मुंबई – राज्यातील सात कॅन्टोन्मेंटसाठी प्रत्येकी पाच कोटी रूपयांचा विकास निधी आणि राज्य शासनाच्या योजनांचा लाभ तेथील रहिवासी नागरीकांना देण्याचा निर्णय राज्य सरकारने गेल्या आठवड्यात घेतला आहे. या ऐतिहासिक निर्णयाबद्दल शिवाजीनगरचे आमदार विजय काळे, मावळचे आमदार बाळा भगडे यांच्यासह पुणे, खडकी आणि देहूरोड कॅन्टोन्मेंट बोर्डाच्या सदस्यांनी आज मंत्रालयात अर्थमंत्री सुधीर मुनगंटीवार यांची भेट घेऊन त्यांचा आभार मानले. यावेळी अर्थमंत्र्यांनी सर्व सदस्यांशी सविस्तर चर्चाही केली. कॅन्टोन्मेंट बोर्डाला विकास कामांसाठी निधी देणारे महाराष्ट्र हे देशातील पहिलेच राज्य ठरले आहे. त्याच बरोबर कॅन्टोन्मेंट हद्दीतील नागरीकांना राज्य शासनाच्या योजनांचाही लाभ मि
यावेळी खडकी कॅन्टोन्मेंटचे उपाध्यक्ष अभय सावंत, ज्येष्ठ सदस्य सुरेश कांबळे, हिवरकर, पुणे कॅन्टोन्मेंटच्या माजी उपाध्यक्षा डॉ. किरण मंत्री, देहूरोड कॅन्टोन्मेंटचे उपाध्यक्ष विशाल खंडेलवाल, देहूरोडचे सीईओ अभिजीत सानप, आमदार विजय काळे, आमदार बाळा भेगडे यांच्यासह तिन्ही बोर्डाचे सदस्य आणि अर्थमंत्रालयातील अधिकारीही हजर होते. सन १९६० पासून पहिल्यांदाच अशा प्रकारे कॅन्टोन्मेंट बोर्डाला विकास निधी देण्याचा निर्णय राज्य शासनाने घेतला आहे.
राज्य सरकारने जकात बंद करण्याचा निर्णय घेतला आणि याचा मोठा फटका कॅन्टोन्मेंट बोर्डांना बसला. त्यांना जकाती पोटी मिळणारे उत्पन्न बंद झाले. त्यामुळे त्यांना विकास कामांसाठी निधीची चणचण भासू लागली. कॅन्टोन्मेंट बोर्ड हे संरक्षण मंत्रालयाच्या अधिपत्याखाली काम करत असल्याने त्यांना आतापर्यंत राज्य शासानाकडून विकास निधी दिला जात नव्हता. विधानसभेसाठी कॅन्टोन्मेंटचे मतदार मतदान करून आमदार निवडत होते. पण राज्य सरकारच्या कोणत्याही योजनांचा लाभ या मतदारांना मिळत नव्हता.
ही बाब सर्वप्रथम आमदार विजय काळे यांनी अर्थमंत्री सुधीर मुनगंटीवार यांच्या निदर्शनास आणून दिली. त्यानंतर विकास निधी मिळण्याची मागणी मुख्यमंत्री देवेंद्र फडणवीस यांच्याकडेही केली. या दोन्ही महोदयांनी विकास निधी देण्याबद्दल सकारात्मकता दाखवली. या वर्षी फेब्रुवारी महिन्यात खडकी कॅन्टोन्मेंट बोर्डाच्या एका कार्यक्रमास अर्थमंत्री मुनगंटीवार यांना पाहुणे म्हणून त्यांनी बोलवले आणि त्याच कार्यक्रमात राज्यातील सातही कॅन्टोन्मेंटच्या उपाध्यक्ष, सीईओ यांच्या एकत्रित भेट मुनगंटीवार यांच्याशी घालून दिली. या सर्वांचे म्हणणे ऐकल्यावर मुनगंटीवार यांनी कार्यक्रमातच कॅन्टोन्मेंटला विकास निधी देण्याची घोषणाही केली.
अर्थसंकल्पीय अधिवेशन काळात मुख्यमंत्री फडवणीस यांच्या समावेत शिवाजीनगर मतदारसंघातील कामांबाबत मुंबईत झालेल्या बैठकीत आमदार काळे यांनी कॅन्टोन्मेंट बोर्डच्या निधीची मागणी केली. दोन महिन्यात याबाबतचा निर्णय घेण्याचे आश्वसन मुख्यमंत्र्यांनी दिले. त्यानुसार गेल्या मंगळवारी (दि. ५ जून) झालेल्या मंत्रीमंडळाच्या बैठकीत राज्यातील प्रत्येक कॅन्टोन्मेंट बोर्डाला पाच कोटी रूपये विकास निधी देण्याचा निर्णय घेण्यात आला. या क्रांतीकारी निर्णयबद्दल आज मंत्रालयात जाऊन कॅन्टोन्मेंटच्या उपाध्यक्ष, सदस्यांनी अर्थमत्रीं सुधीर मुनगंटीवार यांचा शंकराची मूर्ती, स्मृती चिन्हं देऊन त्यांचे आभार मानले.