पुणे-अवघ्या १५ हजाराच्या लाच प्रकरणात पकडलेल्या उपजिल्हाधिकारी श्रीपती मोरेकडे लाखो रुपयांची रोकड, सोने, पेट्रोल पंप आणि पुणे, सोलापूर या शहरांमध्ये फ्लॅट असल्याची माहिती तपासात पुढे आली आहे. एसीबीने गुरुवारी संध्याकाळी मोरेच्या कार्यालयात लाच प्रकरणी रंगेहाथ पकडण्याची ही कारवाई केली.
त्यानंतर, मोरेच्या पुण्यातील घरात एसीबीने झडती घेतली. त्यात 38 लाख 33 हजार रुपयांची रोकड आढळून आली आहे. त्याचबरोबर, सोनं, पेट्रोल पंप आणि पुणे-सोलापूरमध्ये फ्लॅट असल्याची माहिती एसीबीच्या तपासात पुढे आली आहे. नातेवाईकांच्या नावे मोठ्या प्रमाणात बेनामी संपत्ती जमा केल्याचेही मोरेने एसीबीच्या अधिकाऱ्यांनी सांगितले. या बेनामी मालमत्तांचा शोध एसीबी घेत आह.मोरेची खुली चौकशी करण्यात येणार आहे. श्रीपती मोरे पुण्याच्या जिल्हाधिकारी कार्यालयात उपजिल्हाधिकारी भूसंपादन क्रमांक अकरा या पदावर कार्यरत होता. जमिनीच्या वादाचा निकाल तक्रारदाराच्या बाजूने देण्यासाठी मोरेने 25 हजार रुपयांची लाच मागितली होती. त्यातील पंधरा हजार रुपये स्वीकारताना त्याला रंगेहाथ अटक करण्यात आली.
