पुणे :
इंडियन डायटेटीक असोसिएशन, पुणे चॅप्टर (भारतीय आहारसंस्था पुणे शाखा) आणि ‘डॉ. शिरोडकरर्स हेल्थ सोल्युशन्स प्रा. लि.’ यांनी ‘चेजिंग पॅराडाईमस् इन डायबेटीस’ (डायबेटिसच्या बदलत्या व्याख्या) या विषयावरील आहार तज्ज्ञांच्या परिषदेचे आयोजन केले आहे. ही परिषद जागतिक मधुमेह दिनी मंगळवारी, 14 नोव्हेंबर 2017 रोजी, दुपारी 3 ते 6 या वेळेत ‘हॉटेल मॅनेजमेंट व केटरिंग इन्स्टिट्यूट’च्या (मॉडेल कॉलनी, शिवाजीनगर) येथील दुसर्या मजल्यावरील सभागृहात संपन्न होणार आहे.
अजय शिरोडकर (व्यवस्थापकीय संचालक, डॉ. शिरोडकर्स हेल्थ सोल्युशन्स प्रा. लि.), प्रा. अनुजा किणीकर (‘इंडियन डायटेटीक असोसिएशन’ पुणे चॅप्टर (भारतीय आहारसंस्था, पुणे शाखा) च्या अध्यक्ष) आणि डॉ. ज्योती शिरोडकर (‘डायबेटीससाठी आयुर्वेद’ भारत सरकारच्या प्रोटोकोल कमिटीच्या तज्ज्ञ सदस्य) यांनी ही माहिती पुणे श्रमिक पत्रकार संघात झालेल्या पत्रकार परिषदेत दिली.
‘इंडियन इन्स्टिट्यूट ऑफ सायन्स एज्युकेशन अॅण्ड रिसर्च’ (आयसर) संस्थेतील जीवशास्त्रज्ञ डॉ. मिलिंद वाटवे, डॉ. ज्योती शिरोडकर (‘डायबेटीससाठी आयुर्वेद’ या भारत सरकारच्या प्रोटोकोल कमिटीच्या तज्ज्ञ सदस्य) आणि ‘डायटेटीक असोसिएशन’च्या शारदा अडसूळ हे तज्ज्ञ या परिषदेत मार्गदर्शन करणार आहेत. पुण्यातील साधारण 100 डॉक्टर, आहारतज्ज्ञ या परिषदेत सहभागी होणार आहेत.
मधुमेही रुग्णांसाठी तयार करण्यात आलेल्या पेटंट मिळालेल्या आहार उत्पादनांचे सादरीकरण या परिषदेत केले जाणार आहे. त्यात हेल्थ आटा, स्नॅकमिक्स, हेल्थ ड्रिंक यांचा समावेश आहे.
डॉ. ज्योती शिरोडकर म्हणाल्या, ‘मधूमेह व इतर नॉनकम्युनिकेबल रोगांच्या भारतातील पसरणार्या महालाटेविरुद्ध काम करण्यासाठी, डायबेटीसच्या बदलत्या व्याख्या समजून घेण्याची नितांत गरज आहे. आधुनिक आहारतज्ज्ञ आणि आयुर्वेदिय आहारतज्ज्ञ यांची भूमिका डायबेटीसची महालाट परतविण्यात निर्णायक आणि महत्त्वाची ठरणार आहे, म्हणून या परिषदेद्वारे जनजागृती करण्यात येणार आहे.’
पुण्यातील ‘इंडियन इन्स्टिट्यूट ऑफ सायन्स एज्युकेशन अॅण्ड रिसर्च’ (आयसर) संस्थेतील जीवशास्त्रज्ञ डॉ. मिलिंद वाटवे यांच्या नुकत्याच पुढे आलेल्या संशोधनातूनही मधुमेहच्या बदलत्या व्याख्या अधारेखित होत आहेत. या विषयावरील त्यांचे व्याख्यानही या परिषदेमध्ये होईल.
‘मधूमेहसाठी आयुर्वेद’ या भारत सरकारच्या प्रोटोकोल कमिटीच्या तज्ज्ञ सदस्य डॉ. ज्योती शिरोडकर, मधूमेहची भारतात व जगात आलेली महालाट परतविण्यात आयुर्वेद कसा समर्थपणे हातभार लावू शकतो व डायबेटीस, लठ्ठपणा, PCOS, हृदयरोग यांच्या रुग्णांनी वेळीच आयुर्वेदाचे सहाय्य घेण्याची गरज या परिषदेमध्ये प्रतिपादन करतील. तसेच ‘अमेरिकन डायबेटीस असोसिएशन’ने 2011 पासून क्लिनिकल प्रॅक्टिस, गाईडलाइन (CPG 2011) मध्ये समाविष्ट केलेल्या ‘मेडिकल न्यूट्रीशन थेरपी’ या विषयी आधुनिक आहारतज्ज्ञ श्रद्धा अडसूळ व्याख्यान देतील.
त्यानंतर आयआयटी मुंबईचे पदवीधर व ‘डॉ. शिरोडकर हेल्थ सोल्युशन्स’ या स्टार्टअप कंपनीचे संचालक अजय शिरोडकर यांचे सादरीकरण होईल. डॉ. शिरोडकर यांच्या दीर्घ संशोधनातून तयार झालेली, इंटरनॅशनल पेटंट मिळालेली हेल्थ फूडची माहिती ते देतील. हे हेल्थ फूड आयुर्वेद व आधुनिक आहारशास्त्र यांची सांगड घालून तयार केलेले, प्रयोगशालेय तपासण्या, प्रत्यक्ष रुग्ण/ निरोगी व्यक्ती यावर चाचण्या करून सिद्ध झालेले आहे. विशिष्ट कडधान्ये व तृणधान्ये यावर ग्रंथोक्त संस्कार करून बनविलेली व आरोग्यदक्ष पुणेकर ग्राहकांच्या पंसतीस उतरत असलेली ‘डॉ. शिरोडकर हेल्थ फूड्स’ या परिषदेत सादर करण्यात येतील.
या परिषदेच्या निमित्ताने मधुमेहाची महालाट परतविण्यासाठी एकात्मिक दृष्टीकोन विकसित करण्याच्या दिशेने आणि तशी कृती योजना आखण्याच्या दिशेने पाऊल उचलले जाईल. त्या अनुषंगाने सर्व तज्ज्ञ चर्चा करतील.