्रद्धांजली वाहण्यात आली. कार्यक्रमाचे सूत्रसंचालन प्रवीण प्र.वाळिंबे यांनी केले तर आभार प्रदर्शन प्रवीण तरवडे यांनी केले.
